ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ເມື່ອບໍ່ດົນມານີ້, ກອງບັນຊາການ ປກສ ເມືອງລະມາມ ຈັດກອງປະຊຸມສະຫລຸບວຽກງານປ້ອງກັນຄວາມສະຫງົບ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2022 ເຊິ່ງ 6 ເດືອນຜ່ານມາ ສາ ມາດມ້າງຄະດີ ໄດ້ 14 ເລື່ອງ.
ທ່ານ ພັນໂທ ທ່ອນຈັນ ຈັນທາທອງສະຫວັດ ຮອງກອງບັນຊາການ ປກສ ເມືອງ ໄດ້ໃຫ້ຮູ້ວ່າ: ໃນ 6 ເດືອນຜ່ານມາ ຄະນະພັກ-ຄະນະບັນຊາກອງບັນຊາ ໄດ້ເອົາໃຈໃສ່ນໍາພາ-ຊີ້ນໍາ ພະນັກງານ-ນັກຮົບ ປະຕິບັດໜ້າທີ່ວຽກງານຂອງຕົນຢ່າງເປັນເຈົ້າການ ໃນນີ້ ໄດ້ລົງເຜີຍແຜ່ເອກະສານການປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢູ່ບັນດາຫ້ອງການອ້ອມຂ້າງເມືອງ ແລະ ຮາກຖານບ້ານ; ມ້າງຄະດີຄ້າ-ຂາຍຢາເສບຕິດໄດ້ທັງໝົດ 14 ລາຍ, ກັກຕົວຕ້ອງຫາໄດ້ 22 ຄົນ, ຍິງ 2 ຄົນ, ຢຶດຂອງກາງ (ປະ ເພດຢາບ້າ) ໄດ້ທັງໝົດ 36.227 ເມັດ, ໂທລະສັບ 12 ເຄື່ອງ, ໝໍ້ໄຟ 1 ໜ່ວຍ, ປືນແກັບ 1 ກະບອກ, ລົດຈັກ 4 ຄັນ ແລະ ເງິນ 800.000 ກີບ; ເກັບກຳຂໍ້ມູນ ແລະ ຂຶ້ນບັນຊີເປົ້າໝາຍພົວພັນຢາເສບຕິດສໍາເລັດ 40 ບ້ານ, ມີເປົ້າຜູ້ພົວພັນຢາເສບຕິດທັງໜົດ 1.008 ຄົນ, ຍິງ 10 ຄົນ, ໃນນີ້ເປົ້າໝາຍຄ້າ-ຂາຍ 132 ຄົນ, ເປົ້າໝາຍເສບ 876 ຄົນ, ຍິງ 10 ຄົນ; ມີອຸບັດເຫດຕາມທ້ອງຖະໜົນເກີດຂຶ້ນທັງໝົດ 21 ລາຍ, ມີພາຫະນະເປ້ເພ 38 ຄັນ, ຜູ້ຂັບຂີ່ໄດ້ຮັບບາດເຈັບ 35 ຄົນ ແລະ ເສຍຊິວິດ 5 ຄົນ, ຍິງ 2 ຄົນ; ໄດ້ທ້ອນໂຮມອາວຸດລ່າເນື້ອ (ປືນແກ໋ບ) ໄດ້ 16 ກະບອກ ແລະ ໝໍ້ຊ໋ອດ 1 ໜ່ວຍ.
ທ່ານ ພັນໂທ ທ່ອນຈັນ ຈັນທາທອງສະຫວັດ ຍັງໃຫ້ຮູ້ອີກວ່າ: ສໍາລັບ ວຽກຈຸດສຸມ 6 ເດືອນທ້າຍປີ ຈະສືບຕໍ່ລົງເກັບກໍາສະຖິຕີແຮງງານຄົນລາວ ແລະ ຄົນຕ່າງປະເທດ ທີ່ມາເຮັດວຽກນໍາບໍລິສັດຕ່າງໆຢູ່ເມືອງລະມາມ; ຕິດຕາມ, ກວດກາ ແລະ ຄຸ້ມຄອງການ ເຄື່ອນໄຫວຂອງຄົນຕ່າງປະເທດ ທີ່ເຂົ້າມາຄ້າ-ຂາຍ ແລະ ດຳລົງຊີວິດຢູ່ພາຍໃນເມືອງລະມານ; ເກັບກຳຂໍ້ມູນສະຖິຕິການລັກສ້າງຄອບຄົວແບບຜິດກົດໝາຍ ລະຫວ່າງ ພົນລະ ເມືອງລາວ ກັບຄົນຕ່າງປະເທດ; ເອົາໃຈໃສ່ປະຕິບັດວາລະແຫ່ງຊາດ ຕິດພັນກັບການແກ້ໄຂບັນຫາປະກົດການຫຍໍ້ທໍ້ເກີດຂຶ້ນໃນສັງຄົມ ໂດຍສະເພາະບັນຫາຄ້າ-ຂາຍ ແລະ ເສບຢາເສບຕິດ, ຂີ້ລັກງັດແງະ, ອຸບັດເຫດຕາມທ້ອງຖະໜົນ ແລະ ອື່ນໆໃຫ້ຫລຸດໜ້ອຍຖອຍລົງ ແນໃສ່ເຮັດໃຫ້ເມືອງລະມາມ ສືບຕໍ່ມີສະຖຽນລະພາບທາງດ້ານການເມືອງໜັກແໜ້ນ, ປະຊາຊົນມີຄວາມສາມັກຄີປອງດອງ, ສັງຄົມມີຄວາມສະຫງົບ, ຍຸຕິທໍາ ແລະ ສີວິໄລ.
