ຂປລ. ຕາມການລາຍງານຈາກ ທ່ານ ສີນວນ ໄຫລມຸນຕີ ຮອງຫົວໜ້າຂະແໜງບໍລິຫານ (ຜູ້ຮັບຜິດຊອບຕິດຕາມໂຄງການ) ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວແຂວງເຊກອງ (ຖວທ) ໃຫ້ຮູ້ໃນວັນທີ 30 ສິງຫາ ຜ່ານມານີ້ວ່າ: ໂຄງການກໍ່ສ້າງ-ສ້ອມແປງຫໍພິພິທະພັນມູນເຊື້ອແຂວງເຊກອງ ປະກອບມີ 3 ໜ້າວຽກຫລັກຄື: ວຽກສ້ອມແປງອາຄານ, ປ້າຍທາງເຂົ້າ ແລະ ໄຟຟ້າໃນອາຄານ ໄດ້ລົງມືຈັດຕັ້ງປະຕິບັດມາແຕ່ເດືອນພະຈິກ 2021 ໂດຍແມ່ນ ບໍລິສັດວຽງອໍາພອນກໍ່ສ້າງ ແລະ ສ້ອມແປງ-ເຄຫາສະຖານ ເປັນຜູ້ຮັບເໝົາກໍ່ສ້າງ ໃນມູນຄ່າທັງໝົດ 480 ລ້ານກວ່າກີບ, ມາຮອດປັດຈຸບັນ ປະຕິບັດສຳເລັດແລ້ວ 100%.
ທ່ານ ສີນວນ ໄຫລມຸນຕີ ຍັງໃຫ້ຮູ້ອີກວ່າ: ພາຍຫລັງສຳເລັດການປັບປຸງ, ກໍ່ສ້າງ ແລະ ສ້ອມແປງ, ພະແນກ ຖວທ ແຂວງ ຈະໄດ້ມີການຈັດສັນ, ຈັດວາງສະແດງບັນດາວັດຖຸພັນ, ຮູບພາບ ແລະ ປະຫວັດການເຄື່ອນໄຫວຂອງອະດີດການນໍາພັກ-ລັດ ແລະ ອະດີດການນໍາຂອງແຂວງໃຫ້ເປັນລະບົບຄືນໃໝ່, ເຮັດໃຫ້ມີຄວາມສວຍງາມ ເພື່ອດຶງດູດນັກທ່ອງທ່ຽວພາຍໃນ ແລະ ຕ່າງປະເທດເຂົ້າມາທ່ຽວຊົມໃຫ້ຫລາຍຂຶ້ນ ແລະ ເປັນບ່ອນສຶກສາຄວາມຮູ້ທາງດ້ານປະຫວັດສາດ ຂອງແຂວງເຊກອງ ໃຫ້ແກ່ສະມາຊິກພັກ, ພະນັກ ງານ, ທະຫານ-ຕໍາຫລວດ ກໍຄື ເຍົາວະຊົນຄົນຮຸ່ນໝຸ່ມ.
Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
