ວັນທີ 29 ສິງຫາ 2022 ທີ່ທ່າລາດ ເມືອງແກ້ວອຸດົມ ແຂວງວຽງຈັນ, ກະຊວງສຶກສາທິການ ແລະ ກິລາ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ກະຊວງສາທາລະນະສຸກ ແລະ ອົງການຢູນິເຊັບ ປະຈຳ ສປປ ລາວ ໄດ້ຈັດກອງປະຊຸມເພື່ອປຶກສາຫາລືຄວາມຄືບໜ້າການຜະລິດລາຍການໂທລະພາບ ສໍາລັບເດັກກ່ອນໄວຮຽນ ‘ເຮືອນຂອງຂ້ອຍ’ ພາກ 3 ໂດຍການເປັນປະທານ ຂອງທ່ານ ນາງ ສີພາພອນ ມະນີວັນ, ຫົວໜ້າກົມການສຶກສາເດັກຕອນຕົ້ນ ແລະ ທ່ານ ນາງ ມາລີເພັດ ສຸກຂະເສີມ, ຜູ້ຊ່ຽວຊານດ້ານການສຶກສາສໍາລັບເດັກກ່ອນໄວ ຂອງອົງການຢູນິເຊັບ ປະຈຳ ສປປ ລາວ. ມີຜູູ້ເຂົ້າຮ່ວມຕາງໜ້າຈາກກະຊວງສຶກສາທິການ ແລະ ກິລາ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ກະຊວງສາທາລະນະສຸກ, ໂທລະພາບລາວສະຕາ, ສິລະປິນອານິເມຊັນ ແລະ ຂະແໜງຕ່າງໆ ເຂົ້າຮ່ວມທັງໝົດ 30 ທ່ານ.
ທ່ານ ນາງ ສີພາພອນ ມະນີວັນ ໄດ້ຍົກໃຫ້ເຫັນເຖີງຄວາມສຳຄັນຂອງລາຍການໂທລະພາບ ສໍາລັບເດັກກ່ອນໄວຮຽນ ‘ເຮືອນຂອງຂ້ອຍ’ ພາກ 3 ໃນຊ່ວງໄລຍະການແຜ່ລະບາດຂອງພະຍາດໂຄວິດ-19 ເດັກ ແລະ ຄອບຄົວແມ່ນໄດ້ຮັບຜົນກະທົບຫລາຍດ້ານ. ໃນປັດຈຸບັນເດັກນ້ອຍໄດ້ກັບຄືນໄປໂຮງຮຽນ ແຕ່ພວກເຮົາຍັງຕ້ອງສືບຕໍ່ສຶກສາ ແລະ ຊຸກຍູ້ໃຫ້ເຂົາເຈົ້າຮັກສາສຸຂະອະນາໄມ ແລະ ຄວາມປອດໄພ ເຊັ່ນ: ການລ້າງມື ແລະ ການຢູ່ຫ່າງໄກຈາກສັງຄົມ ເພື່ອປ້ອງກັນພະຍາດໂຄວິດ-19 ຊື່ງເປັນອີກເຄື່ອງມືໜຶ່ງທີ່ສໍາຄັນ ສໍາລັບພໍ່ແມ່ ແລະ ຄູອາຈານ.
ທ່ານ ນາງ ມາລີເພັດ ສຸກຂະສົມ ໄດ້ກ່າວວ່າ: ຄວາມສາມາດຂອງເດັກໃນການຄິດ, ການສ້າງຄວາມສໍາພັນ ແລະ ການດໍາລົງຊີວິດຕາມຄວາມສາມາດຂອງເຂົາເຈົ້າ ແມ່ນກ່ຽວຂ້ອງໂດຍກົງກັບຜົນກະທົບຂອງສຸຂະພາບທີ່ດີ, ໂພຊະນາການທີ່ດີ ແລະ ການກະຕຸ້ນທີ່ເຫມາະສົມຈາກພໍ່ແມ່.
ທີມງານການຜະລິດລາຍການໂທລະພາບເດັກກ່ອນໄວຮຽນ ‘ເຮືອນຂອງຂ້ອຍ’ ໄດ້ໄປທົດລອງສາຍວີດີໂອຕອນໃໝ່ ທີ່ໂຮງຮຽນອະນຸບານມິດຕະພາບວຽງຈັນ ທີ່ເມືອງນາຄໍາ ເແຂວງວຽງຈັນ ຊື່ງໄດ້ຮັບການຕອບຮັບເປັນຢ່າງດີຈາກເດັກນ້ອຍ, ພໍ່ແມ່ ແລະ ຄູ-ອາຈານ. ຫຼັງຈາກນັ້ນຜູ້ເຂົ້າຮ່ວມຍັງໄດ້ປຶກສາຫາລື ແລະ ສະເໜີວິທີການປັບປຸງລາຍການສະແດງໃຫ້ດີຂຶ້ນກວ່າເກົ່າ ເພື່ອຕອບສະໜອງຄວາມຕ້ອງການຂອງເດັກນ້ອຍໃຫ້ໄດ້ດີທີ່ສຸດ ແລະ ຂໍ້ໃຫ້ມູນທີ່ເປັນປະໂຫຍດສໍາລັບຜູ້ເບິ່ງແຍງ ຊື່ງແຕ່ລະຕອນແມ່ນກວມເອົາຫຼາຍຫົວຂໍ້, ຕັ້ງແຕ່ການສົ່ງເສີມໂພຊະນາການທີ່ດີສໍາລັບເດັກນ້ອຍ, ວິທີການສົ່ງເສີມການຮຽນຮູ້ໃນຕອນຕົ້ນ ແລະ ການຫຼິ້ນຢູ່ເຮືອນ, ການເຊື່ອມໂຍງທັງສອງການຮຽນຮູ້ເບື້ອງຕົ້ນສໍາລັບເດັກນ້ອຍກັບການສຶກສາຂອງພໍ່ແມ່.
ລາຍການໂທລະພາບ ສໍາລັບເດັກກ່ອນໄວຮຽນ ‘ເຮືອນຂອງຂ້ອຍ’ ພາກ 3 ມີທັງໝົດ 12 ຕອນ ແລະ ຈະເປີດຕົວໃນຕົ້ນເດືອນຕຸລາ 2022 ຊື່ງຈະອອກອາກາດຜ່ານທາງໂທລະພາບແຫ່ງຊາດລາວ ຊ່ອງ 3, ຊ່ອງ Lao Star, ແລະ MoES ETV (LaoSat ຊ່ອງ 8) ນອກຈາກນັ້ນ ຍັງຈະໄດ້ເຜີຍແຜ່ຜ່ານສື່ສັງຄົມອອນລາຍ, YouTube ແລະ ເວທີການຮຽນ-ການສອນດີຈີຕອລ MoES, ຄັງປັນຍາລາວ. ລາຍການໂທລະພາບ ‘ເຮືອນຂອງຂ້ອຍ’ ແມ່ນການຮ່ວມມືກັນລະຫວ່າງ MoES, MICT, MOH, Lao Star TV ແລະ UNICEF ໂດຍໄດ້ຮັບການສະໜັບສະໜູນຈາກ EU, GPE ແລະ USAID.
