ຂປລ.ໃນວັນທີ 29 ສິງຫາ 2022, ທ່ານ ສະຫວັນຄອນ ລາຊະມຸນຕີ ປະທານສະມາຄົມນັກຂ່າວແຫ່ງ ສປປ ລາວ ພ້ອມຄະນະ ໄດ້ເຄື່ອນໄຫວເຮັດວຽກຮ່ວມກັບ ສະມາຄົມນັກຂ່າວຫວຽດນາມ ນະຄອນຮາຍຟອງ ທີ່ສຳນັກງານສະມາຄົມນັກຂ່າວຮາຍຟອງ ສສ ຫວຽດນາມ ໂດຍໄດ້ຮັບການຕ້ອນຮັບຂອງທ່ານ ຫງຽນ ຈິຕິນ ປະທານສະມາຄົມນັກຂ່າວ ນະຄອນຮາຍຟອງ.
ໃນໂອກາດດັ່ງກ່າວ ທ່ານ ຫງຽນ ແທງຕຸ ຮອງປະທານສະມາຄົມນັກຂ່າວ ນະຄອນຮາຍຟອງ ກ່າວວ່າ: ການມາຢ້ຽມຢາມຂອງຜູ້ແທນ ສະມາຄົມນັກຂ່າວ ແຫ່ງສປປ ລາວ ຄັ້ງນີ້ ຖືເປັນນິມິດໝາຍທີ່ດີ ທີ່ສອງສະມາຄົມໄດ້ແລກປ່ຽນບົດຮຽນ ແລະ ເຮັດວຽກຮ່ວມກັນ, ສິ່ງສຳຄັນປີນີ້ກໍເປັນປີສາມັກຄີມິດຕະ ພາບຫວຽດນາມ-ລາວ, ລາວ-ຫວຽດນາມ ທີ່ທັງສອງປະເທດໄດ້ຮ່ວມກັນສະເຫລີມສະຫລອງປີສາມັກຄີດັ່ງກ່າວຢ່າງຄຶກຄື້ນ ຄື ວັນສ້າງຕັ້ງສາຍພົວພັນທາງການທູດ ຫວຽດນາມ-ລາວ ຄົບຮອບ 60 ປີ ແລະ ວັນເຊັນສັນຍາມິດຕະພາບ ແລະ ການຮ່ວມມືຫວຽດນາມ-ລາວ ຄົບຮອບ 45 ປີ.
ສະມາຄົມນັກຂ່າວຫວຽດນາມ ນະຄອນຮາຍຟອງ ແມ່ນອົງການ ການເມືອງທາງສັງຄົມທີ່ເຄື່ອນໄຫວດ້ານສື່ມວນຊົນ ເຊິ່ງມີມາແຕ່ປີ 1930. ຍ້ອນປັດໄຈ ແລະ ເງື່ອນໄຂເຫັນວ່າມີຄວາມຫຍຸ້ງຍາກ ມາຮອດວັນທີ 13 ມີນາ 1986 ທາງນະຄອນຮາຍຟອງ ກໍໄດ້ອອກໃບອະນຸຍາດສ້າງຕັ້ງ ສະມາຄົມນັກຂ່າວຂຶ້ນ, ການເຄື່ອນໄຫວຂອງສະມາຄົມດັ່ງກ່າວ ແມ່ນຢູ່ພາຍໃຕ້ການຊີ້ນຳຂອງອົງຄະນະພັກ ເຄື່ອນໄຫວຕາມພາລະບົດບາດ ລະບຽບການ ແລະ ກົດໝາຍສື່ມວນຊົນ.
ສະມາຄົມນັກຂ່າວ ນະຄອນຮາຍຟອງ ມີສະມາຊິກເຄື່ອນໄຫວວຽກງານທັງໝົດ 493 ຄົນ ແລະ ມີ 4 ສາຂາສະມາຄົມທີ່ຂື້ນກັບ. ນອກຈາກນີ້ ຍັງມີສຳນັກງານຕາງໜ້າໜັງສືພິມຕ່າງໆ 46 ແຫ່ງ ແລະ ມີນັກຂ່າວເຄື່ອນໄຫວທັງໝົດ 800 ຄົນ.
ໃນວັນດຽວກັນ ປະທານສະມາຄົມນັກຂ່າວແຫ່ງສປປ ລາວ ພ້ອມຄະນະ ກໍໄດ້ເດີນທາງໄປຢ້ຽມ ຢາມຄະນະປົກຄອງ ນະຄອນຮາຍຟອງ ໂດຍໄດ້ຮັບການຕ້ອນຮັບອັນອົບອຸ່ນຂອງທ່ານ ຮວງ ວັນເກືອງ ຮອງປະທານຄະນະກຳມະການປະຊາຊົນ ນະຄອນຮາຍຟອງ.
ກ່ອນອື່ນທ່ານ ໄດ້ສະແດງຄວາມຊົມເຊີຍ ເປັນກຽດຢ່າງສູງທີ່ໄດ້ຕ້ອນຮັບ ຄະນະຜູ້ແທນສະມາຄົມນັກຂ່າວແຫ່ງສປປ ລາວ ແລະ ລາຍງານບາງບັນສຳຄັນທີ່ທັງສອງຝ່າຍມີຄວາມສົນໃຈຮ່ວມກັນໃຫ້ກັນຊາບ, ທັງນີ້ກໍເພື່ອເປັນການເພີ່ມທະວີຮັດແໜ້ນສາຍພົວພັນມິດຕະພາບ ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ, ລາວ-ຫວຽດນາມ ໃຫ້ແໜ້ນແຟ້ນຍິ່ງໆຂື້ນ.
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
