ທ່ານ ແຕງອ່ອນ ຈັນທະລະນອງ ຮອງເຈົ້າເມືອງໆນອງ ທັງເປັນຄະນະປະທານກຳມະການຄຸ້ມຄອງສິນເຊື່ອຂັ້ນເມືອງ ພ້ອມດ້ວຍ ທ່ານ ທິບພະກອນ ສູນດາລາ ຫົວໜ້າທະນາຄານນະໂຍບາຍສາຂາສະຫວັນນະເຂດ ແລະ ທ່ານ ພະນາວັນ ຈູມມະນີລາດ ຮອງຫົວໜ້າສາຂາທະນາຄານ ແຫ່ງ ສປປ ລາວ ປະຈຳພາກກາງແຂວງສະຫວັນນະເຂດ ສົມທົບກັບພາກສ່ວນກ່ຽວຂ້ອງຂັ້ນແຂວງ ແລະ ເມືອງ ໄດ້ລົງເຄື່ອນໄຫວຢ້ຽມຢາມຄອບຄົວຕົວແບບການລ້ຽງງົວ ແລະ ແບ້ ທີ່ນຳໃຊ້ເງິນກູ້ຂອງທະນາຄານນະໂຍບາຍ ຢູ່ທີ່ບ້ານຕັງອາໄລໃຕ້ ແລະ ບ້ານທ່າເທ ເມືອງນອງ ໃນຫວ່າງບໍ່ດົນມານີ້.
ທ່ານ ທະວີສິນ ທານາດາບຸດ ວ່າການຫົວໜ້າທະນາຄານນະໂຍບາຍໜ່ວຍບໍລິການເມືອງນອງ ກໍໄດ້ຂຶ້ນລາຍງານບົດສະຫຼຸບການຈັດຕັ້ງປະຕິບັດວຽກງານໃນ 7 ເດືອນຜ່ານມາ ຊຶ່ງໃຫ້ຮູ້ວ່າ: ປັດຈຸບັນ ຍອດສິນເຊື່ອຮອດທ້າຍເດືອນ 7 ປີ 2022 ມີທັງໝົດ 18.506 ຕື້ກວ່າກີບ, ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 2,3% ໃນນັ້ນ ຈຳນວນຄອບຄົວທີ່ກູ້ຢືມໃນທຶນໄລຍະສັ້ນ ຈຳນວນ 16,6 ລ້ານກີບ ມີ 5 ຄອບຄົວ, ທຶນໄລຍະກາງມູນຄ່າ 4.492 ຕື້ກີບ ມີ 419 ຄອບຄົວ, ທຶນໄລຍະຍາວ ເກືອບ 14 ຕື້ກີບ ມີ 1.238 ຄອບຄົວ, ສຳລັບແຜນການປ່ອຍເງິນກູ້ໃນປີ 2022 ນີ້ ມີທັງໝົດ 3.149 ຕື້ກີບ ຊຶ່ງມີ 5 ເປົ້າໝາຍຄື: ລ້ຽງງົວ 2.454 ຕື້ກີບ, ລ້ຽງແບ້ 60 ລ້ານກີບ, ຊື້ລົດໄຖນາໃຫຍ່ 300 ລ້ານກີບ, ລ້ຽງງົວບຸກຄົນ 60 ລ້ານກີບ, ປັດຈຸບັນ ປະຕິບັດໄດ້ແລ້ວ 2.874 ຕື້ກີບ ເທົ່າກັບ 91,26% ຂອງແຜນການປີ.
ໂອກາດນີ້, ທາງຄະນະນຳຂອງທະນາຄານ ແລະ ການນຳຂອງເມືອງ ກໍໄດ້ລົງຢ້ຽມຢາມເບິ່ງສະພາບຕົວຈິງຂອງຄອບຄົວເປົ້າໝາຍລ້ຽງງົວ ແລະ ລ້ຽງແບ້ຂອງບ້ານຕັງອາໄລໃຕ້ ແລະ ບ້ານທ່າເທ ຊຶ່ງຈາກການລາຍງານຂອງວິຊາການໜ່ວຍບໍລິການທະນາຄານນະໂຍບາຍເມືອງນອງ ກ່ຽວກັບການຈັດ ຕັ້ງປະຕິບັດກຸ່ມຄອບຄົວຕົວແບບໃນການນຳໃຊ້ເງິນກູ້ຢືມຈາກທະນາຄານຂອງເມືອງນອງ ໃນ 2 ບ້ານດັ່ງກ່າວ ໃນນີ້ ມີຄອບຄົວທ່ານ ອາລິ່ວ ນາຍບ້ານຕັງອາໄລໃຕ້ ຊຶ່ງໄດ້ກູ້ຢືມເງິນຄັ້ງທີ 1 ແຕ່ປີ 2012-2017 ໃນຈຳນວນ 10 ລ້ານກີບ ນຳໃຊ້ເຂົ້າໃນການປູກຢາງໂບງ, ຄັ້ງທີ 2 ກູ້ຢືມໃນວົງເງິນ 30 ລ້ານກີບ ເພື່ອນຳໃຊ້ເຂົ້າໃນເປົ້າໝາຍລ້ຽງງົວ ມາຮອດປັດຈຸບັນ ຄອບຄົວທ່ານ ອາລິ່ວ ມີງົວຈຳນວນທັງໝົດ 52 ໂຕ, ແບ້ 15 ໂຕ, ລວມລາຍຮັບໃນຄອບຄົວຈາກການຂາຍງົວແມ່ນ 123 ລ້ານກີບຕໍ່ປີ ແລະຄອບຄົວທ່ານ ອາໄລ ບ້ານທ່ານເທ ໄດ້ກູ້ຢືມເງິນທະນາຄານຄັ້ງທີ 1 ແມ່ນ 15 ລ້ານກີບ ເພື່ອນຳໃຊ້ເຂົ້າໃນການປູກຢາງໂບງ, ຄັ້ງທີ 2 ໃນປີ 2021 ຈຳນວນເງິນກູ້ຢືມ 30 ລ້ານກີບ ເປົ້າໝາຍລ້ຽງແບ້ ປັດຈຸບັນ ພາຍໃນຄອບຄົວມີແບ້ທັງໝົດ 60 ໂຕ, ໝູ 60 ໂຕ, ງົວ 30 ໂຕ, ຄວາຍ 3 ໂຕ, ລວມລາຍຮັບໃນຄອບຄົວຈາກການຂາຍແບ້ 24 ລ້ານກີບຕໍ່ປີ ເຮັດໃຫ້ທັງສອງຄອບຄົວມີລາຍຮັບເພີ່ມຂຶ້ນຈາກການລ້ຽງສັດຂາຍເປັນສິນຄ້າ ແລະ ມີຊີວິດການເປັນຢູ່ດີຂຶ້ນເປັນກ້າວໆ.
ພ້ອມນີ້, ຍັງໄດ້ມີການຈັດກອງປະຊຸມປຶກສາກຫາລື ເພື່ອແລກປ່ຽນຄຳຄິດຄຳເຫັນໃນຫຼາຍບັນຫາສຳຄັນຕ່າງໆ ໂດຍສະເພາະແມ່ນກ່ຽວກັບການນຳໃຊ້ເງິນກູ້ຢືມຈາກທະນາຄານນະໂຍບາຍ ແນໃສ່ເພື່ອເຮັດໃຫ້ການນຳໃຊ້ເງິນດັ່ງກ່າວ ມີປະສິດທິພາບ ແລະ ປະສິດທິຜົນສູງ ຖືກຕ້ອງຕາມເປົ້າໝາຍ ແລະລະບຽບການ.
#Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)
