ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ເນື່ອງຈາກສະພາບຝົນຕົກລິນຢ່າງຕໍ່ເນື່ອງ ເຮັດໃຫ້ຫລາຍທ້ອງຖິ່ນພາຍໃນແຂວງຫລວງພະບາງ ໄດ້ຮັບຜົນກະທົບຈາກນ້ຳຖ້ວມ, ດີນເຈື່ອນ ແລະ ອື່ນໆ. ຫລ້າສຸດມີການລາຍງານສະພາບດິນ ແລະ ຫີນເຈື່ອນຕັນທາງ ເຂດຜາລາຍເມືອງປາກອູ ເຮັດໃຫ້ການສັນຈອນຕິດຂັດ.
ທ່ານ ແກ່ນຄຳ ຄຳພັນ ເຈົ້າເມືອງປາກອູ ໄດ້ໃຫ້ສຳພາດວ່າ: ປັດຈຸບັນ, ໄດ້ມອບໃຫ້ຂະແໜງການກ່ຽວຂ້ອງຂອງເມືອງ ລົງກວດກາສະພາບຈຸດເກີດເຫດ ເຫັນວ່າມີດິນ ແລະ ຫີນເຈື່ອນຕັນທາງ 2-3 ຈຸດ ຈາກນັ້ນໄດ້ປະສານສົມທົບກັບບໍລິສັດ ຮັບຜິດຊອບແກ້ໄຂໄພພິບັດເລັ່ງແກ້ໄຂ ເພື່ອເຮັດໃຫ້ການສັນຈອນໄດ້ເປັນປົກກະຕິ.
ທ່ານເຈົ້າເມືອງປາກອູ ຍັງໃຫ້ຮູ້ຕື່ມວ່າ: ນັບແຕ່ເກີດມີສະພາບຝົນຕົກ ເຮັດໃຫ້ປະຊາຊົນບາງບ້ານຂອງເມືອງປາກອູ ໄດ້ຮັບຜົນກະທົບຈາກນ້ຳປ່າໄຫລສຸ ແລະ ນ້ຳຖ້ວມ-ດີນເຈື່ອນຈຳນວນໜຶ່ງ, ປັດຈຸບັນ ຄະນະນຳຂອງເມືອງໄດ້ຊີ້ນຳໃຫ້ຂະແໜງການກ່ຽວຂ້ອງ ປະສານສົມທົບກັບອົງການປົກຄອງບ້ານ ເພື່ອເຝົ້າລະວັງຢ່າງໃກ້ຊິດ ແລະ ກໍາລັງເລັ່ງແກ້ໄຂສະພາບການທີ່ເກີດຂຶ້ນໃນເບື້ອງຕົ້ນ ທັງໄດ້ເກັບກຳຂໍ້ມູນຜົນເສຍຫາຍຕົວຈິງ ເພື່ອວາງແຜນການແກ້ໄຂໃນຂັ້ນຕໍ່ໄປ.
#Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)
