ໃນໄລຍະມີການແຜ່ລະບາດຂອງພະຍາດໂຄວິດ – 19, ຂະແໜງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ (ຖວທ) ແຂວງບໍລິຄຳໄຊ ໃນຖານະທີ່ເປັນກະບອກສຽງອັນແຫຼມຄົມຂອງພັກ-ລັດ ໄດ້ເອົາໃຈໃສ່ ປະກອບສ່ວນຢ່າງຕັ້ງໜ້າເຂົ້າໃນການໂຄສະນາປະຊາສຳພັນຕອບຕ້ານ, ສະກັດກັ້ນ ແລະ ປ້ອງກັນການລະບາດຂອງພະຍາດໂຄວິດ-19 ຕາມໜ້າທີ່ຄວາມຮັບຜິດຊອບຂອງຕົນ ໄດ້ເປັນຢ່າງດີ ແລະ ມີຜົນງານຫຼາຍດ້ານໂດຍສະເພາະແມ່ນການນຳເອົາບັນດານິຕິກຳຂອງຂັ້ນເທິງວາງອອກໃນແຕ່ລະໄລຍະມາຜັນຂະຫຍາຍ ແລະ ໂຄສະນາປະຊາສຳພັນໃຫ້ສັງຄົມຮັບຮູ້ຢ່າງກວ້າງຂວາງ ແລະ ລົງສູ່ຮາກຖານບ້ານ ເພື່ອແນໃສ່ເຮັດໃຫ້ທຸກຄົນໃນສັງຄົມຮັບຮູ້ ແລະ ເຂົ້າໃຈແຈ້ງຕໍ່ຜົນຮ້າຍຂອງພະຍາດໂຄວິດ-19.
ທ່ານ ສົນທອງ ວີບຸນກວ້າງ ຫົວໜ້າພະແນກ ຖວທ ແຂວງບໍລິຄຳໄຊ ໃຫ້ສຳພາດວ່າ: ໃນໄລຍະຜ່ານມາຂະແໜງ ຖວທ ແຂວງ ໄດ້ເພີ່ມທະວີໂຄສະນາເຜີຍແຜ່ ຜ່ານສື່ມວນຊົນດ້ວຍຫຼາຍຮູບ ຫຼາຍສີ ຫຼາຍວີທີ ແລະ ແຂງແຮງຕໍ່ເນື່ອງ ຜ່ານສື່ຂອງແຂວງ, ເມືອງ ເຊັ່ນ: ວິທະຍຸ-ໂທລະພາບ, ໜັງສືພິມ, ເວັບໄຊ, ເຟສບຸກ, ໂທລະໂຄ່ງຢູ່ແຕ່ລະບ້ານ ຜະລິດລາຍການ, ການສຳພາດເປົ້າໝາຍຕ່າງໆ, ຄະນະຮັບຜິດຊອບທີ່ກ່ຽວຂ້ອງ ແລະ ພາກສ່ວນຕ່າງໆ ໃນສັງຄົມຢ່າງກວ້າງຂວາງ, ໂຄສະນາອະທິບາຍ ຊີ້ແຈງ ແລະ ຕອບຕ້ານຂ່າວປອມ, ຂ່າວລວງໄດ້ຢ່າງທັນການ. ໄດ້ຖ່າຍທອດສຽງຈາກສະຖານີວິທະຍຸ-ໂທລະພາບແຫ່ງຊາດເປັນປົກກະຕິ, ພິເສດສະຖານີວິທະຍຸແຂວງໄດ້ຈັດລາຍການສະເພາະ ເພື່ອອອກອາກາດ ໃນລາຍການບໍລິຄຳໄຊຮ່ວມໃຈຕ້ານໂຄວິດ-19 ທຸກໆວັນ ອອກທາງວິທະຍຸກະຈາຍສຽງແຂວງບໍລິຄຳໄຊ, ສ້າງສະປອດໂຄສະນາເປັນພາສາລາວ, ກຶມມຸ, ມົ້ງ ອອກອາກາດໃນລາຍການ ແລະ ອັບລົງເຟສບຸກຂອງສະຖານີວິທະຍຸກະສຽງແຂວງບໍລິຄຳໄຊ ແລະ ສົ່ງໃຫ້ ຫ້ອງການ ຖວທ ເມືອງ 7 ເມືອງ ແລະ ບ້ານ. ພ້ອມນັ້ນ ຍັງໄດ້ມີການນຳໃຊ້ລົດຂະຫຍາຍສຽງອອກໂຄສະນາປະຊາສຳພັນຮ່ວມກັບພາກສ່ວນທີ່ກ່ຽວຂ້ອງຢູ່ແຕ່ລະຈຸດທີ່ສຳຄັນຕື່ມອີກ, ສ່ວນໜ່ວຍງານໜັງສືພິມ ກໍໄດ້ເຄື່ອນໄຫວເຮັດໜ້າທີ່ໂຄສະນາເຜີຍແຜ່ຂໍ້ມູນຂ່າວສານທາງດ້ານສື່ສິ່ງພິມ ກໍຄື ໜັງສືພິມບໍລິຄຳໄຊ ໃນການຈັດຕັ້ງປະຕິບັດວຽກງານປ້ອງກັນ, ຄວບຄຸມ ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ແຕ່ໄລຍະທີ່ມີການລະບາດຈົນເຖິງປັດຈຸບັນ, ວຽກງານເວັບໄຊ ແລະ ສຳເນົາຟີມ: ໄດ້ເກັບກຳຂ່າວການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ບັນດາສະຖານທີ່ຕ່າງເພື່ອອັບໂຫຼດລົງທາງເວັບໄຊເປັນປະຈຳ.
ຫົວໜ້າພະແນກ ຖວທ ແຂວງບໍລິຄຳໄຊ ໃຫ້ຮູ້ຕື່ມວ່າ: ຢ່າງໃດກໍຕາມ, ເຖິງຈະມີການໂຄສະນາ ແລະ ເຜີຍເອກະສານໃນການປ້ອງກັນ ຕ້ານ ແລະ ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໃນຂົງເຂດ ຖວທ ແຂວງ ຫຼາຍເທົ່າໃດກໍຍັງມີຂ່າວປອມມາເຮັດໃຫ້ການໂຄສະນາຊວນເຊື້ອບິດເບືື່ອນໄປຈາກຄວາມເປັນຈິງ. ການໂຄສະນາຍັງບໍ່ທັນເຂົ້າເຖິງປະຊາຊົນຈຳນວນໜຶ່ງຍ້ອນເຂົາເຈົ້າຍັງດຳລົງຊີວິດຕິດພັນກັບທຳມະຊາດ.
ສຳລັບມາດຕະການຈັດຕັ້ງປະຕິບັດໃນຕໍ່ໜ້າເພື່ອເຮັດວຽກງານປ້ອງກັນ, ຄວບຄຸມ ສະກັດກັ້ນ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19 ໃນຂົງເຂດ ຖວທ ແຂວງບໍລິຄໍາໄຊ ໄດ້ຮັບຜົນສໍາເລັດ ແລະ ໄປຕາມແຜນການທີ່ວາງໄວ້ຈະໄດ້ສືບຕໍ່ປະຕິບັດໂດຍມອບໃຫ້ບັນດາຂະແໜງການ, ສື່ມວນຊົນ 3 ສື່ຂອງແຂວງ ນໍາເອົາເນື້ອໃນແຈ້ງການແນະນໍາໄປຜັນຂະຫຍາຍອອກສູ່ວຽກງານຕົວຈິງຢ່າງລະອຽດ ກວ້າງຂວາງ ດ້ວຍການແບ່ງຄວາມຮັບຜິດຊອບໃຫ້ບຸກຄົນຢ່າງລະອຽດ ພ້ອມທັງລາຍງານໃຫ້ຂັ້ນເທິງຮັບຊາບໃນແຕ່ລະໄລຍະ, ເພີ່ມທະວີດ້ວຍການໂຄສະນາປະຊາສຳພັນໃຫ້ປະຊາຊົນຮັບຮູ້ເຖິງຜົນຮ້າຍຂອງພະຍາດໂຄວິດ-19, ປະຕິບັດມາດຕະການປ້ອງກັນ ຕ້ານ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ-19 ໃຫ້ສັງຄົມຮັບຮູ້ຢ່າງທົ່ວເຖິງ, ໂຄສະນາປະຊາສຳພັນ ຫຼາຍຮູບແບບເພື່ອເຊີນຊວນປະຊາຊົນທົ່ວແຂວງໃຫ້ອອກໄປຮັບການສັກວັນຊິນຕາມແຈ້ງການຂອງພະແນກສາທາລະນະສຸກໃນແຕ່ລະໄລຍະ.
ຂ່າວ-ພາບ ບຸນອູ້ມ
