ແຫລ່ງຂ່າວຈາກ ແຂວງຈຳປາສັກ ໃຫ້ຮູ້ວ່າ: ໃນວັນທີ 2 ກໍລະກົດ ຜ່ານມາ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສະຫະກໍາ ແລະ ການຄ້າ ພ້ອມຄະນະໄດ້ລົງຊຸກຍູ້ວຽກງານຢູ່ແຂວງຈຳປາສັກ ແລະ ໄດ້ພົບປະໂອລົມ ພະນັກງານການນຳຫລັກແຫລ່ງຂອງພະແນກອຸດສະຫະກຳ ແລະ ການຄ້າແຂວງ ໂດຍມີ ທ່ານ ບຸນຍະເດດ ທອງສະຫວັນ ຫົວໜ້າ ພະແນກ ອຸດສະຫະກຳ ແລະ ການຄ້າແຂວງ ພ້ອມດ້ວຍຄະນະເຂົ້າຮ່ວມ.
ການພົບປະໂອ້ລົມຄັ້ງນີ້, ທ່ານ ມະໄລທອງ ກົມະສິດ ໄດ້ກ່າວວ່າ: ການມາພົບປະໂອ້ລົມຄັ້ງນີ້ ກໍເພື່ອ ເປັນການມາຢ້ຽມຢາມ ແລະ ຕິດຕາມ ຊຸກຍູ້ສະພາບ ການຈັດຕັ້ງປະ ຕິບັດວຽກງານ ເປັນຕົ້ນ ບັນຫາການຄຸ້ມຄອງລາຄານ້ຳມັນ ແລະ ລາຄາສິນຄ້າທີ່ກະທົບຕໍ່ສະພາບການພັດທະນາເສດຖະກິດ-ສັງຄົມ, ກະທົບຕໍ່ຊິວິດການເປັນຢູ່ຂອງພໍ່ແມ່ປະຊາຊົນ.ພ້ອມນີ້, ທ່ານຍັງໄດ້ຮຽກຮ້ອງໃຫ້ທຸກພາກສ່ວນ ໄດ້ສືບຕໍ່ຕິດຕາມກວດກາຢ່າງໃກ້ຊິດ ໂດຍສະເພາະບັນຫາການສວຍໂອກາດໃນໄລຍະຂອງການວິກິດ, ສະພາບ ເສດຖະກິດ ທີ່ກະທົບຈາກລາຄານ້ຳມັນ ມີການປ່ຽນແປງໃນຕະຫລາດໂລກ ແລະ ບັນຫາ ການຂາດແຄນເງິນຕາ ໂດຍທ່ານໄດ້ຊີ້ນຳໃຫ້ພະແນກອຸດສາຫະກຳ ແລະ ການຄ້າແຂວງຈໍາປາສັກ ເອົາ ໃຈໃສ່ເປັນພິເສດຕໍ່ບັນຫາດັ່ງກ່າວ.
ໃນໂອກາດນີ້, ທ່ານ ມະໄລທອງ ກົມະສິດ ຍັງໄດ້ຮັບຟັງການລາຍງານບັນຫາ ແລະ ຄຳສະເໜີຂອງ ພະແນກອຸດສະຫະກຳ ແລະ ການຄ້າແຂວງຈຳປາສັກ ເພື່ອນຳໄປປັບປຸງແກ້ໄຂໃນຂັ້ນກະຊວງ ເພື່ອເຮັດໃຫ້ການຈັດຕັ້ງປະຕິບັດວຽກງານ ໃຫ້ມີຄວາມສອດ ຄ່ອງ ແລະ ຮັບປະກັນຜົນສຳເລັດສູງໃນຕໍ່ໜ້າ.
ຂ່າວ: ດວງໃຈ
