ເພື່ອເປັນການຄັດເລືອກເອົານັກຮຽນເກັ່ງ ໃນແຕ່ລະວິຊາຂອງແຕ່ລະຊັ້ນຮຽນ ໃນທົ່ວເມືອງ ເພື່ອເປັນຕົວແທນຂັ້ນເມືອງ ໄປສອບເສັງນັກຮຽນເກັ່ງຢູ່ຂັ້ນແຂວງ ທີ່ຈະໄດ້ມີຂຶ້ນໃນຕໍ່ໜ້ານີ້. ດັ່ງນັ້ນ, ມາໃນຕອນເຊົ້າຂອງວັນທີວັນທີ 16 ທັນວາ 2022 ຜ່ານມານີ້ ຢູ່ທີ່ສະໂມສອນໃຫຍ່ຂອງເມືອງ ທາງຫ້ອງການສຶກສາທິການ ແລະ ກິລາ ເມືອງວິລະບູລີ ແຂວງສະຫວັນນະເຂດຈຶ່ງໄດ້ຈັດພິທີສອບເສັງຄັດເລືອກເອົານັກຮຽນເກັ່ງ ປະຈໍາສົກຮຽນ 2022-2023 ຂອງແຕ່ລະຊັ້ນຮຽນຄື : ຊັ້ນປະຖົມ ປໍ 5 , ຊັ້ນມັດທະຍົມຕົ້ນ ມໍ 4 ແລະ ຊັ້ນມັດທະຍົມຕອນປາຍ ມໍ 7 ໂດຍການເປັນປະທານ ແລະ ເປີດຫົວບົດການສອບເສັງ ຂອງທ່ານນາງ ທູນທະລາ ໄຊຍະສານ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງ, ມີທ່ານ ວິຣະພອນ ວິຣະຈິດ ຕາງໜ້າຈາກບໍລິສັດ ລ້ານຊ້າງມີເນໂຣນສ໌ ລິມິເຕັດ, ມີຄະນະຫ້ອງການສຶກສາທິການ ແລະກິລາເມືອງ, ບັນດາທ່ານຄະນະກໍາມະການສອບເສັງນັກຮຽນເກັ່ງຂັ້ນເມືອງ ພ້ອມດ້ວຍຄູ-ອາຈານ ແລະ ນ້ອງນັກຮຽນທີ່ເຂົ້າຮ່ວມສອບເສັງ ເຂົ້າຮ່ວມຢ່າງພ້ອມພຽງ.
ສໍາລັບການສອບເສັງນັກຮຽນເກັ່ງທົ່ວເມືອງວິລະບູລີ ໃນປີນີ້ ແມ່ນມີຈໍານວນ 1 ສູນສອບເສັງ, ເຊິ່ງມີນ້ອງນັກຮຽນເຂົ້າສອບເສັງທັງໝົດ ຈໍານວນ 93 ນ້ອງ ຍິງ 59 ນ້ອງ, ໃນນັ້ນ ຊັ້ນປະຖົມ ປໍ 5 ມີ 35 ນ້ອງ ຍິງ 25 ນ້ອງ ທີ່ມາຈາກ 13 ກຸ່ມໂຮງຮຽນ ສອບເສັງໃນ 3 ວິຊາຫຼັກຄື : ວິຊາພາສາລາວ, ວິຊາຄະນິດສາດ ແລະວິຊາໂລກອ້ອມຕົວ, ສ່ວນຊັ້ນມັດທະຍົມຕອນຕົ້ນ ມໍ 4 ມີນ້ອງນັກຮຽນເຂົ້າສອບເສັງ 38 ນ້ອງ ຍິງ 24 ນ້ອງ ຈາກ 11 ໂຮງຮຽນ ແລະຊັ້ນມັດທະຍົມຕອນປາຍ ມໍ 7 ມີນ້ອງນັກຮຽນເຂົ້າຮ່ວມສອບເສັງ ທັງໝົດ 20 ນ້ອງ ຍິງ 10 ນ້ອງ ມາຈາກ 5 ໂຮງຮຽນ ສອບເສັງໃນ 4 ວິຊາຫຼັກ ຄື : ວິຊາ ພາສາລາວ-ວັນນະຄະດີ, ວິຊາ ຄະນິດສາດ, ວິຊາເຄມີສາດ ແລະວິຊາ ຟີສິກສາດ. ເຊິ່ງຜ່ານການສອບເສັງຕົວຈິງ ແມ່ນສາມາດສະຫຼຸບໄດ້ດັ່ງນີ້ : ສໍາລັບຊັ້ນປະຖົມ ປໍ 5 ຜູ້ທີ່ເສັງໄດ້ອັນດັບທີ 1 ວິຊາພາສາລາວ ແມ່ນນາງ ສຸວິນສາ ຈັນສະໝອນ ຈາກໂຮງຮຽນປະຖົມເມືອງຫຼວງ, ວິຊາ ຄະນິດສາດ ແມ່ນນາງ ຟ້າໃສ ເພັດສະຫຼາດ ຈາກໂຮງຮຽນປະຖົມເມືອງຫຼວງ ແລະ ວິຊາໂລກອ້ອມຕົວ ແມ່ນນາງ ບານໃຈ ແພງທະມີ ຈາກໂຮງຮຽນປະຖົມນາຊຽງແລ, ຊັ້ນມັດທະຍົມຕົ້ນ ມໍ 4 ຜູ້ທີ່ເສັງໄດ້ອັນດັບທີ 1 ວິຊາພາສາລາວ-ວັນນະຄະດີ ນາງ ສົງປະສັງ ທໍາມະລັງສີ ຈາກໂຮງຮຽນ ມສ ພູຄໍາ, ວິຊາຄະນິດສາດ ແມ່ນທ້າວ ພຸດວິໄລ ສາຍປະສານ ຈາກໂຮງຮຽນ ມສ ພູຄໍາ, ວິຊາເຄມີສາດ ທ້າວ ສາຍສະໝອນ ຈາກໂຮງຮຽນທາງແບ່ງແກ້ງຫຼວງ ແລະ ວິຊາ ຟີຊິກສາດ ແມ່ນນາງ ສັນທະນາ ພະໄຊສົມບັດ ຈາກໂຮງຮຽນ ມສ ພູຄໍາ ແລະ ສໍາລັບຊັ້ນ ມໍ 7 ຜູ້ທີ່ເສັງໄດ້ອັນດັບທີ 1 ວິຊາພາສາລາວ-ວັນນະຄະດີ ນາງ ລີຊາ ອິນທິລາດ ຈາກໂຮງຮຽນ ມສ ພູຄໍາ, ວິຊາ ຄະນິດສາດ ແມ່ນທ້າວ ຄໍາພອນ ມາຜາງວົງ ຈາກໂຮງຮຽນ ມສ ນໍ້າມະຮີ, ວິຊາເຄມີສາດ ທ້າວ ບຸນປະສົງ ຊ້ອນທິລາ ຈາກໂຮງຮຽນ ມສ ເມືອງວັງ ແລະ ວິຊາຟີຊິກສາດ ແມ່ນທ້າວ ກາແວງ ຈາກໂຮງຮຽນ ມສ ໂພນສະຫວາງ; ພ້ອມນັ້ນ ໃນພິທີໃນຄັ້ງນີ້ ກໍ່ຍັງໄດ້ມີການມອບທຶນການສຶກສາ ໃຫ້ແກ່ນ້ອງນັກຮຽນ ທີ່ສອບເສັງໄດ້ຄະແນນດີອັນດັບທີ 1 ຫາ ທີ 3 ໃນແຕ່ລະວິຊາ ຂອງແຕ່ລະຊັ້ນຮຽນ ເຊິ່ງຜູ້ທີ່ໄດ້ອັນດັບທີ 1 ຈະໄດ້ຮັບເງິນສົດ 2 ລ້ານກີບ, ອັນດັບທີ 2 ໄດ້ຮັບເງິນສົດ 1 ລ້ານກີບ ແລະ ອັນດັບທີ 3 ໄດ້ຮັບເງິນສົດ 5 ແສນກີບ ໂດຍໄດ້ຮັບການສະໜັບສະໜູນດ້ານງົບປະມານ ຈາກບໍລິສັດ ລ້ານຊ້າງມີເນໂຣນສ໌ ລິມິເຕັດ ເປັນຜູ້ສະໜອງໃຫ້ ໃນມູນຄ່າ 5 ພັນໂດລາສະຫະລັດ.
