ເມື່ອວັນທີ 7 ທັນວາ 2022 ນີ້ແຂວງ ອັດຕະປື ໄດ້ຈັດພິທີ ມອບ-ຮັບ ເຮືອນຢູ່ຖາວອນ ຈໍານວນ 700 ຫຼັງ,ໃຫ້ປະຊາຊົນທີ່ປະສົບໄພພິບັດຢູ່ເມືອງ ສະໜາມໄຊ,ພິທີຈັດຂື້ນທີ່ບ້ານດົງບາກໃໝ່ຫີນຄໍາ,ໂດຍເປັນກຽດເຂົ້າຮ່ວມຂອງທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ,ມີທ່ານ ເລັດ ໄຊຍະພອນ ກໍາມະການສູນກາງພັກ ເລຂາພັກແຂວງ ເຈົ້າແຂວງອັດຕະປື,ພ້ອມດ້ວຍການນໍາຈາກສູນກາງແລະທ້ອງຖິ່ນ,ຕະຫຼອດຮອດພໍ່ແມ່ປະຊາຊົນເຂົ້າຮ່ວມ.
ຄືດັ່ງຮູ້ນຳກັນແລ້ວວ່າເຫດການສັນເຂື່ອນໄຟຟ້າເຊ ປຽນ-ເຊນໍ້ານ້ອຍແຕກ ຄັ້ງວັນທີ 23 ກໍລະກົດປີ 2018 ແມ່ນເຫດການຮ້າຍແຮງທີ່ສຸດ ຊຶ່ງພັກ- ລັດຖະບານ ໄດ້ຈັດເຫດການໃນຄັ້ງນັ້ນເປັນເຫດການລະດັບຊາດ ຊຶ່ງບໍ່ເຄີຍ ມີມາກ່ອນ, ມາຮອດມື້ນີ້ ວັນທີ 7 ທັນວາປີ 2022 ຊຶ່ງເປັນວາລະຄົບຮອບ 4 ປີເຕັມພໍດີ,ໃນຕະຫຼອດໄລຍະ 4 ປີ ທີ່ຜ່ານມາສູນກາງ ພັກ-ລັດຖະບານ, ອົງການປົກຄອງທ້ອງຖິ່ນ ຂອງແຂວງ, ເມືອງ ສຸດທີ່ມີຄວາມເປັນຫ່ວງເປັນໄຍ ເຫັນອົກເຫັນໃຈພໍ່ແມ່ປະຊາຊົນ ແລະ ໄດ້ຮ່ວມກັບບໍລິສັດພັດທະນາໂຄງການ SK&PNPC ໄດ້ມີຄວາມພະຍາຍາມຢ່າງສຸດຂີດ ເພື່ອຊ່ວຍເຫຼຶອເບິ່ງແຍງຊີວິດການເປັນຢູ່ຂອງປະຊາຊົນຜູ້ປະສົບໄພ.
ໂຄງການກໍ່ສ້າງເຮືອນ 700 ຫຼັງ,ມູນຄ່າທັງໝົດ 24,5 ລ້ານໂດລາສະຫະລັດ ດ້ວຍທຶນຊົດເຊີຍຂອງບໍລິສັດ SK&PNPC ມີ 4 ປະເພດເຮຶອນຄື: ເຮຶອນວິນລາ 80 ຫຼັງ,ເຮືອນກໍ່ 2 ຊັ້ນ 4 ຫຼັງ, ເຮືອນກໍ່ 2 ຊັ້ນປູແປ້ນ 278 ຫຼັງ,ເຮືອນມີກ້ອງລ່າງ 338 ຫຼັງ,ຈັດສັນເຂົ້າໃນ 4 ບ້ານຄື: ບ້ານດົງບາກໃໝ່ຫີນຄໍາ ມີທັງໝົດ 335 ຫຼັງ, ບ້ານຫີນລາດມີທັງໝົດ 197 ຫຼັງ, ບ້ານດອນບົກໃໝ່ແສງຈັນ ມີທັງໝົດ 70 ຫຼັງ,ບ້ານສະໝອງໃໝ່ປີນດົງມີທັງໝົດ 98 ຫຼັງ,ເລີ່ມປະຕິບັດການກໍ່ສ້າງແຕ່ວັນທີ 2 ມິຖຸນາ 2020 ເປັນຕົ້ນມາ, ໂດຍແມ່ນບໍລິສັດ ວັນແສງອັດຕະປື ເປັນຜູ້ຮັບເໝົາໂຄງການ ດັ່ງກ່າວ, ຊຶ່ງການປະຕິບັດ ແຕ່ຕົ້ນມາຮອດປະຈຸບັນທັງບໍລິສັດປະຕິບັດສຳເລັດ 100% ແລະ ໄດ້ມອບໃຫ້ປະຊົນເຂົ້າຢູ່ຄຶ: ຄັ້ງທີ 1 ວັນທີ 12 ເມສາ 2021,ມີ 153 ຫຼັງ,ຄັ້ງທີ 2 ວັນທີ 4 ເມສາ 2022,ມີ 352 ຫຼັງ ແລະ ຄັ້ງທີ 3 ແມ່ນວັນທີ 7 ທັນວາ 2022,ມີ 195 ຫຼັງ.ລວມ 3 ຄັ້ງທັງໝົດ 700 ຫຼັງ.
ໂອກາດດັ່ງກ່າວໃນພິທີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຄະນະນໍາຈາກສູນກາງ ແລະ ທ້ອງຖິ່ນ ກໍ່ໄດ້ຮ່ວມກັນລັ່ນຄ້ອງ 9 ບາດ,ຕັດລິບບີ້ນ ແລະ ປ່ອຍປ້າຍປຸມເປົ້າ ເພື່ອເປັນສິລິມຸງຄຸນໃນການມອບ-ຮັບເຮືອນຢູ່ຖາວອນໃຫ້ປະຊາຊົນທີ່ປະສົບໄພພິບັດຢູ່ເມືອງ ສະໜາມໄຊ, ໄດ້ເຂົ້າຢູ່ຢ່າງເປັນທາງການ.
ຂ່າວ: ມະນີວອນ
