ໃນວັນທີ 27 ຕຸລາ ນີ້, ຄະນະຜູ້ແທນຂັ້ນສູງຂອງຄະນະໂຄສະນາອົບຮົມສູນກາງພັກ (ຄອສພ) ສປປ ລາວ ນຳໂດຍ ສະຫາຍ ນາງ ວິລະວອນ ພັນທະວົງ, ຮອງຫົວໜ້າ ຄອສພ, ໄດ້ພົບປະກັບກະຊວງວັດທະນະທຳ, ກິລາ ແລະ ການທ່ອງທ່ຽວ ສສ ຫວຽດນາມ ທີ່ນະຄອນຫຼວງຮ່າໂນ້ຍ. ຝ່າຍຫວຽດນາມນຳໂດຍ ສະຫາຍ ເລ ຮາຍ ບິ່ງ, ຮອງລັດຖະມົນຕີກະຊວງ ເພື່ອທົບທວນການຮ່ວມມື ແລະ ແຜນໃນຕໍ່ໜ້າ
ການພົບປະກັນຄັ້ງນີ້, ສອງຝ່າຍໄດ້ທົບທວນຄືນການຮ່ວມມືດ້ານວຽກງານຖະແຫຼງຂ່າວ-ສື່ມວນຊົນໃນໄລຍະປີ 2021-2025. ພ້ອມກັນນັ້ນ, ກໍໄດ້ປຶກສາຫາລື ແລະ ຄົ້ນຄວ້າແຜນການຮ່ວມມືໃນຕໍ່ໜ້າປີ 2026-2030 ຢ່າງລະອຽດ ເພື່ອໃຫ້ການຈັດຕັ້ງປະຕິບັດມີປະສິດທິພາບສູງຂຶ້ນ.
ຫົວຂໍ້ປຶກສາຫາລືສຳຄັນປະກອບມີ:
* ວຽກງານ ດີຈີຕອນ ທີ່ທັນສະໄໝ.
* ການນຳໃຊ້ AI ເຂົ້າໃນວຽກງານສື່ມວນຊົນ.
* ວຽກງານ ຕອບຕ້ານຂ່າວປອມ.
ຜົນສຳເລັດທີ່ພົ້ນເດັ່ນຂອງການຮ່ວມມື (2021-2025)
ສະຫາຍ ນາງ ວິລະວອນ ພັນທະວົງ ໄດ້ກ່າວເນັ້ນເຖິງຜົນສຳເລັດຂອງການຈັດຕັ້ງປະຕິບັດບົດບັນທຶກຄວາມເຂົ້າໃຈ (MOU) ດ້ານຖະແຫຼງຂ່າວ-ສື່ມວນຊົນ ທີ່ສອງຝ່າຍບັນລຸໄດ້:
* ການແລກປ່ຽນບົດຮຽນ ແລະ ຂໍ້ມູນຂ່າວສານ: ຄະນະນຳສອງຝ່າຍໄດ້ຢ້ຽມຢາມ ແລະ ແລກປ່ຽນບົດຮຽນເຊິ່ງກັນ ແລະ ກັນຢ່າງຕໍ່ເນື່ອງ. ສື່ມວນຊົນລາວໄດ້ນຳເອົາແຫຼ່ງຂໍ້ມູນຂ່າວສານເຫດການສຳຄັນຕ່າງໆໃນພາກພື້ນ ແລະ ສາກົນ ຈາກສື່ມວນຊົນຫວຽດນາມມາໂຄສະນາ.
* ການຊ່ວຍເຫຼືອດ້ານເຕັກນິກ-ອຸປະກອນ: ຫວຽດນາມໄດ້ຊ່ວຍເຫຼືອດ້ານອຸປະກອນ-ເຕັກນິກ, ເປັນຕົ້ນແມ່ນການກໍ່ສ້າງສະຖານີວິທະຍຸ-ໂທລະພາບຢູ່ບັນດາແຂວງຂອງລາວ.
* ການພັດທະນາບຸກຄະລາກອນ: ມີການຈັດຝຶກອົບຮົມໄລຍະສັ້ນທັງຢູ່ຫວຽດນາມ ແລະ ລາວ. ປັດຈຸບັນກໍມີການຝຶກອົບຮົມວຽກງານນຳພາ-ຄຸ້ມຄອງສື່ມວນຊົນໄລຍະສອງເດືອນ ຊຸດທີ 4 ຢູ່ສະຖາບັນສື່ມວນຊົນຫວຽດນາມ.
* ການໂຄສະນາຮ່ວມກັນ: ສື່ມວນຊົນສອງປະເທດໄດ້ໂຄສະນາເຫດການສຳຄັນຂອງພັກ-ຂອງຊາດຢ່າງເປັນລະບົບ, ລວມເຖິງການຢ້ຽມຢາມຂອງການນຳຂັ້ນສູງ ແລະ ການສ່ອງແສງມູນເຊື້ອຄວາມສາມັກຄີພິເສດ ລາວ-ຫວຽດນາມ ເພື່ອໃຫ້ສັງຄົມຮັບຮູ້.
* ການຕອບໂຕ້ຂ່າວບິດເບືອນ: ໄດ້ເອົາໃຈໃສ່ຕອບໂຕ້ທຸກຂ່າວບິດເບືອນແນວທາງນະໂຍບາຍຂອງພັກ-ລັດ ແລະ ການກ່າວໃສ່ຮ້າຍປ້າຍສີຂອງກຸ່ມຄົນບໍ່ດີຢ່າງຕໍ່ເນື່ອງ.
ສຸດທ້າຍນີ້, ສະຫາຍ ນາງ ວິລະວອນ ພັນທະວົງ ໄດ້ສະເໜີໃຫ້ຝ່າຍຫວຽດນາມສືບຕໍ່ຊ່ວຍເຫຼືອທາງດ້ານອຸປະກອນ ແລະ ບຸກຄະລາກອນ ເພື່ອຮັບໃຊ້ການສະເຫຼີມສະຫຼອງ 3 ວັນປະຫວັດສາດຂອງ ສປປ ລາວ ໃນໄວໆນີ້.
————-
ພາບ:ສຳນານ
