ຕາມຂ່າວຈາກວໍຊີງຕັນ, ທ່ານ ໂດນັນ ທຣຳ,ປະທານາທິບໍດີ ສ.ອາເມລິກາ ປະກາດປັບຂຶ້ນພາສີ ທອງແດງ ນຳເຂົ້າ ເປັນ50% ນັບຕັ້ງແຕ່ ວັນທີ 1 ສິງຫານີ້ ເປັນຕົ້ນໄປ ພາຍຫລັງໄດ້ຮັບການປະເມີນດ້ານຄວາມໝັ້ນຄົງແຫ່ງຊາດ ໃນຄວາມຈຳເປັນຕ້ອງໃຊ້ພາສີໃໝ່ກັບທອງແດງ ເພື່ອປ້ອງກັນການຜະລິດທອງແດງ ໃນ ສ.ອາເມລິກາ ແລະ ທອງແດງມີຄວາມສຳຄັນຕໍ່ ອຸດສາຫະກຳຫລາຍຢ່າງເຊັ່ນ: ເຊມິຄອນດັກເຕີ, ເຮືອບິນ, ສູນຂໍ້ມູນໝໍ້ໄຟລີທຽມໄອອອນ (Lithium Ion) ລະບົບປ້ອງກັນປະເທດ ໂດຍເປັນວັດຖຸ ທີ່ກະຊວງປ້ອງກັນປະເທດສະຫະລັດອາເມລິກາ ໃຊ້ຫລາຍເປັນອັນດັບ 2. ຂະນະທີ່ ສ.ອາເມລິກາ ນຳເຂົ້າທອງແດງເກືອບເຄິ່ງໜຶ່ງຂອງການໃຊ້ງານ ຫລັງຈາກມີການນຳເຂົ້າສູງເຖິງ 810.000 ໂຕນ ໃນປີກາຍນີ້.
ດັ່ງນັ້ນ ການຂຶ້ນພາສີຄັ້ງນີ້ຈະເປັນຜົນດີຕໍ່ການຜະລິດທອງແດງ ໃນ ສ.ອາເມລິກາ. ສຳລັບປະເທດທີ່ໄດ້ຮັບຜົນກະທົບຈາກການຂຶ້ນພາສີທອງແດງ ຄັ້ງນີ້ໄດ້ແກ່ຊີເລ,ການາດາ ແລະ ເມັກຊິ ເນື່ອງຈາກເປັນຜູ້ສົ່ງອອກລາຍໃຫຍ່ໄປ ສ.ອາເມລິກາ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
