ວິທະຍຸສາກົນ ແຫ່ງ ສປ ຈີນ, ກອງປະຊຸມ ພົບປະ ລະຫວ່າງ ລັດຖະມົນຕີຕ່າງປະເທດຈີນ-ອາຊີກາງ ຄັ້ງທີ 6 ໄດ້ຈັດຂຶ້ນຢູ່ ນະຄອນ ອານມາຕີ ຂອງກາຊັກສະຖານ. ກອງປະຊຸມຄັ້ງນີ້ເປັນການກະກຽມ ທາງການເມືອງຢ່າງຮອບດ້ານ ໃຫ້ແກ່ກອງປະຊຸມສຸດຍອດຈີນ-ອາຊີກາງ ທີ່ຈະຈັດຂຶ້ນພາຍໃນປີນີ້ ພ້ອມທັງໄດ້ລົງເລິກແລກປ່ຽນຄວາມເຫັນກ່ຽວກັບ ການຊຸກຍູ້ ການຮ່ວມມື ລະຫວ່າງ ສປ ຈີນ ແລະ ອາຊີກາງ ຢ່າງຮອບດ້ານ.
ໃນໂອກາດນີ້ ທ່ານ ຫວາງຢີ້, ກຳມະການກົມການເມືອງສູນກາງພັກກອມມູນິດຈີນ, ລັດຖະມົນຕີກະຊວງ ການຕ່າງປະເທດຈີນ ໄດ້ສະເໜີ ຂໍ້ສະເໜີ 5ຂໍ້ ຂອງ ສປ ຈີນ ກ່ຽວກັບການລົງເລິກ ການຮ່ວມມື ສປ ຈີນ-ອາຊີກາງຄື: ໜຶ່ງ, ຍຶດໝັ້ນ ຄວາມຊື່ສັດ ແລະ ສ້າງຄວາມປອງດອງກັນ; ສອງ, ຍຶດໝັ້ນການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ; ສາມ, ຍຶດໝັ້ນການກໍ່ສ້າງກົນໄກ; ສີ່, ຍຶດໝັ້ນ ຄວາມຍຸຕິທຳ ແລະ ຄວາມເປັນທຳ; ຫ້າ, ຍຶດໝັ້ນ ມິດຕະພາບແບບຍືນຍາວຕະຫລອດການ. ລັດຖະມົນຕີ ຕ່າງປະເທດ ຂອງບັນດາປະເທດ ອາຊີກາງ ທີ່ເຂົ້າຮ່ວມກອງປະຊຸມ ໄດ້ຕີລາຄາສູງ ຕໍ່ສາຍພົວພັນ ຄວາມສາມັກຄີ ແລະ ຄວາມໄວ້ເນື້ອເຊື່ອ ໃຈກັນ ໃນລະດັບສູງກັບ ສປ ຈີນ ກໍຄື ບົດບາດສຳຄັນ ຂອງກົນໄກ ສປ ຈີນ-ອາຊີກາງ, ກອງປະຊຸມ ໄດ້ອອກປະກາດ ແຈ້ງຂ່າວ. ໃນໄລຍະກອງປະຊຸມ, ທ່ານ ຫວາງຢີ້ ໄດ້ຈັດການພົບປະ ສອງຝ່າຍ ກັບລັດຖະມົນຕີຕ່າງປະເທດ ຂອງບັນດາປະເທດອາຊີກາງ.
ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
