ສະຖານະການແຜ່ນດິນໄຫວຮຸນແຮງໃນມຽນມາ ຊຶ່ງສັ່ນສະເທືອນໄປຫຼາຍປະເທດໃກ້ຄຽງ ໃນນັ້ນລວມທັງລາວເຮົານຳ ແຕ່ເສຍຫາຍໃຫຍ່ສຸດແມ່ນຢູ່ປະເທດມຽນມາທີ່ເປັນສູນກາງແຜ່ນດິນໄຫວ, ຮອງລົງມາແມ່ນປະເທດໄທ.
ເຫດການໄດ້ເກີດຂຶ້ນໃນເວລາ 13:20 ໂມງຂອງວັນທີ 28 ມີນາ 2025 ມາຮອດປະຈຸບັນ ອີງໃສ່ຕົວເລກບໍ່ເປັນທາງການສຳລັບຢູ່ມຽນມາ ແມ່ນມີຜູ້ເສຍຊີວິດແລ້ວ 2.940 ຄົນ, ຜູ້ໄດ້ຮັບບາດເຈັບ 3.430 ຄົນ ຂະນະທີ່ຄວາມເສຍຫາຍຈາກຕຶກ 30 ຊັ້ນຖະຫຼົ່ມໃນປະເທດໄທ ແມ່ນມີຜູ້ເສຍຊີວິດ 18 ຄົນ, ບາດເຈັບ 33 ກໍລະນີ ແລະ ຍັງມີຜູ້ສູນຫາຍ 78 ຄົນ.
ໃນດ້ານການຊ່ວຍເຫຼືອຈາກນານາຊາດ ມາຮອດປະຈຸບັນນີ້ ມີຈີນ, ອິນເດຍ, ສິງກະໂປ, ມາເລເຊຍ, ໃຕ້ຫວັນ, ຮອງກົງ, ຣັດເຊຍ, ເບຣາຣຸດ, ຫວຽດນາມ ແລະໄທ ໄດ້ສົ່ງກຳລັງກູ້ໄພລວມທັງສິ່ງຂອງບັນເທົາທຸກຈຳນວນໜຶ່ງໄປຮອດພື້ນທີ່ປະສົບໄພແລ້ວ.
ແລະຫຼາຍປະເທດແມ່ນໄດ້ມອບການຊ່ວຍເຫຼືອເປັນເງິນຊ່ວຍບັນເທົາທຸກເຊັ່ນ: ອັງກິດສະເໜີເງິນຊ່ວຍເຫຼືອ 10 ລ້ານປອນ, ໄອແລນບໍລິຈາກ 6 ລ້ານຢູໂຣ, ມາເລເຊຍ 10 ລ້ານຣິງກິດ, ສະຫະປະຊາຊາດມອບ 5 ລ້ານໂດລາ, ສ.ເກົາຫຼີໃຫ້ 2 ລ້ານໂດລາ, ນີວຊີແລນ 2 ລ້ານໂດລາສະຫະລັດ ແລະຍັງອີກຫຼາຍພາກສ່ວນ ລວມເຖິງປະເທດເພື່ອນມິດໃນໂລກກຳລັງທະຍອຍສະເໜີການຊ່ວຍເຫຼືອໄປຍັງມຽນມາຢ່າງຕໍ່ເນື່ອງ.
ຂໍ້ມູນຈາກ: World forum
photo Cr: Myanma now
