ວິທະຍຸ ສາກົນແຫ່ງ ສປ ຈີນ,ວັນທີ 19 ກຸມພານີ້, ທ່ານ ນາງ ແພທອງທານ, ຊິນນະວັດ ນາຍົກລັດຖະມົນຕີໄທກ່າວວ່າ: ມາດຕະການໂຈມຕີ ການຫລອກລວງ ທາງໂທລະຄົມ ຂອງໄທ ໄດ້ປະສົບຜົນສຳເລັດ ຢ່າງຈະແຈ້ງ ແລະ ໄທ ຈະສືບຕໍ່ ປາບປາມ ອາຊະຍາກຳ ຂ້າມຊາດ ຢ່າງເຂັ້ມງວດ. ພາຍຫລັງ ລັດຖະບານໄທ ໄດ້ຕັດສາຍສົ່ງໄຟຟ້າ ແລະ ຍຸດຕິການບໍລິການ ດ້ານອິນເຕີເນັດ ໃຫ້ແກ່ ເຂດທີ່ຖືກສົ່ງໄສ ເປັນຈຸດຫລອກລວງ ທາງໂທລະຄົມ ທີ່ຢູ່ເຂດຊາຍແດນໄທ-ມຽນມາ ທັງຍຸດຕິການສະໜອງ ນ້ຳມັນເຊື້ອໄຟອີກ. ການນຳໃຊ້ພະລັງງານໄຟຟ້າ ຂອງເຂດແຄວ້ນ ທີ່ກ່ຽວຂ້ອງຂອງມຽນມາ ໄດ້ຫລຸດລົງ ປະມານ 40%, ມີບຸກຄົນ ທີ່ກ່ຽວຂ້ອງກັບ ການຫລອກລວງ ທາງໂທລະຄົມ ຫລາຍກວ່າ 300 ຄົນ ຖືກສົ່ງໄປໄທ ແລະ ຍັງມີອີກ ປະມານ 7.000 ຄົນ ກຽມຈະຖືກສົ່ງໄປໄທ, ການປະຕິບັດງານ ທີ່ກ່ຽວຂ້ອງ ໄດ້ຮັບຜົນງານຢ່າງຈະແຈ້ງ. ທ່ານ ນາງ ແພທອງທານ ຊິນນະວັດ ກ່າວຕື່ມວ່າ: ລັດຖະບານໄທ ຍັງໄດ້ຜ່ານມະຕິ ດັດແກ້ກົດໝາຍ ຢ່າງສຸກເສີນສະບັບໜຶ່ງ ເພື່ອເພີ່ມທະວີ ການປາບປາມ ອາຊະຍາກຳ ແລະ ການຫລອກລວງ ທາງອິນເຕີເນັດ ໂດຍຮຽກຮ້ອງ ໃຫ້ສະຖາບັນການເງິນ, ບໍລິສັດ ໂທລະຄົມ ແລະ ສື່ສັງຄົມອອນລາຍ ຕ້ອງຮັບຜິດຊອບ ສ່ວນໜຶ່ງ ໃນກໍລະນີ ທີ່ຜູ້ຖືກເຄາະຮ້າຍໃນຄະດີ ຫລອກລວງ ທາງໂທລະຄົມ ແລະ ອິນເຕີເນັດ. ຄາດວ່າ ມະຕິດັ່ງກ່າວ ຈະມີຜົນບັງຄັບໃຊ້ ໃນໄວໆນີ້.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
