ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ ໄດ້ຈັດກອງປະຊຸມເຜີຍແຜ່ຜົນການຄົ້ນຄວ້າ ປະຈໍາປີ 2024 ໃນລະຫວ່າງວັນທີ 30-31 ມັງກອນ 2025 ພາຍໃຕ້ຫົວຂໍ້: “ກາລະໂອກາດ ແລະ ສິ່ງທ້າທາຍ ຂອງການພັດທະນາແບບຍືນຍົງ ແລະ ການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນພາຍໃຕ້ເງື່ອນໄຂແຫ່ງການຄຸ້ມຄອງລັດ ແລະ ສັງຄົມດ້ວຍກົດໝາຍ ຢູ່ ສປປ ລາວ”.
ໂອກາດນີ້, ທ່ານ ກອງແກ້ວ ໄຊສົງຄາມ ປະທານສະຖາບັນວິທະຍາສາດເສດຖະ ກິດ ແລະ ສັງຄົມແຫ່ງຊາດ ໄດ້ກ່າວວ່າ: ການຄຸ້ມຄອງລັດ ແລະ ຄຸ້ມຄອງສັງຄົມດ້ວຍກົດໝາຍແມ່ນນະໂຍບາຍ, ຍຸດທະສາດ ແລະ ເປົ້າໝາຍໜຶ່ງຂອງພັກ ແລະ ລັດຖະ ບານ ໄດ້ສຸມໃສ່ ສ້າງລັດແຫ່ງກົດໝາຍ ເທື່ອລະກ້າວ ໂດຍໄດ້ປະສົບຜົນສຳເລັດໃນຫລາຍໆດ້ານ ເປັນຕົ້ນ ການສ້າງລະບຽບກົດໝາຍ ແລະ ນິຕິກຳຕ່າງໆ. ປັດຈຸບັນ, ສປປ ລາວ ມີລັດຖະທຳມະນູນ, ກົດໝາຍ ແລະ ນິຕິກໍາລຸ່ມກົດໝາຍ ເປັນຈໍານວນຫລວງຫລາຍ. ແຕ່ການຈັດຕັ້ງປະຕິບັດ ຍັງບໍ່ທັນເຂັ້ມງວດ.
ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ ໄດ້ມີຄໍາເຫັນວ່າ: ວິທະ ຍາສາດ ນັບມື້ມີບົດບາດ ແລະ ມີທ່າກ້າວຂະຫຍາຍຕົວຄວບຄູ່ກັບ ການພັດທະນາເສດຖະກິດ-ສັງຄົມ ໂດຍສະເພາະຍຸກ 4.0 ນັບມື້ມີບົດບາດສໍາຄັນ ຕໍ່ກັບການດໍາລົງຊີວິດ, ໃນການຄ້າ, ກະສິກໍາ, ການອະນຸລັກສິ່ງແວດລ້ອມທໍາມະຊາດ, ການພັດທະນາສັງຄົມ ເຊິ່ງສູນກາງພັກ ແລະ ລັດຖະບານ ໄດ້ໃຫ້ຄວາມສໍາຄັນຂອງການຄົ້ນຄວ້າວິທະຍາສາດຕະຫລອດມາ, ສົ່ງເສີມໃຫ້ມີບັນດານັກຄົ້ນຄວ້າຫລາຍຂຶ້ນ ໃນແຕ່ລະສາຂາວິຊາເປັນກ້າວໆ ໂດຍເນັ້ນໃສ່ການພັດທະນາແຕ່ລະດ້ານໃຫ້ມີຄວາມຍືນຍົງ. ສະນັ້ນ, ບົນພື້ນຖານການກໍາແໜ້ນທັດສະນະຕ່າງໆ ກ່ຽວກັບການຄົ້ນຄວ້າວິທະຍາ ສາດ ສູນກາງພັກ ແລະ ລັດຖະບານ ໄດ້ກໍານົດບັນດາໂຄງການຄົ້ນຄວ້າວິທະຍາສາດ ເພື່ອຮັບໃຊ້ບັນດາແຜນງານລະດັບຊາດ ແລະ ຫວັງຢ່າງຍິ່ງວ່າຜົນ ຂອງກອງປະຊຸມຄັ້ງນີ້, ຈະຖືກນໍາໄປໃຊ້ ຫລື ພິຈາລະນາເຂົ້າໃນວຽກງານການວາງ ແນວທາງນະໂຍ ບາຍຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດໃນຊຸມປີຕໍ່ໜ້າ.
