ພາຍໃຕ້ການຊີ້ນໍາຂອງສູນກາງພັກ ລັດຖະບານ ກໍຄືຄະນະພັກ ແລະ ອົງການປົກຄອງແຕ່ລະຂັ້ນ, ການສະໜັບສະໜູນຊ່ວຍເຫຼືອຂອງຂະແໜງການ, ອົງການ ແລະ ທ້ອງຖິ່ນຕ່າງໆ ລວມທັງເພື່ອນມິດສາກົນ ບວກກັບຄວາມພະຍາຍາມສູງ ໃນການຈັດຕັ້ງປະຕິບັດໜ້າ ທີ່ການເມືອງທີ່ຂັ້ນເທິງໄດ້ມອບໝາຍໃຫ້ ເປັນເຈົ້າການຂອງທົ່ວຂະແໜງແຜນການ ແລະ ການລົງທຶນ ອັນໄດ້ເຮັດໃຫ້ ວຽກງານແຜນການ, ການລົງທຶນ ໄດ້ຮັບການປັບປຸງ, ພັດທະນາເປັນກ້າວໆມາ ຊຶ່ງສາມາດຕີລາຄາໂດຍສັງເຂບກ່ຽວກັບ ຜົນສໍາເລັດທີ່ພົ້ນເດັ່ນ ແລະ ບົດຮຽນທີ່ຖອດຖອນໄດ້.
ທ່ານ ນາງພອນວັນ ອຸທະວົງ ຮອງລັດຖະມົນຕີກະຊວງແຜນການ ແລະ ການລົງທຶນ ໄດ້ລາຍງານວຽກງານແຜນການ ແລະ ການລົງທຶນ ປະຈໍາປີ 2024 ທີ່ຫໍປະຊຸມແຫ່ງຊາດ ບາງດ້ານວ່າ: 1 ປີຜ່ານມາ ວຽກງານແຜນການລົງທຶນຂອງລັດ ສໍາເລັດການສະຫຼຸບຂາດຕົວການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນການລົງທຶນຂອງລັດ ປະຈຳປີ 2023; ສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນການລົງທຶນຂອງລັດ, ຄາດຄະເນການຈັດຕັ້ງປະຕິບັດໝົດປີ 2024, ທິດທາງແຜນການປະຈຳປີ 2025 ແລະ ແຜນການ 5 ປີ ຄັ້ງທີ X (2026-2030). ພົ້ນເດັ່ນ ແມ່ນໄດ້ສຳເລັດການປັບປຸງມາດຕາ 18 ຂອງກົດໝາຍລົງທຶນລັດ ຊຶ່ງໄດ້ຮັບຮອງຈາກກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດຊຸດທີ IX ໄດ້ແຈ້ງເພດານການລົງທຶນຂອງລັດ ບ້ວງ 2,900 ຕື້ກີບ ແລະ ບ້ວງ 2,100 ຕື້ກີບ ໃຫ້ແຕ່ລະຂະແໜງການ ແລະ ທ້ອງຖິ່ນ ແລະ ສຳເລັດຂະບວນການຄົ້ນຄວ້າແຜນການ ແລະ ຈັດຕັ້ງປະຕິບັດແຜນແກ້ໄຂໜີ້ສິນໂຄງການລົງທຶນຂອງລັດ ດ້ວຍຮູບແບບອວ່າຍໜີ້ກັບທະນາຄານ ບ້ວງ 8.000 ຕື້ກີບ. ສຳເລັດການຄົ້ນຄວ້າປະເມີນໂຄງການລົງທຶນຂອງລັດ ເພື່ອເປັນບ່ອນອີງທີ່ສໍາຄັນ ສໍາລັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປະຈຳປີ 2025, ມີໂຄງການຜ່ານການຮັບຮອງ ແລະ ອອກໃບຢັ້ງຢືນທັງໝົດ ຈໍານວນ 746 ໂຄງການ, ມູນຄ່າລວມທີ່ສົ່ງມາປະເມີນເບື້ອງຕົ້ນ 20,957 ຕື້ກີບ ແລະ ມູນຄ່າລວມຫຼັງການປະເມີນຍັງເຫຼືອ 20,657 ຕື້ກີບ ສາມາດຕັດຮອນ ແລະ ຊ່ວຍປະຢັດງົບປະມານຂອງລັດ ໄດ້ 176 ຕື້ກີບ; ໂຄງການສໍາເລັດ 100% ກ່ອນການມອບຮັບ ໃນຂອບເຂດທົ່ວປະເທດ ໄດ້ 31 ໂຄງການ ແລະ ວຽກງານອື່ນໆ.
ໄດ້ອະນຸມັດການລົງທຶນ ໃນກິດຈະການສໍາປະທານ ແລະ ກິດຈະການຄວບຄຸມ ຈໍານວນ 108 ໂຄງການ, ມີ 2,69 ຕື້ໂດລາ. ພ້ອມນີ້, ກໍໄດ້ເຊັນບົດບັນທຶກຄວາມເຂົ້າໃຈ ຈໍານວນ 15 ໂຄງການ, ອອກໃບອະນຸຍາດສ້າງຕັ້ງຫ້ອງການຜູ້ຕາງໜ້າທັງໝົດ ຈໍານວນ 13 ບໍລິສັດ ມູນຄ່າທຶນຈົດທະບຽນ 29 ກວ່າຕື້ກີບ, ໄດ້ຄົ້ນຄວ້າໃຫ້ນະໂຍບາຍສົ່ງເສີມການລົງທຶນ ໂດຍສະເພາະອະນຸມັດແຜນນຳເຂົ້າປະຈຳປີ ມູນຄ່າ 4,5 ຕື້ໂດລາ. ພົ້ນເດັ່ນ ແມ່ນການປັບປຸງກົດໝາຍສົ່ງເສີມການລົງທຶນ ໂດຍຖືກປະກາດນຳໃຊ້ຢ່າງເປັນທາງການ ແລະ ປັດຈຸບັນ ຢູ່ໃນຂັ້ນຕອນການເອົາລົງຈົດໝາຍເຫດລັດຖະການ. ພ້ອມກັນນັ້ນ, ຍັງໄດ້ເອົາໃຈໃສ່ຄົ້ນຄວ້າປັບປຸງນິຕິກຳ ລຸ່ມກົດໝາຍ ຈຳນວນ 4 ສະບັບ ຄື: (1) ດຳລັດວ່າດ້ວຍການຮັບຮອງເອົາບັນຊີກິດຈະການຄວບຄຸມ ແລະ ກິດຈະການສໍາປະທານ; (2)ຂໍ້ຕົກລົງວ່າດ້ວຍການແບ່ງຂັ້ນຄຸ້ມຄອງໂຄງການລົງທຶນພາກເອກະຊົນ ລະຫວ່າງ ຂັ້ນສູນກາງ ແລະ ຂັ້ນທ້ອງຖິ່ນ; (3) ຄໍາແນະນໍາວ່າດ້ວຍລະບຽບການນໍາໃຊ້ງົບປະມານ ຮ່ວງທຶນຕິດຕາມການຈັດຕັ້ງປະຕິບັດສັນຍາ ລະຫວ່າງ ຂັ້ນສູນກາງ ແລະ ຂັ້ນແຂວງ/ນະຄອນຫຼວງ ແລະ (4) ຂໍ້ຕົກລົງ ຂອງລັດຖະມົນຕີວ່າດ້ວຍການສ້າງຕັ້ງ ແລະ ຄຸ້ມຄອງຫ້ອງການຜູ້ຕາງໜ້າຂອງນິຕິບຸກຄົນຕ່າງປະເທດ ຢູ່ ສປປ ລາວ (ສະບັບປັບປຸງ). ປີ 2024 ບັນດາເຂດເສດຖະກິດພິເສດສາມາດດຶງດູດການລົງທຶນ ຈາກພາຍໃນ ແລະ ຕ່າງປະເທດ ໄດ້ ທັງໝົດ 453 ບໍລິສັດ. ໃນນັ້ນ, ມີທຶນທັງໝົດ 727 ລ້ານກວ່າໂດລາ ແລະ ທຶນຈົດທະບຽນ 529 ລ້ານໂດລາ.
ໃນປີ 2024 ຕາມແຜນຄາດຄະເນປະຕິບັດທຶນຊ່ວຍເຫຼືອລ້າ ແລະ ກູ້ຢືມ: ທັງໝົດ 718.52 (ລ້ານໂດລາ), ການຈັດຕັ້ງປະຕິບັດແຜນແຕ່ເດືອນມັງກອນ-16 ທັນວາ 2024 ສາມາດປະຕິບັດໄດ້ມູນຄ່າທັງໝົດ 498.31 ລ້ານໂດລາ, ເທົ່າກັບ 69% ແຜນປີ; ອັນພົ້ນເດັ່ນ ໄດ້ສຳເລັດກອງປະຊຸມໂຕະມົນປະຈຳປີ 2024; ໄດ້ກະກຽມເນື້ອໃນໃຫ້ຄະນະນໍາເຂົ້າຮ່ວມກອງປະຊຸມ GMS ຄັ້ງທີ 8 ທີ່ ສປ ຈີນ; ເຂົ້າຮ່ວມກອງປະຊຸມເຈລະຈະຮ່ວມມືລະຫວ່າງ ສປປ ລາວ ແລະ ສ.ເຢຍລະມັນ ແລະ ກອງປະຊຸມ ຮ່ວມກັບຄູ່ຮ່ວມພັດທະນາໃນຂົງເຂດເອີຣົບ-ອາເມຣິກາ, ອາຊີ ແລະ ປາຊີຟິກ, ອົງການຮ່ວມມືແບບຫຼາຍຝ່າຍ ແລະ ບັນດາສະຖາບັນການເງິນສາກົນ ທີ່ໃຫ້ການຊ່ວຍເຫຼືອແກ່ ສປປ ລາວ. ພ້ອມກັນນັ້ນ, ກໍໄດ້ຄົ້ນຄວ້າອອກນິຕິກໍາຈໍານວນໜຶ່ງ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານ ແລະ ວຽກງານອື່ນໆ.
