ຂ່າວຕ່າງປະເທດລາຍງານ ໃນວັນທີ 6 ມັງກອນ ຜ່ານມາວ່າ: ໄມໂຄຣຊັອຟ (Microsoft), ບໍລິສັດເຕັກໂນໂລຊີຍັກໃຫຍ່ຂອງສະຫະລັດ ອາເມຣິກາ ເປີດເຜີຍການຈັດສັນງົບປະມານ 80 ຕື້ໂດລາ ໃນປີງົບປະມານ 2025 ເພື່ອສ້າງສູນຂໍ້ມູນທີ່ສາມາດຮອງຮັບການປະມວນຜົນປັນຍາປະດິດ (AI) ແລະ ຝຶກອົບຮົມໂມເດລ AI. ລວມທັງການໃຊ້ AI ແລະ ການປະມວນຜົນເທິງລະບົບຄລາວທົ່ວໂລກ.
ທ່ານ ແບຣດ ສະມິດ ຮອງປະທານ ແລະ ປະທານ Microsoft ລະບຸວ່າ: ບໍລິສັດຈະໃຊ້ງົບປະມານດັ່ງກ່າວ ຫຼາຍກວ່າເຄິ່ງໜຶ່ງໃນສະຫະລັດ ອາເມຣິກາ. ໂດຍປີງົບປະມານ 2025 ຂອງບໍລິສັດ ຈະສິ້ນສຸດໃນເດືອນມິຖຸນາຈະມາເຖິງນີ້.
ທ່ານ ສະມິດ ກ່າວວ່າ: ປັນຍາປະດິດກຳລັງກາຍເປັນເຕັກໂນໂລຊີທີ່ປ່ຽນແປງໂລກ ຊຶ່ງຈະຂັບເຄື່ອນນະວັດຕະກຳ ແລະ ເພີ່ມປະສິດທິພາບໃນທຸກຂະແໜງການຂອງເສດຖະກິດ, ໂດຍ ສະຫະລັດ ອາເມຣິກາ ມີຄວາມພ້ອມທີ່ຈະເປັນຜູ້ນຳດ້ານເຕັກໂນໂລຊີໃໝ່ນີ້ ຫາກດຶງຈຸດແຂງຂອງຕົນອອກມາໃຊ້ຢ່າງເຕັມທີ່ ແລະ ຮ່ວມມືກັບມືສາກົນຢ່າງມີປະສິດທິພາບ.
ຂ່າວລະບຸວ່າ: Microsoft ແລະ OpenAI ກຳລັງເຈລະຈາກ່ຽວກັບການສ້າງສູນຂໍ້ມູນ ຊຶ່ງຈະປະກອບດ້ວຍຊຸບເປີຄອມພິວເຕີປັນຍາປະດິດ ທີ່ມີຊື່ວ່າ Stargate, ໂດຍຄາດວ່າສູນຂໍ້ມູນດັ່ງກ່າວຈະມີຕົ້ນທຶນໃນການກໍ່ສ້າງມູນຄ່າ 100 ຕື້ກວ່າໂດລາ.
