ງານເທດສະການອາຫານລາວ ຄັ້ງທີ 20 ປີ 2025 ຈັດຂຶ້ນພາຍໃຕ້ຄໍາຂວັນ 20 ປີ ເທດສະການອາຫານລາວມີໄຊ ສືບຕໍ່ກ້າວໄປສູ່ສາກົນ ຈະໄດ້ຈັດແບບເປີດກວ້າງໂດຍອະນຸຍາດໃຫ້ມີອາຫານລາວ ແບບພື້ນບ້ານ, ອາຫານລາວປະຍຸກ ແລະ ອາຫານນາໆຊາດມາວາງຂາຍເຖິງ 180 ຮ້ານ. ໃນນັ້ນ, ອາຫານເອກະ ລັກຈາກແຂວງຕ່າງໆ ແລະ ຈາກຜູ້ສະໜັບສະໜູນງານລວມ 160 ຮ້ານ, ຂາຍ ເຄື່ອງຫັດຖະກໍາ ແລະ ກະສິກໍາ 20 ຮ້ານ ຊຶ່ງຈະໄດ້ຈັດຂຶ້ນໃນລະຫວ່າງວັນທີ 22-26 ມັງກອນ ທີ່ສວນເຈົ້າອານຸວົງແຄມຂອງນະຄອນຫຼວງວຽງຈັນ.
ພິທີຖະແຫຼງຂ່າວດັ່ງກ່າວ ໄດ້ຈັດຂຶ້ນໃນວັນທີ 6 ມັງ ກອນນີ້ ທີ່ສະພາການຄ້າ ໂດຍມີທ່ານນາງ ລາວັນ ສຸດທິສານ ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ, ທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວ, ທ່ານ ຈັນສະໝອນ ຜອງຈັນທາ ຜູ້ອຳນວຍການຝ່າຍການຕະຫຼາດ ບໍລິສັດເບຍລາວຈຳກັດ, ທ່ານ ສີສຸພົນ ສີຫາລາດ ຜູ້ອໍານວຍການ ກຸ່ມບໍລິສັດດາວເຮືອງຈໍາກັດ ພ້ອມດ້ວຍແຂກຖືກເຊີນ ແລະ ສື່ມວນຊົນຈາກສໍານັກຕ່າງໆເຂົ້າຮ່ວມ.
ທ່ານນາງ ຈັນທະຈອນ ວົງໄຊ ປະທານຄະນະບໍລິຫານສະ ມາຄົມນັກທຸລະກິດແມ່ຍິງ ປະທານຄະນະກຳມະການຈັດງານເທດສະການອາຫານລາວ ປະຈຳປີ 2025 ໄດ້ລາຍງານໃຫ້ຮູ້ວ່າ: ຈຸດປະສົງໃນການຈັດງານເທດສະການອາຫານລາວ ຄັ້ງທີ 20 ປີ 2025 ນີ້ ເພື່ອຂໍ່ານັບຮັບຕ້ອນ ຄົບຮອບ 20 ປີຂອງການຈັດຕັັ້ງງານເທດສະການອາຫານລາວ ຂອງສະມາຄົມນັກທຸລະກິດແມ່ຍິງລາວ ແລະ ສ້າງຂະບວນການເພື່ອຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ IV ຂອງສະ ມາຄົມນັກທຸລະກິດແມ່ຍິງໃນປີ 2025 ນີ້, ເພື່ອສືບຕໍ່ອະນຸລັກວັດທະນະທໍາດ້ານອາຫານລາວໃຫ້ຄົງຢູ່ຄູ່ກັບກັບສັງຄົມລາວ ແລະ ສາ ມາດຂາຍຜ່ານລະບົບອອນລາຍໃນຍຸກດີຈີຕອນໄດ້ ເພື່ອສ້າງລາຍຮັບໃຫ້ຜູ້ປະກອບການແມ່ຍິງລາວ ກ່ຽວກັບອາຫານໃຫ້ເປັນປົກກະຕິ, ເພື່ອເສີມຂະຫຍາຍຄວາມສາມັກຄີ, ສ້າງຄວາມເຂັ້ມ ແຂງໃຫ້ສະມາຊິກພາຍໃນສະມາຄົມນັກທຸລະກິດຍິງດ້ວຍກັນ ແລະ ຜູ້ປະກອບການແມ່ຍິງທາງດ້ານອາຫານໃນທົ່ວປະເທດ ແລະ ໃນຕ່າງປະເທດ, ສາມາດສ້າງເປັນຍີ່ຫໍ້ອາຫານເອກະລັກແບບລາວໆ ຈໍາໜ່າຍອອກສູ່ສາກົນ ແລະ ໃຫ້ເປັນທີ່ຮູ້ຈັກ ແລະ ແຜ່ຫຼາຍທັງພາຍໃນ ແລະ ຕ່າງປະເທດ, ໂຄສະນາ ແລະ ສົ່ງເສີມທຸລະກິດອາ ຫານລາວໃຫ້ເປັນທີ່ຍອມຮັບວ່າ ການບໍລິໂພກອາຫານລາວແມ່ນສະອາດ ແລະ ປອດໄພ. ສຳລັບງານເທດສະການອາຫານ ເປັນຕະຫຼາດນັດຂະໜາດໃຫຍ່ລະດັບຊາດເພື່ອໃຫ້ຜູ້ປະກອບການແມ່ຍິງ ແລະ ຄອບຄົວໄດ້ຈໍາໜ່າຍພືດຜັກຜົນຜະລິດກະສິກໍາ, ຫັດຖະກໍາ, ແລະ ໂຄສະນາຍີ່ຫໍ້ເມດອິນລາວຂອງຫົວ ໜ່ວຍທຸລະກິດທີ່ຜູ້ບໍລິໂພກສາມາດຈັບຈ່າຍຊື້-ຂາຍດ້ວຍຄວາມໝັ້ນໃຈ ແລະ ປອດໄພ. ງານເທດສະການອາ ຫານລາວຈະເປີດເປັນທາງການໃນວັນທີ 22-26 ມັງກອນ 2025 ເປັນເວລາ 5 ວັນ ທີ່ສວນເຈົ້າອານຸວົງແຄມຂອງ, ພາຍໃນງານຈະຈັດແບບເປີດກວ້າງໂດຍອະນຸຍາດໃຫ້ມີອາຫານລາວແບບພື້ນບ້ານ, ອາຫານລາວປະຍຸກ ແລະ ອາຫານນາໆຊາດມາວາງຂາຍເຖິງ 180 ຮ້ານ, ໃນນັ້ນອາຫານເອກະລັກຈາກແຂວງຕ່າງໆ ແລະ ຈາກຜູ້ສະໜັບສະໜູນງານລວມ 160 ຮ້ານ, ຂາຍເຄື່ອງຫັດຖະກໍາ ແລະ ກະສິກໍາ 20 ຮ້ານ, ຄາດຄະເນເງິນໝູນວຽນປະມານ 10 ຕື້ກີບ. ສຳລັບກິດຈະກໍາໃນງານມີວາງສະແດງ, ຂາຍອາຫານລາວເອກະລັກ 18 ແຂວງ, ອາຫານທົ່ວໄປປອດສານພິດ ແລະ ຜະລິດຕະພັນຫັດຖະກໍາລາວ, ສະແດງສິລະປະ ແລະ ຮ້ອງເພງຊົມເຊີຍເທດ ສະການອາຫານລາວຕົບ ແຕ່ງເຮືອນຄົວລາວເປັນບ່ອນອະນຸລັກ ແລະ ເຜີຍແຜ່ວັດທະນະທໍາ, ວິຖີຊີວິດການແຕ່ງກິນແບບລາວໆ ເພື່ອໃຫ້ແຂກທ່ຽວຊົມສຶກສາ ແລະ ຖ່າຍຮູບທີ່ລະນຶກ. ແຂ່ງຂັນພາເຂົ້າທ່ຽງອາຫານລາວ, ສະແດງສິລະປະພື້ນ ເມືອງລາວ, ນັກຮ້ອງຮັບເຊີນຈາກຄ້າຍຊື່ດັງຂອງ ສປປ ລາວ, ເດີນແບບຫຼານນ້ອຍເຍົາວະຊົນຊຸດລາວສະຫຼັບກັນໃນແຕ່ລະຄືນ, ສໍາມະນາອາ ຫານລາວເພື່ອສຸຂະພາບ, ເຊີນຮ້ານອາຫານລາວທີ່ເປັນທີ່ຮູ້ຈັກຂອງສັງຄົມມາເຂົ້້່າຮ່ວມວາງສະແດງ ແລະ ຂາຍ.
ຂ່າວ-ພາບ: ບຸນຕອມ
