ແຫລ່ງຂ່າວຈາກ ແຂວງວຽງຈັນ ໃຫ້ຮູ້ວ່າ: ໃນທ້າຍອາທິດຜ່ານມາ, ເມືອງໝື່ນ ແຂວງວຽງຈັນ ສະເຫລີມສະຫລອງ ເພື່ອລະນຶກວັນຄົນພິການ ແລະ ວັນຜູ້ອາຍຸສູງແຫ່ງຊາດ ປະຈຳປີ 2024 ໂດຍການເຂົ້າຮ່ວມຂອງທ່ານ ເທບພະໄທ ແກ້ວເຂັມເພັດ ປະທານແນວລາວສ້າງຊາດ ແຂວງວຽງຈັນ, ທ່ານ ສອນໄຊ ຫລວງອາໄພ ວ່າການເຈົ້າເມືອງໆໝື່ນ, ທ່ານ ເຂົາແກ້ວ ສົມຈັນມະວົງ ປະທານ ສະມາຄົມບຳນານ ແລະ ຜູ້ອາຍຸສູງແຂວງວຽງຈັນ, ພ້ອມດ້ວຍພະນັກງານອາວຸໂສບຳນານ, ຜູ້ອາຍຸສູງ, ຜູ້ພິການ ແລະ ພະນັກງານ-ລັດຖະກອນເຂົ້າຮ່ວມ.
ທ່ານ ເທບພະໄທ ແກ້ວເຂັມເພັດ ໄດ້ກ່າວວ່າ: ພິທີສະເຫລີມສະຫລອງວັນຄົນພິການແຫ່ງຊາດ ແລະ ວັນສາກົນຜູ້ອາຍຸສູງ ໄດ້ກໍານົດເອົາວັນທີ 3 ທັນວາ ເປັນວັນຄົນພິການແຫ່ງຊາດ ແລະ ໄດ້ກຳນົດເອົາວັນທີ 1 ຕຸລາ ເປັນວັນຜູ້ອາຍຸສູງ, ຊຶ່ງໃນແຕ່ລະປີລັດຖະບານ ໄດ້ກຳນົດໃຫ້ມີການສະເຫລີມສະຫລອງວັນຄົນພິການແຫ່ງຊາດ ແລະ ວັນຜູ້ອາຍຸສູງ ເພື່ອສ້າງໃຫ້ສັງຄົມຮັບຮູ້ພາລະບົດບາດຂອງຄົນພິການ ແລະ ບົດບາດຂອງພະນັກງານບໍານານ ແລະ ຜູ້ອາຍຸສູງ ໃຫ້ດີຂຶ້ນ ທັງເປັນການສ້າງໂອກາດໃຫ້ຄົນພິການ, ພະນັກງານບຳນານ ແລະ ຜູ້ອາຍຸສູງ ໄດ້ພົບປະໂອ້ລົມແລກປ່ຽນບົດຮຽນນໍາກັນ ເປັນການໂຄສະນາພະນັກງານບຳນານ ແລະ ຜູ້ອາຍຸສູງ ເຂົ້າເປັນສະມາຊິກສະມາຄົມ ແລະ ເປັນການລະດົມທຶນ ເພື່ອຊ່ວຍເຫລືອເຊິ່ງກັນ ແລະ ກັນລະຫວ່າງສະມາຊິກ. ໃນພິທີໄດ້ມີກິດຈະກຳຕ່າງໆ ເປັນຕົ້ນ ຍ່າງເພື່ອສຸຂະພາບ, ຮ້ອງເພງ ແລະ ໂຍນບານໃສ່ກະຕ່າ ດ້ວຍບັນຍາກາດຟົດຟື້ນ.
ຂ່າວ-ພາບ: ວັນນາ
