ສູນວັດທະນະທໍາຈີນ ປະຈໍາລາວ, ສະມາຄົມຮ່ວມມື ເສດຖະກິດ-ເຕັກນິກ ກັບຕ່າງປະເທດນະ ຄອນຄຸນໝິງ ຮ່ວມກັບ ສະຖາບັນວິຈິດສິນແຫ່ງຊາດ, ສະຖາບັນວິຈິດສິນແຂວງຢຸນນານ ຈັດງານວາງສະແດງຮູບແຕ້ມການທັດສະນະ ຕາມທາງລົດໄຟລາວ-ຈີນ ຂອງນັກແຕ້ມຮູບຢູນນານ ເພື່ອເປັນການສະເຫລີມສະຫລອງບຸນກູດຈີນປີ 2025 ໃນວັນທີ 27 ທັນວາ 2024 ໂດຍມີ ທ່ານ ຄຳສຸກ ແກ້ວວົງຊາຍ ອຳນວຍການສະຖາບັນວິຈິດສິນແຫ່ງຊາດ ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ, ທ່ານ ນາງ ຫລີ ຍີ່ຜິງ ຫົວໜ້າສູນວັດທະ ນະທຳຈີນ ປະຈຳລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ງານວາງສະແດງຮູບແຕ້ມການທັດສະນະ ຕາມທາງລົດໄຟລາວ-ຈີນ ຂອງນັກແຕ້ມຮູບຢູນນານ ຈຳນວນ 7 ທ່ານ ທີ່ນຳມາວາງສະແດງໃນຄັ້ງນີ້, ມີທັງໝົດ 45 ຜົນງານ ເຊິ່ງບັນດານັກແຕ້ມ ໄດ້ມາທັດສະນະແຕ້ມຮູບສະ ຖານທີ່ຕ່າງໆ ຕາມທາງລົດໄຟລາວ-ຈີນ ຄື: ນະຄອນຫລວງວຽງຈັນ, ວັງວຽງ, ຫລວງພະບາງ ແລະ ອື່ນໆ ນັກແຕ້ມຮູບໄດ້ແຕ້ມຢ່າງມີຊີວິດຊີວາ ແລະ ສີສັນທີ່ຫລາກຫລາຍ ໃນການສະແດງວິວ, ທິວທັດທໍາມະຊາດ, ຮີດຄອງປະເພນີ, ແລະ ມິດຕະພາບທີ່ດີຂອງສອງປະເທດ ຜ່ານຜົນງານຂອງພວກເຂົາ.
ທ່ານ ຄຳສຸກ ແກ້ວວົງຊາຍ ໄດ້ກ່າວວ່າ: ການຈັດງານໃນຄັ້ງນີ້, ມີຄວາມໝາຍຄວາມສໍາຄັນ, ທັງເປັນການ ແລກປ່ຽນວິຊາການຂອງສິລະປິນລາວ-ຈີນ ຂອງບັນດາຄູອາຈານ ແລະ ນັກສຶກສາ ຢູ່ສະຖາບັນວິຈິດສິນແຫ່ງຊາດ ແລະ ຂອງນັກແຕ້ມແຂວງຢູນານ. ການຮ່ວມມືໃນຄັ້ງນີ້, ເປັນຄັ້ງທໍາອິດ ລະຫວ່າງ ສະຖາບັນວິຈິດສິນແຫ່ງຊາດ ແລະ ສິລະປິນ ຈາກແຂວງຢູ່ນານ ເຊິ່ງຈະເປັນສ່ວນໜຶ່ງໃນໃນການສົ່ງເສີມສາຍພົວພັນ ຂອງສິລະປິນປະເທດສອງປະເທດ ລາວ-ຈີນ, ຈີນ-ລາວ ໃຫ້ມີການແລກປ່ຽນທາງດ້ານວິຊາການ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ ເພື່ອເປັນການສະໜັບໜູນສົ່ງເສີມ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ ແລະ ເສັ້ນທາງລົດໄຟລາວ-ຈີນ.
ສະຖາບັນວິຈິດສິນແຫ່ງຊາດ ມີບົດບາດໃນການຈັດຕັ້ງການສຶກສາ, ການຄົ້ນຄວ້າ ວິໄຈດ້ານວິຈິດສິນ, ສິລະປະວັດທະນະທໍາໃນສາຂາຕ່າງໆ ພັດທະນາຫລັກສູດ ການຮຽນ-ການສອນ, ອະນຸລັກສົ່ງເສີມສິລະປະ-ວັດທະນະທໍາ ອັນດີງາມຂອງຊາດ, ເຜີຍແຜ່ຜົນງານສິລະປະ-ວັດທະນະທໍາ ແລະ ໃຫ້ການບໍລິ ການທາງດ້ານວິຊາການ, ວິຊາສະເພາະໃຫ້ແກ່ສັງຄົມ.
ຂ່າວ: ກິດຕາ
ພາບ: ເກດສະໜາ
