ວັນທີ 19 ທັນວາ 2024 ທີ່ຫ້ອງວ່າການສູນກາງພັກ ທ່ານ ທອງລຸນ ສີສຸລິດ ປະທານປະເທດ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ຫງວ້ຽນ ຫ໋າຍ ນິງ ລັດຖະມົນຕີກະຊວງຍຸຕິທຳ ສສ ຫວຽດນາມ ພ້ອມຄະນະ ໃນໂອກາດທີ່ເດີນທາງມາຢ້ຽມຢາມ ແລະ ຮັດວຽກຢູ່ ສປປ ລາວ ວັນທີ 18-20 ທັນວາ 2024.
ໂອກາດນີ້ ທ່ານ ທອງລຸນ ສີສຸລິດ ໄດ້ສະແດງຄວາມຍີນດີຕ້ອນຮັບ ແລະ ຊົມເຊີຍຕໍ່ທ່ານ ຫງວ້ຽນ ຫ໋າຍ ນິງ ທີ່ຫາກໍຖືກແຕ່ງຕັ້ງໃຫ້ເປັນລັດຖະມົນຕີກະຊວງຍຸຕິທຳຄົນໃໝ່ຂອງ ສສ ຫວຽດ ແລະ ໄດ້ນຳພາຄະນະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ພ້ອມທັງຕີລາຄາສູງຕໍ່ ສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ ສອງລັດ ແລະ ປະຊາຊົນສອງຊາດລາວ-ຫວຽດນາມ ທີ່ສືບຕໍ່ໄດ້ຮັບການເສີມຂະຫຍາຍຢ່າງຕັ້ງໜ້າ ເປັນການຊຸກຍູ້ສົ່ງເສີມ ປະກອບສ່ວນສຳຄັນເຂົ້າໃນຂົງເຂດວຽກງານງານຢ່າງຮອບດ້ານ ໂດຍສະເພາະ ຂົງເຂດວຽກງານຍຸຕິທຳ ໃຫ້ນັບມື້ມີຄວາມແໜ້ນແຟ້ນ ເລີກເຊິ່ງ ແລະ ເກີດດອກອອກຜົນຍິ່ງໆຂຶ້ນ ພ້ອມນີ້ທ່ານຍັງຝາກຄວາມຢ້ຽມຢາມຖາມຂ່າວເຖິງ ສະຫາຍເລຂາທິການໃຫຍ່ ແລະ ປະທານປະເທດ ຫວຽດນາມ ພ້ອມທັງໄດ້ຕາງ ໜ້າໃຫ້ພັກ ລັດຖະບານ ກໍຄືປະຊາຊົນລາວບັນດາເຜົ່າ ສະແດງຄວາມຂອບໃຈຢ່າງຈິງໃຈມາຍັງພັກ-ລັດຖະບານ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫຼືອອັນໃຫຍ່ຫຼວງ ລ້ຳຄ່າ ທັນການ ແລະ ມີປະສິດທີຜົນແກ່ ສປປ ລາວ ຕະ ຫຼອດມາ ພິເສດແມ່ນການສະໜັບສະໜູນ ແລະ ຊ່ວຍເຫຼືອຢ່າງຈິງໃຈ ການເປັນປະທານໝູນວຽນກອງປະຊຸມອາຊຽນຂອງ ສປປ ລາວ ໃນປີ 2024 ນີ້ຈົນໄດ້ຮັບຜົນສຳເລັດຢ່າງຈົບງາມ.
ໂອກາດດຽວກັນ ທ່ານ ຫງວ້ຽນ ຫ໋າຍ ນິງ ກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຊົມເຊີຍຕໍ່ຜົນສໍາເລັດອັນຈົບງາມໃນການເປັນປະທານອາຊຽນ ປີ 2024 ຂອງ ສປປ ລາວ ພ້ອມທັງລາຍງານຈຸດປະສົງ ການເດີນທາງມາຢ້ຽມຢາມ ແລະ ເຮັດວຽກຢູ່ ລາວ ກັບກະຊວງຍຸຕິທຳໃຫ້ທ່ານປະທານປະເທດຊາບ ແລະ ອວຍ ພອນໃຫ້ສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ-ລາວ ຈົ່ງໝັ້ນຄົງຂະໜົງແກ່ນຕະຫຼອດໄປ.
