ຂປລ. ກອງປະຊຸມຄົບຄະນະບໍລິຫານງານພັກ ກະຊວງປ້ອງກັນຄວາມສະຫງົບ (ປກສ) ຄັ້ງທີ 8 ສະໄໝ ທີ V ໄຂຂຶ້ນໃນວັນທີ 17 ທັນວາ 2024 ໂດຍການເປັນປະທານຂອງ ສະຫາຍ ພົອ ວິໄລ ຫລ້າຄໍາຟອງ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ, ມີຮອງເລຂາຄະນະພັກ, ຄະນະປະຈໍາພັກ, ຄະນະບໍລິຫານງານພັກກະຊວງ, ບັນດາຫົວໜ້າກົມໃຫຍ່, ກອງບັນຊາການ ແລະ ວິທະຍາຄານເຂົ້າຮ່ວມ.
ສະຫາຍ ພົອ ວິໄລ ຫລ້າຄໍາຟອງ ກ່າວວ່າ: ກອງປະຊຸມຄົບຄະນະ ບໍລິຫານງານພັກ ກະຊວງປ້ອງກັນຄວາມສະຫງົບ ຄັ້ງທີ 8 ສະໄໝ ທີ V ຄັ້ງນີ້ ຈະໄດ້ພ້ອມກັນຄົ້ນຄວ້າ ປຶກສາຫາລື ແລະ ໃຫ້ທິດຊີ້ນໍາຕໍ່ວຽກງານສໍາຄັນ ເປັນຕົ້ນ ຈະໄດ້ຮັບຟັງການສະຫລຸບຕີລາຄາ ການນໍາພາ-ຊີ້ນໍາ ວຽກງານປ້ອງກັນຄວາມສະຫງົບ ປະຈໍາປີ 2024 ແລະ ວາງທິດທາງແຜນການວຽກງານຈຸດສຸມ ໃນຕໍ່ໜ້າ; ຮັບຟັງການລາຍງານການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ປະຈຳປີ 2024; ຮັບຟັງການລາຍງານ ແຜນກະກຽມສະເຫລີມສະຫລອງ 3 ວັນປະຫວັດສາດ ຕິດພັນກັບແຜນ ປ້ອງກັນ 3 ວັນດັ່ງກ່າວ ແລະ ແຜນປ້ອງກັນກອງປະຊຸມໃຫຍ່ ຄັ້ງທີ XII ຂອງພັກ; ຮັບຟັງການລາຍງານ ການຈັດຕັ້ງປະຕິບັດໂຄງການ ໂອນຖ່າຍສໍາມະໂນຄົວ ເປັນເອກະສານຂໍ້ມູນເອເລັກໂຕຣນິກ ແລະ ວຽກງານເກັບກູ້ອາວຸດເສິກ ປະຈຳປີ 2024; ບັນດາຄະນະພັກກະຊວງ ທີ່ເປັນຫົວໜ້າກົມກອງ ປະກອບຄໍາເຫັນໃນຂົງເຂດຕົນນໍາພາ-ຊີ້ນໍາ ພ້ອມທັງຮັບຮອງເອົາມະຕິນໍາພາໃນຕໍ່ໜ້າ.
ສະຫາຍ ພົອ ວິໄລ ຫລ້າຄຳຟອງ ກ່າວຕື່ມວ່າ: ເນື້ອໃນຂອງກອງປະຊຸມ ລ້ວນແຕ່ເປັນບັນຫາສໍາຄັນ, ບັນດາຫົວຂໍ້ທີ່ນໍາມາປຶກສາຫາລື, ພິຈາລະນາ ແລະ ໃຫ້ທິດຊີ້ນໍາໃນຄັ້ງນີ້ ມີທັງບັນຫາທີ່ເປັນວຽກປົກກະຕິ, ມີທັງການຕີລາຄາບັນຫາສະເພາະ ແລະ ບັນຫາທີ່ເປັນຍຸດທະສາດ ແລະ ຮຽກຮ້ອງມາຍັງບັນດາຜູ້ເຂົ້າຮ່ວມກອງປະຊຸມ ຈົ່ງຍົກສູງຄວາມຮັບຜິດຊອບການເມືອງ, ສຸມສະຕິປັນຍາ ຕໍ່ການຄົ້ນຄວ້າເອກະສານຕ່າງໆໃຫ້ລະອຽດ, ເລິກເຊິ່ງ, ມີການວິເຄາະວິໄຈບັນຫາ ຢ່າງພາວະວິໄສ, ຮອບຄອບ ແລະ ຢືນຢູ່ບົນຈິດໃຈກ້າຄິດ, ກ້າສະເໜີບັນຫາຢ່າງກົງໄປກົງມາ ແລະ ສ້າງສັນ, ເສີມຂະຫຍາຍຫົວຄິດປະດິດສ້າງ ເຮັດໃຫ້ບັນຫາຕ່າງໆ ທີ່ນໍາມາປຶກສາຫາລືກັນ ມີຄວາມຖືກຕ້ອງ, ສອດຄ່ອງກັບສະພາບຄວາມເປັນຈິງ ແລະ ສາມາດຈັດຕັ້ງປະຕິບັດໄດ້ເປັນຢ່າງດີ. ພາຍຫລັງດໍາເນີນກອງປະຊຸມຄັ້ງນີ້ ຕ້ອງເຮັດໃຫ້ທຸກຂົງເຂດວຽກງານ ພາຍໃນກຳລັງປ້ອງກັນຄວາມສະຫງົບ ມີການຫັນປ່ຽນໃໝ່ຢ່າງຕັ້ງໜ້າ ບັນລຸຕາມຈຸດປະສົງ ແລະ ຄາດໝາຍທີ່ວາງໄວ້.
ຂໍ້ມູນ: ປ້ອງກັນຄວາມສະຫງົບ
