ວັນທີ 25 ພະຈິກ 2024 ຜ່ານມານີ້ ລັດຖະບານແຫ່ງ ສປປ ລາວ ຮ່ວມກັບ ລັດຖະບານອົດສະຕຣາລີ ແລະ ອົງການຢູນີເຊັບ ໄດ້ຈັດມອບອຸປະກອນຊ່ວຍເຫຼືອ ສຳລັບ ເດັກພິການ ທີ່ແຂວງຊຽງຂວາງ. ການຊ່ວຍເຫຼືອໃນຄັ້ງນີ້ເປັນສ່ວນໜຶ່ງຂອງ ໂຄງການອຸດໜຸນເງິນສົດໃຫ້ເດັກພິການ (Disability Grant Plus Initiative) ເຊິ່ງປະຈຸບັນໄດ້ໃຫ້ການຊ່ວຍເຫຼືອເດັກຈຳນວນ 496 ຄົນ ແລະ 464 ຄອບຄົວ ໂດຍຜ່ານການສະໜອງເງິນຊ່ວຍເຫຼືອລ້າເປັນລາຍເດືອນ ແລະ ອຸປະກອນການຊ່ວຍເຫຼືອທີ່ຈໍາເປັນອື່ນໆ.
ອຸປະກອນການຊ່ວຍເຫຼືອປະກອບມີ: ລໍ້ນັ່ງແບບພິເສດ, ອຸປະກອນຊ່ວຍຢືນ, ເກີບປັບລະດັບ ແລະ ອຸປະກອນການຮຽນ, ຈະໄດ້ຖືກສົ່ງມອບໃຫ້ແກ່ເດັກນ້ອຍ ຈຳນວນ 239 ຄົນ ແລະ ຄອບຄົວພວກເຂົາ ທີ່ເມືອງແປກ, ເມືອງພູກູດ ແລະ ເມືອງຄູນ. ອຸປະກອນເຫຼົ່ານີ້ ແມ່ນມີຄວາມສຳຄັນຫຼາຍຕໍ່ການອຳນວຍຄວາມສະດວກໃຫ້ແກ່ເດັກພິການ ເພື່ອໃຫ້ພວກເຂົາສາມາດເຂົ້າເຖິງການສຶກສາ, ການດູແລສຸຂະພາບ ແລະ ກິດຈະກຳພາຍໃນຊຸມຊົນ.
ໂດຍການເປັນກຽດເຂົ້າຮ່ວມຂອງ ທ່ານ ຫຼີປາວຢາງ, ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ທີ່ໄດ້ເຂົ້າຮ່ວມພິທີມອບອຸປະກອນ. ທ່ານໄດ້ຍົກໃຫ້ເຫັນເຖິງຄວາມເອົາໃຈໃສ່ຂອງລັດຖະບານ ໃນການສະໜັບສະໜູນເດັກທຸກໆຄົນທົ່ວປະເທດ. “ງານໃນມື້ນີ້ເປັນການພິສູດ ເຖິງຄວາມຕັ້ງໃຈທີ່ບໍ່ເຊື່ອມຖອຍຂອງພວກເຮົາ ເພື່ອຮັບປະກັນວ່າ ເດັກທຸກໆຄົນມີຄວາມສາມາດທີ່ຈະໄດ້ຮັບໂອກາດຈະເລີນເຕີບໃຫຍ່. ໂດຍການສະໜອງອຸປະກອນການຊ່ວຍເຫຼືອເຫຼົ່ານີ້, ພວກເຮົາບໍ່ພຽງແຕ່ຕອບສະໜອງຕໍ່ຄວາມຕ້ອງການຢ່າງທັນທີທັນໃດ, ແຕ່ຍັງເປັນການລົງທຶນໃນອະນາຄົດຂອງຊຸມຊົນພວກເຮົາ.”
ໂຄງການອຸດໜຸນເງິນສົດໃຫ້ເດັກພິການ ເເມ່ນເປີດຕົວຂຶ້ນໃນປີ 2020 ເເລະ ຍັງໄດ້ປະກອບສ່ວນສໍາຄັນໃນການສະໜອງເງິນຊ່ວຍເຫຼືອລ້າເປັນລາຍເດືອນ ຈຳນວນ 400,000 ກີບ ຕໍ່ ຄົົນ ເພື່ອຊ່ວຍຕອບສະໜອງຄວາມຕ້ອງການທີ່ຈໍາເປັນເຊັ່ນ: ຄ່າໃຊ້ຈ່າຍດ້ານ ໂພຊະນາການ, ການດູແລສຸຂະພາບ ແລະ ການສຶກສາ. ການເພີ່ມການສະໜອງ ອຸປະກອນການຊ່ວຍເຫຼືອ ພາຍໃຕ້ໂຄງການນີ້ກໍເປັນການຜັນຂະຫຍາຍຜົນໄດ້ຮັບຂອງໂຄງການ ເເລະ ເປັນການຊ່ວຍໃຫ້ເດັກພິການມີຄວາມເປັນອິດສະລະຫຼາຍຂຶ້ນ ແລະ ມີຄວາມສາມາດໃນການມີສ່ວນຮ່ວມກັບຊຸມຊົນຂອງພວກເຂົາເຈົ້າຢ່າງເຕັມເມັດເຕັມໜ່ວຍ.
ທ່ານ ບີລາລ ດູຣານິ, ຜູ້ຕາງໜ້າ ອົງການຢູນີເຊັບ ປະຈຳ ສປປ ລາວ, ກໍໄດ້ສະເເດງເຖີງຄວາມຍຶດໝັ້ນຂອງ ອົງການຢູນີເຊັບ ໃນການສະໜັບສະໜູນສິດທິ ແລະ ສະຫວັດດີການຂອງເດັກນ້ອຍທຸກໆຄົນ.
“ການມອບອຸປະກອນການຊ່ວຍເຫຼືອເຫຼົ່ານີ້ສະແດງໃຫ້ເຫັນເຖິງ ການກ້າວໄປສູ່ການມີສ່ວນຮ່ວມຫຼາຍຂຶ້ນ. ຄວາມພະຍາຍາມຮ່ວມກັນຂອງພວກເຮົາ ແລະ ລັດຖະບານ ແຫ່ງ ສປປ ລາວ ແລະ ສະຖານທູດ ອົດສະຕຣາລີ ສະແດງໃຫ້ເຫັນເຖິງພະລັງແຫ່ງການຮ່ວມມືໃນການສ້າງການປ່ຽນແປງໃນທິດທາງບວກທີ່ທັ້ວຍືນຍົງສຳລັບເດັກພິການ.”
ພິທີມອບອຸປະກອນ ໃນຄັ້ງນີ້ຍັງຍົກໃຫ້ເຫັນເຖິງຄວາມສຳຄັນຂອງການເສີມສ້າງຂີດຄວາມສາມາດ ແລະ ການມີສ່ວນຮ່ວມຂອງຊຸມຊົນ. ຜ່ານການຜັນຂະຫຍາຍທັກສະຂອງພະນັກງານລັດຖະກອນໃນທ້ອງຖິ່ນ ແລະ ການປູກຈິດສຳນຶກ ກ່ຽວກັບ ບັນຫາຂອງຄົນພິການ, ຂໍ້ລິເລີ່ມດັ່ງກ່າວຮັບປະກັນຄວາມກ້າວໜ້າແບບຍືນຍົງ ແລະ ສົ່ງເສີມສະພາບແວດລ້ອມທີ່ເອື້ອອຳນວຍໃຫ້ແກ່ເດັກພິການ.
