ໃນວັນທີ 25 ພະຈິກ 2024 ກະຊວງຍຸຕິທຳ ແລະ ສະມາຄົມເພື່ອພັດທະນາແມ່ຍິງ ແລະ ການສຶກສາກົດໝາຍ (ສພມສກ) ໄດ້ຈັດພິທີລົງນາມບົດບັນທຶກຄວາມເຂົ້າໃຈ ເພື່ອສ້າງຄວາມເຂັ້ມແຂງການເຂົ້າເຖິງຄວາມຍຸຕິທຳຂອງປະຊາຊົນ ເພື່ອຄວາມສະເໝີພາບ ຍິງ-ຊາຍ ຂຶ້ນທີ່ ນະຄອນຫຼວງວຽງຈັນ ຊຶ່ງເປັນໂຄງການ ໄລຍະ 2 ປີ ໂດຍການສະໜັບສະໜູນທຶນຊ່ວຍເຫຼືອຈາກອົງການພັດທະນາສາກົນປະເທດສະຫະລັດອາເມລິກາ (USAID) ໂດຍຜ່ານແຜນງານຊ່ວຍເຫຼືອທາງດ້ານກົດໝາຍ ຈັດຕັ້ງປະຕິບັດໂດຍ ມູນິທິເອເຊຍ.
ບົດບັນທຶກຄວາມເຂົ້າໃຈດັ່ງກ່າວ ໄດ້ຮັບການລົງນາມ ໂດຍ ທ່ານ ຄຳພອນ ສີປະເສີດ ຫົວໜ້າກົມຮ່ວມມືສາກົນ, ກະຊວງຍຸຕິທຳ ແລະ ທ່ານ ນາງ ອິນທະລາ ບຸບຜາສະຫວັນ ຜູ້ອຳນວຍການສະມາຄົມເພື່ອພັດທະນາແມ່ຍິງ ແລະ ການສຶກສາກົດໝາຍ ໂດຍມີຜູ້ຕາງໜ້າຈາກກະຊວງຍຸຕິທຳ; ກະຊວງການຕ່າງປະເທດ; ຫ້ອງວ່າການປົກຄອງແຂວງ; ຫ້ອງການຍຸຕິທຳເມືອງ ຂອງນະຄອນຫຼວງວຽງຈັນ ແລະ ແຂວງອຸດົມໄຊ; ສູນກາງສະຫະພັນແມ່ຍິງ ແລະ ຄູ່ຮ່ວມພັດທະນາ ລວມທັງ ອົງການພັດທະນາສາກົນ ປະເທດສະຫະລັດອາເມລິກາ (USAID) ແລະ ມູນນິທິເອເຊຍ ເຂົ້າຮ່ວມເປັນສັກຂີພະຍານ.
ໃນພິທີ ທ່ານ ໄມໂຄ ແມັກຄອດ, ຜູ້ຕາງໜ້າອົງການ USAID ໄດ້ກ່າວວ່າ: ຕັ້ງແຕ່ປີ 2019, ສະມາຄົມເພື່ອພັດທະນາແມ່ຍິງ ແລະ ການສຶກສາກົດໝາຍ ໄດ້ໃຫ້ການບໍລິການທາງດ້ານກົດໝາຍຢ່າງເຕັມທີ່ ນັບແຕ່ຕັ້ງໃຫ້ຄຳແນະນຳທາງດ້ານກົດໝາຍ, ຊ່ວຍເຫຼືອດ້ານເອກະສານທາງກົດໝາຍ ແລະ ການເປັນຕາງໜ້າຂອງທະນາຍຄວາມໃນການດຳເນີນຄະດີ ແລະ ໃຫ້ການຊ່ວຍເຫຼືອປະຊາຊົນຫຼາຍຫວ່າ 550 ຄົນ ເຊິ່ງສ່ວນໃຫຍ່ແມ່ນປະສົບບັນຫາໃນຮູບແບບຄວາມຮຸນແຮງໃນຄອບຄົວ.
ພາຍໃຕ້ບົດບັນທຶກຄວາມເຂົ້າໃຈສະບັບນີ້, ຫ້ອງການຊ່ວຍເຫຼືອ ແລະ ຄຳປຶກສາທາງດ້ານກົດໝາຍ ທີ່ຈັດຕັ້ງປະຕິບັດໂດຍ ສະມາຄົມເພື່ອພັດທະນາແມ່ຍິງ ແລະ ການສຶກສາກົດໝາຍ, ຈະເຮັດວຽກຮ່ວມກັນກັບລັດຖະບານລາວ ສືບຕໍ່່ໃຫ້ບໍລິການຊ່ວຍເຫຼືອທາງດ້ານກົດໝາຍທີ່ຈຳເປັນໃຫ້ແກ່ແມ່ຍິງ ແລະ ເດັກນ້ອຍ ພ້ອມດຽວກັນນັ້ນ ກໍຈະຂະຫຍາຍກິດຈະກຳໄປທີ່ແຂວງອຸດົມໄຊ ເພື່ອຊ່ວຍເຫຼືອຄວາມຕ້ອງການດ້ານຍຸຕິທຳ ຂອງຊຸມຊົນທີ່ຢູ່ຫ່າງໄກສອກຫຼີກໃນພາກເໜືອຂອງ ສປປ ລາວ ເພື່ອແກ້ໄຂບັນຫາຄວາມເທົ່າທຽມ, ສິດທິຂອງແມ່ຍິງ ແລະ ປັບປຸງການເຂົ້າເຖິງຄວາມຍຸຕິທຳສຳລັບຜູ້ທີ່ດ້ອຍໂອກາດ ໂດຍສະເພາະ ຜູ້ທີ່ລອດຊີວິດຈາກການຖືກໃຊ້ຄວາມຮຸນແຮງໃນຄອບຄົວ.
ຂ່າວ-ພາບ: ຊາຍພິມພອນ ສີຣິວົງໄຊ
