ສູນຂ່າວກະຊວງປ້ອງກັນປະເທດ ປະກອບສ່ວນຢ່າງຕັ້ງໜ້າເຂົ້າໃນການສະໜອງຂໍ້ມູນຂ່າວ ເພື່ອຮັບປະກັນໃຫ້ແກ່ກອງປະຊຸມລັດຖະມົນຕີປ້ອງກັນປະເທດອາຊຽນ ຄັ້ງທີ 18 ແລະ ອາຊຽນບວກ ຄັ້ງທີ 11 ລະຫວ່າງ ວັນທີ 19-22 ພະຈິກ 2024 ທີ່ນະຄອນຫຼວງວຽງຈັນ.
ທ່ານ ພັນໂທ ຈັນທອນ ເລັດນະຄອນ ອະນຸກໍາມະການໂຄສະນາ ແລະ ສື່ມວນຊົນ ໃຫ້ສໍາພາດຕໍ່ນັກຂ່າວ ໃນວັນທີ 20 ພະຈິກນີ້ ທີ່ນະຄອນຫຼວງວຽງຈັນ ວ່າ: ເພື່ອຮັບປະກັນໃຫ້ແກ່ກອງປະຊຸມລັດຖະມົນຕີປ້ອງກັນປະເທດອາຊຽນ ຄັ້ງທີ 18 ແລະ ອາຊຽນບວກ ຄັ້ງທີ 11 ໃນລະຫວ່າງວັນທີ 19-22 ພະຈິກນີ້, ພວກເຮົາມີຄວາມພາກພູມໃຈທີ່ໄດ້ໃຫ້ຄວາມກະຈ່າງແຈ້ງບັນຫາສໍາຄັນຂອງຫ້ອງຂ່າວ ກໍຄືສູນຂ່າວຮັບໃຊ້ກອງປະຊຸມຄັ້ງນີ້. ສະເພາະຫ້ອງຂ່າວກອງປະຊຸມດັ່ງກ່ວ ໄດ້ຮັບການສ້າງຕັ້ງຂຶ້ນພາຍໃຕ້ການຊີ້ນໍາ ຂອງຄະນະຊີ້ນໍາລວມຈັດຕັ້ງກອງປະຊຸມ ໂດຍສົມທົບແໜ້ນກັບກົມສື່ມວນຊົນ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ກົມການຂ່າວ ກະຊວງການຕ່າງປະເທດ ແລະ ອະນຸກໍາມະການໂຄສະນາ ແລະ ສື່ມວນຊົນຂອງກອງປະຊຸມ ເພື່ອແນໃສ່ຄຸ້ມຄອງນັກຂ່າວທັງພາຍໃນ ແລະ ຕ່າງປະເທດທີ່ເຄື່ອນໄຫວເກັບກໍາຂ່າວ. ນອກຈາກນັ້ນ, ຍັງມີບົດບາດໃນການສະໜອງຂໍ້ມູນຂ່າວສານຕ່າງໆ ກໍຄືການເຄື່ອນໄຫວກິດຈະກໍາອື່ນ ທີ່ປິ່ນອ້ອມກອງປະຊຸມຄັ້ງນີ້ ໂດຍມີການສົມທົບຢ່າງແໜ້ນແຟ້ນກັບກົມເລຂາລັດຖະມົນຕີປ້ອງກັນປະເທດອາຊຽນ ເພື່ອນໍາເອົາຂໍ້ມູນຂ່າວສານທີ່ຖືກຕ້ອງນໍາໄປເຜີຍແຜ່-ສົ່ງຕໍ່ໃຫ້ສູນຂ່າວ ກໍຄືສໍານັກຂ່າວສື່ຕ່າງໆ.
ໃນໄລຍະຜ່ານມາຫ້ອງຂ່າວ ຍັງໄດ້ຊີ້ນໍາບັນດານັກຂ່າວພາກສ່ວນຕ່າງໆ ເກັບກໍາຂ່າວການເຄື່ອນໄຫວຫ້າງຫາກະກຽມ ແລະ ການເຄື່ອນໄຫວຈັດຕັ້ງກອງປະຊຸມ ໂດຍການໂຄສະນາຜ່ານພາຫະນະຂອງສື່ຕ່າງໆ ໂດຍສະເພາະແມ່ນສື່ສັງຄົມອອນລາຍ, ສື່ເອເລັກໂຕຣນິກ ແລະ ສື່ສິ່ງພິມອື່ນໆທັງພາຍໃນ ແລະ ນອກກອງທັບ. ນອກນີ້, ບັນຫາທີ່ພົ້ນເດັ່ນທີ່ນໍາສະເໜີໃຫ້ບັນດາສໍານັກຂ່າວນັ້ນ ຍັງມີບາງບັນຫາທີ່ບໍ່ທັນຕອບສະໜອງໄດ້ຕາມຄວາມຮຽກຮ້ອງຕ້ອງການ ຂອງວຽກງານສື່ ເປັນຕົ້ນແມ່ນການປັບປ່ຽນວາລະເວລາ ທີ່ບໍ່ໄປຕາມລະບົບຕາຕະລາງ ກໍຄືວາລະທີ່ໄດ້ແຈ້ງກ່ອນໜ້ານັ້ນ, ນັ້ນແມ່ນອີງໃສ່ການປັບປ່ຽນຂອງຂັ້ນເທິງ ກໍຄືຜູ້ເປັນເຈົ້າພາບກອງປະຊຸມ ສ່ວນວ່າການສະໜອງວັດຖຸອື່ນໆກໍເຫັນວ່າສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການ
ໂອກາດດັ່ງກ່າວ, ທ່ານຍັງຮຽກຮ້ອງມາຍັງສັງຄົມໃຫ້ຮັບຊາບວ່າ ບົນພື້ນຖານການຊີ້ນໍາ ຂອງພັກ ກໍຄືຄະນະພັກກະຊວງປ້ອງກັນປະເທດ ຈຶ່ງສາມາດຈັດຕັ້ງຫ້ອງປະຊຸມຂ່າວ ເພື່ອສະໜອງຄວາມສະດວກໃນການເຜີຍແຜ່ຂໍ້ມູນ-ໂຄສະນາໃຫ້ສັງຄົມມີການປະກອບສ່ວນຢ່າງຕັ້ງໜ້າ.
