ຕາມແຫຼ່ງຂ່າວ ສະຖານເອກອັກຄະລັດທະທູດແຫ່ງ ອົດສະຕຣາລີ ປະຈຳ ສປປ ລາວ ໃນວັນທີ 20 ພະຈິກ 2024 ໃຫ້ຮູ້ວ່າ: ທ່ານ ແພັດ ຄອນຣອຍ ລັດຖະມົນຕີກະຊວງປ້ອງກັນປະເທດ ຜູ້ຮັບຜິດ ຊອບວຽກງານອຸດສະຫະກຳປ້ອງ ກັນຊາດ ແລະ ບໍລິຫານແຜນງານ ຈະຕາງໜ້າອົດສະຕຣາລີ ເຂົ້າຮ່ວມກອງປະຊຸມລັດຖະມົນຕີປ້ອງກັນປະເທດ ອາຊີຕາເວັນອອກສຽງໃຕ້ (ອາຊຽນ) ຄັ້ງທີ 11 (ADMM-Plus) ທີ່ ສປປ ລາວ ແລະ ກອງປະຊຸມຄົບຄະນະ ADMM-Plus ແລະ ພົບປະກັບບັນດາຄູ່ເຈລະຈາ ອາຊຽນ ແລະ ໃນພາກພື້ນ ໃນອາທິດນີ້.
ກອງປະຊຸມ ADMM-Plus ຖືເປັນການເຈລະຈາດ້ານການປ້ອງກັນປະເທດລະດັບສູງໃນພາກພື້ນ ໂດຍນໍາເອົາ 10 ປະເທດສະມາຊິກອາຊຽນ ພັນທະມິດ 8 ປະເທດຂອງອາຊຽນ ແລະ ຕີມໍ ເລສເຕ ມາຮ່ວມກັນ.
ປີນີ້ຖືເປັນປີຄົບຮອບ 50 ປີແຫ່ງການຮ່ວມມືລະຫວ່າງອົດສະຕຣາລີ ແລະ ອາຊຽນ ໂດຍທ່ານລັດຖະມົນຕີ ຄອນ ຣອຍ ຈະໄດ້ຮ່ວມເປັນເຈົ້າພາບງານສະເຫຼີມສະຫຼອງເພື່ອລະນຶກເຖິງເຫດການທີ່ສໍາຄັນດັ່ງກ່າວ.
ໃນຖານະເປັນຄູ່ເຈລະຈາທໍາອິດຂອງອາຊຽນ ອົດສະຕຣາລີມຸ່ງໝັ້ນໃນການເຮັດວຽກກັບອາຊຽນເພື່ອຮັກສາ ສັນຕິ ພາບ ສະຖຽນລະພາບ ແລະ ຄວາມຈະເລີນຮຸ່ງເຮືອງ ໃນພາກພື້ນອິນໂດ-ປາຊີຟິກ ໂດຍມີ ອາຊຽນ ເປັນສູນກາງ.
ທ່ານ ແພັດ ຄອນຣອຍ ໄດ້ມີຄຳເຫັນວ່າ: “ຂ້າພະເຈົ້າຮູ້ສຶກເປັນກຽດທີ່ໄດ້ຕາງໜ້າໃຫ້ອົດສະຕຣາລີເຂົ້າຮ່ວມກອງປະຊຸມລັດຖະມົນຕີປ້ອງກັນປະເທດອາຊຽນ ປີນີ້ຄົບ ຮອບ 50 ປີແຫ່ງການພົວພັນຄູ່ຮ່ວມເຈລະຈາ ອາຊຽນ-ອົດສະ ຕຣາລີ ເຊິ່ງເນັ້ນຢໍ້າເຖິງຄວາມສໍາ ຄັນຂອງອົດສະຕຣາລີທີ່ມີຕໍ່ການພົວພັນກັບປະເທດອາຊຽນ ຂ້າພະ ເຈົ້າຫວັງວ່າຈະໄດ້ພົບປະແລກປ່ຽນກັບລັດຖະມົນຕີປ້ອງກັນປະເທດຈາກທົ່ວພາກພື້ນອາຊຽນ ກ່ຽວກັບຄໍາ ໝັ້ນສັນຍາຮ່ວມກັນຕໍ່ສັນຕິພາບ, ສະຖຽນລະພາບ ແລະ ຈະເລີນຮຸ່ງເຮືອງໃນພາກພື້ນອິນໂດປາຊີຟິກ”.
