ຊຸດຝຶກອົບຮົມນັກຂ່າວໃນຫົວຂໍ້ “ການລາຍງານຂ່າວບັນຫາສີຂຽວ” ມື້ທີ6 ຢູ່ພາກໃຕ້ ທີ່ນະຄອນປາກເຊ ແຂວງຈໍາປາສັກ ໄດ້ໄຂຂຶ້ນແລ້ວໃນຕອນເຊົ້າມື້ນີ້ວັນຈັນທີ 18 ພະຈິກ 2024 ທີ່ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງຈໍາປາສັກ .
ຫລັງຈາກທີ່ໄດ້ຮຽນທາງອອນລາຍມາແລ້ວ 5 ວັນໃນທ້າຍເດືອນຜ່ານມາ ຈາກອາຈານຄາຍເຈມ ໂດຍມີນັກຂ່າວຈາກພາກລັດ, ຂະແໜງການ, ອົງການຈັດຕັ້ງທາງສັງຄົມໃນແຂວງຈໍາປາສັກ ເຈົ້າພາບ, ແຂວງເຊກອງ, ສາລະວັນ ແລະ ອັດຕະປືເຂົ້າຮ່ວມທັງໝົດ 21 ຄົນໃນນັ້ນມີຍິງ 12 ຄົນ.
ພາຍຫລັງພິທີໄຂຂຶ້ນຢ່າງເປັນທາງການແລ້ວສຳມະນາກອນກໍ່ໄດ້ຮັບຟັງການບັນລະຍາຍໃນຫົວຂໍ້ປັນຍາປະດິດ (AI) Artificial Intelligence ຈາກປອ.ບຸນເຮັ່ງ ສຸດທິຈັກ ຜູ້ບໍລິຫານວິທະຍຸ ແລະ ເຟສບຸກຂອງວິທະຍຸໄວໜຸ່ມ ເຊິ່ງເປັນຫົວຂໍ້ທີ່ສຳຄັນຫລາຍທີ່ຊ່ວຍນັກຂ່າວໃນການຂຽນຂ່າວ, ບົດໃນຮູບແບບສື່ແບບໃໝ່ເປັນຕົ້ນແມ່ນສື່ສັງຄົມອອນລາຍ Social Media ທີ່ມີຫລາຍຮູບແບບ Platforms ຕ່າງໆ ທີ່ໜ້າສົນໃຈເພາະວ່າ AI ແມ່ນເຄື່ອງມືແບບອັດສະຣິຍະເພື່ອອຳນວຍຄວາມສະດວກໃນການຜະລິດຂ່າວ, ບົດໄດ້ຢ່າງວ່ອງໄວທັນການ ແລະ ຖືກໃຈກັບກຸ່ມເປົ້າໝາຍຫລາຍກວ່າເກົ່າ.
ນອກນັ້ນ ນັກສຳມະນາກອນໄດ້ຮັບຟັງ ແລະ ສົນທະນາໃນຫົວຂໍ້: ການຄຸ້ມຄອງສື່ມວນຊົນ ສະເໜີໂດຍ ທ່ານ ສົມສະຫວາດພົງສາ ຫົວໜ້າກົມສື່ມວນຊົນ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃນນັ້ນລົງເລິກໃນສິ່ງທີ່ຄວນເຮັດແລະ ບໍ່ຄວນເຮັດໃນການອອກຂ່າວຜ່ານລະບົບສື່ມວນຊົນໃນຍຸກປັດຈຸບັນ ບົນຈິດໃຈເນື້ອໃນ ຂອງກົດໝາຍສື່ມວນຊົນສະບັບປັບປຸງໃນປີ 2016.
ຊຸດຝຶກອົບຮົມຄັ້ງນີ້ໄດ້ຮັບການສະໜັບສະໜູນຈາກສະຫະພາບເອີຣົບ ແລະ ຈະໄດ້ດຳເນີນໄປເປັນເວລາ 5 ວັນຈຶ່ງຈະສິ້ນສຸດລົງ.
