ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ແລະ ພັນລະຍາ ພ້ອມກັບຄະນະຜູ້ແທນຂັ້ນສູງ ຫວຽດນາມ ໄດ້ເດີນທາງໄປຮອດສະໜາມບິນ ກາເລໂອ ນະຄອນຣີໂອ ເດ ຈາເນໂຣ ປະເທດເບຣຊິນ ເພື່ອເຂົ້າຮ່ວມກອງປະຊຸມສຸດຍອດ ກຸ່ມບັນດາພື້ນຖານເສດຖະກິດພັດທະນາ ແລະ ຫາກໍພົ້ນເດັ່ນຂຶ້ນແຖວໜ້າໂລກ (G20) ແລະ ດຳເນີນການເຄື່ອນໄຫວສອງຝ່າຍຢູ່ ນະຄອນຣີໂອ ເດ ຈາເນໂຣ ໃນລະຫວ່າງວັນທີ 16 – 19 ພະຈິກ ນີ້, ຕາມຄຳເຊີ້ອເຊີນຂອງ ທ່ານ ລຸຍ ອິນ່າຊິໂອ ລູລາ ດາ ຊິລວາ (Luiz Inacio Lula da Silva) ປະທານາທາບໍດີ ເບຣຊິນ ປະທານ G20 ປີ 2024 ແລະ ພັນລະຍາ.
ຂ່າວລະບຸວ່າ: ພາຍຫຼັງເດີນທາງຮອດ ນະຄອນ ຣີໂອ ເດ ຈາເນໂຣ, ທ່ານ ຟ້າມມິງຈິງ ແລະ ພັນລະຍາໄດ້ພົບປະກັບພະນັກງານສະຖານທູດ ແລະ ປະຊາຄົມຊາວຫວຽດນາມ ທີ່ອາໄສຢູ່ເບຣຊິນ. ໃນການພົບປະ, ທ່ານ ຟ້າມມິງຈິງ ກ່າວວ່າ: ໃນສະພາບການໂລກພວມປະສົບກັບຄວາມຫຍຸ້ງຍາກຫຼາຍຢ່າງ ການເຕີບໂຕເສດຖະກິດ ແລະ ການລົງທຶນຂອງ ຫວຽດນາມ ຍັງມີການຟື້ນຟູຢ່າງຕັ້ງໜ້າ. ການຊ່ວຍເຫຼືອສັງຄົມ, ຊີວິດປະຊາຊົນສືບຕໍ່ໄດ້ຮັບການປັບປຸງ, ສະພາບການເມືອງ – ສັງຄົມ ໄດ້ຮັກສາເປັນປົກກະຕິ, ການປ້ອງກັນຊາດ, ປ້ອງກັນຄວາມສະຫງົບ ໄດ້ຮັບການປັບປຸງ, ການທູດ ແລະ ການເຊື່ອມໂຍງເຂົ້າກັບສາກົນ ໄດ້ຮັບການຍູ້ແຮງ, ບັນລຸໝາກຜົນສຳຄັນຫຼາຍຢ່າງ.
ທ່ານ ຟ້າມມິງຈິງ ປາຖະໜາຢາກໃຫ້ພໍ່ແມ່ປະຊາຊົນ ຫວຽດນາມ ທີ່ອາໄສຢູ່ ເບຣຊິນ ສືບຕໍ່ເສີມຂະຫຍາຍຈິດໃຈສາມັກຄີ, ກໍ່ສ້າງຕົວ, ຮັກສາສີສັນວັດທະນະທຳຊາດ, ປະຕິບັດກົດໝາຍ ແລະ ປັບຕົວເຂົ້າກັບການດຳລົງຊີວິດຂອງປະເທດປະຈຳຖິ່ນເປັນຢ່າງດີ, ແຕ່ລະຄົນແມ່ນນັກການທູດຄົນໜຶ່ງ, ແມ່ນຂົວເຊື່ອມຕໍ່ເພີ່ມພູນຄູນສ້າງການພົວພັນ ຫວຽດນາມ – ເບຣຊິນ.
