ກະຊວງແຮງງານ ແລະສະຫວັດດີການສັງຄົມ (ຮສສ) ຈັດກິດຈະກໍາຍ່າງເພື່ອສຸຂະພາບ ໃນໂອກາດວັນຄຸ້ມຄອງໄພພິບັດແຫ່ງຊາດອາຊຽນ ແລະ ວັນຫຼຸດຜ່ອນໄພພິບັດສາກົນ ໃນຫົວຂໍ້ “ເສີມສ້າງການມີສ່ວນຮ່ວມຂອງສັງຄົມໃນການຟື້ນຟູຫຼັງໄພພິບັດຢ່າງຮອບດ້ານແບບຍືນຍົງ” ໄດ້ຈັດຂຶ້ນວັນທີ 16 ພະຈິກ 2024 ນີ້ ສວນສາທາລະນະບຶງທາດຫຼວງ ເມືອງໄຊເສດຖາ, ນະຄອນຫຼວງວຽງຈັນ ໂດຍການເຂົ້າຮ່ວມ ແລະ ເປັນປະທານຂອງທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີ ກະຊວງປ້ອງກັນປະເທດ ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ (ຄພສ) ທ່ານນາງ ໃບຄໍາ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມຮອງປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ (ຄພສ) , ມີຮອງປະທານຜູ້ປະຈໍາການຄະນະກໍາມະການຄຸ້ມຄອງໄພພິບັດຂັ້ນສູນກາງ, ຮອງເຈົ້າຄອງນະຄອນຫຼວງວຽງຈັນ, ເອກອັກຄະລັດຖະທູດແຫ່ງ ສ ເກົາຫຼີ ປະຈໍາ ສປປ ລາວ ພ້ອມບັນດາພາກສ່ວນກ່ຽວຂ້ອງເຂົ້າຮ່ວມ.
ທ່ານ ວົງຄໍາ ພັນທະນຸວົງ ຫົວໜ້າກົມສັງຄົມສົງເຄາະກອງເລຂາ ຄພສ ໄດ້ລາຍງານວ່າ: ວັນຄຸ້ມຄອງໄພພິບັດແຫ່ງຊາດອາຊຽນ ແລະ ວັນຫຼຸດຜ່ອນໄພພິບັດສາກົນໃນຫົວຂໍ້ “ເສີມສ້າງການມີສ່ວນຮ່ວມຂອງສັງຄົມໃນການຟື້ນຟູຫຼັງໄພພິບັດຢ່າງຮອບດ້ານແບບຍືນຍົງ”. ຊຶ່ງສອດຄ່ອງກັບຄໍາຂວັນວັນຄຸ້ມຄອງໄພພິບັດອາຊຽນ ແລະ ວັນຫຼຸດຜ່ອນຄວາມສ່ຽງໄພພິບັດສາກົນໃນປີ 2024 ນີ້. ສໍາລັບ ສປປ ລາວ ໄດ້ກຳນົດເອົາວັນທີ 13 ຕຸລາ ເປັນວັນ ຄພສ ເຊັ່ນດຽວກັນກັບຫຼາຍໆປະເທດໃນທົ່ວໂລກຈະມີການຈັດພິທີລະນຶກເຖິງວັນຄຸ້ມຄອງໄພພິບັດແຫ່ງຊາດ, ວັນຄຸ້ມຄອງໄພພິບັດອາຊຽນ ແລະ ວັນຫຼຸດຜ່ອນຄວາມສ່ຽງໄພພິບັດສາກົນຂອງຕົນຂຶ້ນໃນໃນໄລຍະເດືອນຕຸລາຂອງທຸກໆ ປີ, ໃນຫຼາຍປີທີ່ຜ່ານມາ, ເຫດການໄພພິບັດທາງທຳມະຊາດໃນທົ່ວໂລກແມ່ນມີທ່າອ່ຽງເກີດຂຶ້ນນຖີ່ ແລະ ມີຄວາມຮຸນແຮງຂຶ້ນ ອັນເນື່ອງມາຈາກການປ່ຽນແປງຂອງສະພາບດິນຟ້າອາກາດ.
ສປປ ລາວ ເຮົາໃນແຕ່ລະປີ ກໍໄດ້ເກີດມີໄພພິບັດນໍ້າຖ້ວມຢູ່ບັນດາແຂວງຂອບເຂດທົ່ວປະເທດ, ຄືດັ່ງໃນປີ 2024 ນີ້ ໄດ້ຮັບຜົນກະທົບຈາກພາຍຸຈໍານວນ 4 ຫົວ: ພາຍາດີເພຣດຊັນ, ພຣະພິລຸນ, ຢາກິ ແລະ ພາຍຸຊູຣິກ ສົ່ງຜົນກະທົບຕໍ່ເສດຖະກິດ, ສິ່ງແວດລ້ອມ ແລະ ຊີວິດການເປັນຢູ່ຂອງປະຊາຊົນຢ່າງຫຼວງຫຼາຍ, ໂດຍສະເພາະຢູ່ບັນດາແຂວງພາກເໜືອ, ມີປະຊາຊົນ ໄດ້ຮັບຜົນກະທົບຈຳນວນສອງແສນກວ່າຄົນ, ເສຍຊີວິດ 13 ຄົນ, ຄາດຄະເນເປັນມູນຄ່າເສຍຫາຍຫຼາຍກວ່າ 6 ພັນຕື້ກີບ. ຕໍ່ກັບສະພາບຄວາມເສຍຫາຍດັ່ງກ່າວ ລັດຖະບານ, ອົງການປົກຄອງທ້ອງຖິ່ນ ກໍຄືຄະນະກຳມະການຄຸ້ມຄອງໄພພິບັດແຕ່ລະຂັ້ນ ໄດ້ມີການກຽມຄວາມພ້ອມຮັບມີດ້ານແຕ່ຫົວທີ ແລະ ໄດ້ສຸມໃສ່ໃຫ້ການຊ່ວຍເຫຼືອແກ້ໄຂໄພພິບັດສຸກເສີນ, ຊ່ວຍເຫຼືອຟື້ນຟູຮີບດ່ວນ ຢູ່ໃນຂອບເຂດທົ່ວປະເທດຢ່າງທັນການ ແລະ ປັດຈຸບັນຍັງສືບຕໍ່ໃຫ້ການຊ່ວຍເຫຼືອຟື້ນຟູຫຼັງໄພພິບັດໃນແຕ່ລະດ້ານ ເປັນຕົ້ນແມ່ນການແກ້ໄຂຊີວິດການການຢູ່, ການສ້ອມແປງໂຄງລ່າງພື້ນຖານ, ດ້ານການຜະລິດກະສິກຳ ເພື່ອປັບປຸງຊີວິດການເປັນຢູ່ຂອງຜູ້ປະສົບໄພພິບັດ ໃຫ້ຄືນສູ່ສະພາບປົກະຕິໂດຍໄວ. ໃນໄລຍະທີ່ຜ່ານມາ ທຸກພາກສ່ວນໄດ້ມີການປະກອບສ່ວນຢ່າງຫ້າວຫັນ ໂດຍສະເພາະໃນປີ 2024 ນີ້ ລັດຖະບານ ກໍຄືຄະນະກຳມະການຄຸ້ມຄອງໄພພິບັດໃນແຕ່ລະຂັ້ນ ໄດ້ຮັບການຊ່ວຍເຫຼືອບໍລິຈາກສົມທົບຊ່ວຍເຫຼືອຜູ້ປະສົບໄພພິບັດເປັນປະເພດ ເຄື່ອງອຸປະໂພກ ບໍລິໂພກ, ວັດຖຸອຸປະກອນ, ເປັນເງິນ ຈໍານວນຫຼວງຫຼາຍສົມຄວນ ແລະ ໄດ້ຈັດສັນເພື່ອນໍາໄປຊ່ວຍເຫຼືອປະຊາຊົນຜູ້ປະສົບໄພພິບັດ ໃນຂອບເຂດທົ່ວປະເທດຢ່າງທັນການໂດຍສະເພາະໃນເຂດພື້ນທີ່ ທີ່ໄດ້ຮັບຜົນກະທົບໜັກ. ພ້ອມນີ້, ດ້ານການຊ່ວຍເຫຼືອສຸກເສີນຮີບດ່ວນ, ການຟື້ນຟູຫຼັງໄພພິບັດແມ່ນໄດ້ເອົາໃຈໃສ່ເປັນພິເສດໃນການຊ່ວຍເຫຼືອ ຕໍ່ເປົ້າໝາຍທີ່ມີຄວາມຄວາມສ່ຽງ ເປັນຕົນ ແມ່ຍິງ, ເດັກນ້ອຍ, ຜູ້ສູງອາຍຸ ແລະ ຜູ້ພິການ ແນ່ໃສ່ຮັບປະກັນການບໍ່ປະຖິ້ມໃຜໄວ້ຂ້າງຫຼັງ.
ທ່ານ ວົງຄໍາ ພັນທະນຸວົງໄດ້ລາຍງານຕື່ມວ່າ: ພາຍຫຼັງເກີດມີໄພພິບັດຂຶ້ນໃນແຕ່ລະຄັ້ງ, ບັນດາຂະແໜງການທີ່ກ່ຽວຂ້ອງ ແມ່ນໄດ້ສຸມໃສ່ແກ້ໄຂ ສ້ອມແປງໂຄງລ່າງພື້ນຖານ ຫຼື ສ້າງໃໝ່, ແຕ່ພວກເຮົາຄວນຄໍານຶງເຖິງການສ້າງຄືນໃໝ່ໃຫ້ດີຂຶ້ນກວ່າເກົ່າ. ການຟື້ນຟູແບບຍືນຍົງ ແມ່ນການແກ້ໄຂຕົ້ນຕໍຂອງ ຄວາມສ່ຽງ, ສ້າງຄວາມເຂັ້ມແຂງດ້ານໂຄງລ່າງພື້ນຖານ, ປົກປັກຮັກສາລະບົບນິເວດທຳມະຊາດ, ຊຸກຍູ້ຄວາມໝັ້ນຄົງດ້ານເສດຖະກິດ, ການສ້າງຄືນໃໝ່ໃຫ້ດີກວ່າເກົ່າ ເປັນພື້ນຖານພື້ນຖານທີ່ເຂັ້ມແຂງໃນການຫຼຸດຜ່ອນຄວາມສ່ຽງໄພພິບັດໃນອະນາຄົດ. ສປປ ລາວ ພວກເຮົາໄດ້ລົງທຶນໃສ່ການປູກປ່າຄືນໃໝ່, ສົ່ງເສີມການຜລິດກະສິກຳແບບຍືນຍົງ ແລະ ສ້າງຄວາມເຂັ້ມແຂງໃຫ້ແກ່ການຄຸ້ມຄອງຊັບພະຍາກອນນໍ້າ ເພື່ອຫຼຸດຜ່ອນຜົນກະທົບຈາກໄພ ອັນຕະລາຍຈາກການປ່ຽນແປງສະພາບດິນຟ້າອາກາດ, ຂໍ້ລິເລີ່ມເຫຼົ່ານີ້ ບໍ່ພຽງແຕ່ປົກປ້ອງສິ່ງແວດລ້ອມເທົ່ານັ້ນ, ແຕ່ຍັງສະໜັບສະໜູນການດໍາລົງຊີວິດແບບຍືນຍົງສໍາລັບຊຸມຊົນ ແລະ ຫຼຸດຜ່ອນຄວາມສ່ຽງຕໍ່ໄພພິບັດໃນອະນາຄົດ
