ເພື່ອເປັນການຫວນຄືນມູນເຊື້ອແຫ່ງການເຕີບໃຫຍ່ຂະຫຍາຍຕົວຂອງວັນສ້າງຕັ້ງສື່ມວນຊົນ ແລະ ການພິມຈຳໜ່າຍ ຄົບຮອບ 74 ປີ (13 ສິງຫາ 1950 – 13 ສິງຫາ 2024) ໃນວັນທີ 16 ສິງຫາ ນີ້ ທີ່ສູນກາງຊາວໜຸ່ມ ປະຊາຊົນ ປະຕິວັດລາວ (ສຊປລ) ໄດ້ຈັດພິທີປາຖະກະຖາມູນເຊື້ອວັນສ້າງຕັ້ງສື່ມວນຊົນ ແລະ ການພິມຈຳໜ່າຍ ເປັນກຽດປາຖະກະຖາໂດຍທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ການທ່ຽວທ່ຽວ (ຖວທ), ມີທ່ານ ທອງຈັນ ພູມີພັນ ຮອງເລຂາຄະນະບໍລິຫານງານ ສຊປລ, ມີຫົວໜ້າກົມ, ຮອງກົມ ພ້ອມພະນັກງານທົ່ວ ສປຊລ ແລະ ບັນດາສື່ຕ່າງໆເຂົ້າຮ່ວມ.
ທ່ານ ໂພສີ ແກ້ວມະນີວົງ ໄດ້ຍົກໃຫ້ເຫັນວ່າ: ຕະຫຼອດໄລຍະ 74 ປີ ຜ່ານມາວຽກງານສື່ມວນຊົນຂອງລາວໄດ້ເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບກາຍເປັນກະບອກສຽງທີ່ສໍາຄັນໃນການໂຄສະນາແນວທາງນະໂຍບາຍຂອງພັກ-ລັດ, ປຸກລະດົມນໍ້າໃຈຮັກຊາດຂອງປະຊາຊົນລາວບັນດາເຜົ່າ, ເຜີຍແຜ່ຂໍ້ມູນຂ່າວສານທາງດ້ານການ
ເມືອງ, ວິທະຍາສາດ, ເສດຖະກິດ-ສັງຄົມ, ສາລະໜ້າຮູ້, ໂຄສະນາຕ້ານປະກົດການຫຍໍ້ຕ່າງໆໃນສັງຄົມ, ຕອບໂຕ້ຂ່າວປອມ ແລະ ຂໍ້ມູນທີ່ບິດເບືອນຄວາມຈິງ ແລະ ປະຫວັດ, ມູນເຊື້ອ ແລະ ຜົນງານທີ່ພົ້ນເດັ່ນຂອງວຽກງານສື່ມວນຊົນ ແລະ ການພິມຈຳໜ່າຍ, ໃນຂະບວນວິວັດແຫ່ງການກຳເນີດ ແລະ ຂະຫຍາຍຕົວຂອງສັງຄົມມະນຸດ ແມ່ນເລີ່ມມີພາສາປາກເວົ້າ ແລະ ຕົວໜັງສື, ຄົນເຮົາກໍເລີ່ມມີການຕິດຕໍ່ພົວພັນສົ່ງຂ່າວທາງຈົດໝາຍ, ກ້າວຂຶ້ນມີໃບຂ່າວ, ໃບປິວ ແລະ ມີໜັງສືພິມ, ວິທະຍຸ, ໂທລະພາບ ແລະ ສື່ແບບໃໝ່ຕາມລໍາດັບ ນັ້ນແມ່ນທີ່ມາຂອງການກຳເນີດສື່ມວນຊົນ ຂອງແຕ່ລະປະເທດ, ສະເພາະປະເທດ ສປປ ລາວ ປະຫວັດສື່ມວນຊົນລາວຍາມໃດກໍຕິດພັນສະນິດແໜ້ນ ກັບປະຫວັດສາດຂອງຊາດ, ຂອງພັກ, ຂອງການປະຕິວັດ ແລະ ຂອງປະຊາຊົນລາວບັນດາເຜົ່າ; ສະແດງອອກໃນມື້ສ້າງຕັ້ງແນວລາວອິດສະຫຼະ, ພັກເຮົາກໍໄດ້ສ້າງຕັ້ງໜັງສືພິມປະຕິວັດສະບັບທຳອິດ ແລະ ສ້າງຕັ້ງໂຮງພິມປະຕິວັດຂຶ້ນໃນວັນດຽວກັນຄື ວັນທີ 13 ສິງຫາ 1950 ຊຶ່ງແມ່ນທີ່ມາຂອງວັນສື່ມວນຊົນ ແລະ ການພິມຈຳໜ່າຍ ມາຮອດປັດຈຸບັນ.
ທ່ານ ໂພສີ ແກ້ວມະນີວົງ ກ່າວຕື່ມວ່າ: ສິ່ງທີ່ຄວນເອົາໃຈໃສ່ຕື່ມ ດ້ວຍມູນເຊື້ອ ແລະ ຜົນງານພາຍໃຕ້ການນໍາພາ, ຊີ້ນໍາຂອງພັກ ແລະ ການຄຸ້ມຄອງຂອງລັດ, ສື່ມວນຊົນ ແລະ ການພິມຈຳໜ່າຍ ຕ້ອງສືບຕໍ່ບຸກບືນ, ປັບປຸງພັດທະນາຕົນເອງຢູ່ເລື້ອຍໆ ສ້າງການຫັນປ່ຽນທີ່ແຂງແຮງ ແລະ ກ້າວໄປສູ່ຄຸນນະພາບ ແລະ ທັນສະໄໝຕາມແຜນຍຸດທະສາດ ທີ່ກຳນົດໄວ້ນັ້ນໃຫ້ປະກົດຜົນເປັນຈິງ ແລະ ທັງໝົດເປັນພາລະໜ້າທີ່ອັນໜັກໜ່ວງຂອງພວກເຮົາ ທີ່ຈະຕ້ອງພ້ອມກັນສືບຕໍ່ສູ້ຊົນ, ບຸກບືນ, ຜ່ານຜ່າ ຄວາມຫຍຸ້ງຍາກນາໆປະການເຮັດໃຫ້ວຽກງານສື່ມວນຊົນ ແລະ ການພິມຈຳໜ່າຍ ມີຄວາມເຂັ້ມແຂງເທື່ອລະກ້າວໂດຍສະເພາະ ຮັບປະກັນການປະຕິບັດໜ້າທີ່ການເມືອງທີ່ພັກ, ລັດ ແລະ ປະຊາຊົນ ມອບໝາຍໃຫ້.
ສະເພາະສື່ມວນຊົນຊາວໜຸ່ມລາວ ປີ 2024 ນີ້ ກໍຄົບຮອບ 45 ປີ (1 ມັງກອນ 1979 – 1 ມັງກອນ 2024) ຊຶ່ງກໍເປັນສື່ມວນຊົນໜຶ່ງທີ່ມີບົດບາດສໍາຄັນໃນການເປັນກະບອກສຽງໃນການໂຄສະນາເຜີຍແຜ່ແນວທາງນະໂຍບາຍ ຂອງພັກ-ລັດ ແລະ ຂໍ້ມູນຂ່າວສານຕ່າງໆທີ່ເປັນປະໂຫຍດໃຫ້ຊາວໜຸ່ມ, ໄວໜຸ່ມ, ເຍົາວະຊົນ ແລະ ສັງຄົມໄດ້ຮັບຮູ້, ເຂົ້າໃຈ ແລະ ປຸກລະດົມຂະບວນການຊາວໜຸ່ມເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມແນວທາງຂອງພັກ-ລັດ.
