ຕອນເຊົ້າວັນທີ 11 ສິງຫາ 2024ນີ້ ຄະນະນັກກິລາເຕະບານເຍົາວະຊົນລາວ ຮຸ່ນອາຍຸບໍ່ເກີນ 11 ປີ ຂອງສະໂມສອນ ອາຣເອັນເອັສ ອາຄາເດມີ້ (RNS Academy) ທີມນ້ອງໃໝ່ໃນວົງການບານເຕະເຍົາວະຊົນລາວ ໄດ້ເດີນທາງໄປເຂົ້າຮ່ວມແຂ່ງຂັນລາຍການໃຫຍ່ລະດັບສາກົນ PEACE CUP 2024 ທີ່ນະຄອນເຊິນຢາງ, ແຂວງຫລຽວໜິງ ສປ ຈີນ ເຊິ່ງລາຍການນີ້ຈັດຂຶ້ນລະຫວ່າງວັນທີ 12-18 ສິງຫານີ້, ນຳຄະນະໂດຍ ທ່ານ ຄອນສະຫວັນ ສິດທິໄທ ຮອງປະທານສະຫະພັນບານເຕະນະຄອນ ຫລວງວຽງຈັນ, ຫົວໜ້າຄະນະນັກກິລາ, ທ່ານ ກະລຸນາ ສຸວັນນະເມທີ ປະທານສະໂມ ສອນ ພ້ອມດ້ວຍ ຄູຝຶກ ແລະ ນັກກິລາ ລວມ 17 ຄົນ.
ທ່ານ ກະລຸນາ ສຸວັນນະເມທີ ປະທານສະໂມສອນ ອາຣເອັນເອັສ ອາຄາເດມີ້ RNS Academy ໃຫ້ຮູ້ວ່າ: ສະໂມສອນ RNS Academy ເປັນສະໂມສອນນ້ອງໃໝ່ ຫາກໍສ້າງຂຶ້ນເມື່ອເດືອນມີນາປີນີ້ ເຊິ່ງທິດທາງແຜນການຂອງສະໂມສອນ ພະຍາຍາມສ້າງໂອກາດໃຫ້ນັກກິລາໄດ້ມີການເຄື່ອນໄຫວຝຶກແອບແຂ່ງຂັນຢ່າງຕໍ່ເນື່ອງ ທັງພາຍໃນ ແລະ ຕ່າງປະເທດ ໂດຍສະເພາະຫວ່່າງບໍ່ດົນມານີ້ ໄດ້ເຂົ້າຮ່ວມເຄື່ອນໄຫວຢູ່ຊຽງໃໝ່ ປະເທດໄທ ສາມາດຍາດໄດ້ອັນສອງ ເຊິ່ງເປັນການເປີດປະສົບການທີ່ກວ້າງ ຂວາງໃຫ້ນັກກິລາ ເປົ້າໝາຍຂອງສະໂມສອນໃນການເຂົ້າຮ່ວມງານນີ້ ຈະພະຍາຍາມໃຫ້ເຂົ້າຮອບເລິກໆ ຫລື ສູ້ຊົນໃຫ້ຕິດອັນດັບ 1 ໃນ 3. ຍ້ອນທິມນັກກິລາພວກເຮົາມີລະບຽບວິໄນດີ ແຕ່ວັນຈັນຫາວັນສຸກ ແມ່ນຝຶກຊ້ອມຢູ່ເດີ່ນສະໂມສອນລ້ານຊ້າງ ສ່ວນວັນເສົາ-ອາທິດ ແມ່ນຝຶກຊ້ອມຢູ່ເດີ່ນເຟີແຣຣີ ລາຍການນີ້ ມີ 900 ທີມຈາກທົ່ວໂລກເຂົ້າຮ່ວມຊິງໄຊ.
ສ່ວນຄູຝຶກ ສຸກທະວີ ສູນດາລາ ອາດີດຜູ້ຮັກສາປະຕູທີມຊາດລາວ ໄດ້ໃຫ້ຮູ້ວ່າ: ນັກກິລາຊຸດນີ້ແມ່ນລູກຫລານຊາວນະຄອນຫລວງວຽງຈັນ ສ່ວນຫລາຍມາຈາກເມືອງຫາດຊາຍຟອງ ເບື້ອງຕົ້ນຄັດໃຫ້ເຫລືອ 40 ຄົນ, ຈາກນັ້ນ ຄັດເອົາ 20 ຄົນ ແລະ 10 ຄົນສຸດທ້າຍ, ຜ່ານການຝຶກຊ້ອມເປັນເວລາຫລາຍເດືອນ ທີມມີຄວາມພ້ອມແລ້ວ ທີ່ຈະຍາດແຍ່ງເອົາຜົນງານທີ່ດີທີ່ສຸດ, ສ່ວນຈຸດທີ່ນັກກິລາຕ້ອງປັບປຸງຕື່ມແມ່ນເລື່ອງສະພາບຈິດໃຈ ຄວາມຕື່ນເຕັ້ນ ເພາະນີ້ແມ່ນເວລາທີລະດັບໂລກ.
ທ່ານຄອນສະຫວັນ ສິດທິໄທ ຮອງປະທານສະຫະພັນບານເຕະນະຄອນຫລວງວຽງ ຈັນ ກ່າວກ່ອນອອກເດີນທາງວ່າ: ອີງຕາມການເຊື້ອເຊີນຝ່າຍຈັດການແຂ່ງຂັນ ຄືລາຍການພີສຄັບ PEACE CUP 2024 ທີ່ເມືອງເຊິນຢາງ ສປ ຈີນ ແລະໄດ້ຮັບອະນຸ ມັດຈາກເຈົ້າຄອງນະຄອນຫລວງວຽງຈັນ ຂ້າພະເຈົ້າ ໄດ້ນໍາພາຄະນະນັກກິລາເຕະບານເຍົາວະຊົນລາວ ຮຸ່ນອາຍຸບໍ່ເກີນ 11 ປີ ຂອງສະໂມສອນ ອາຣເອັນເອັສ ອາຄາເດມີ້ ເຂົ້າຮ່ວມແຂ່ງຂັນ ເຊິ່ງສະໂມສອນນີ້ແມ່ນໜຶ່ງໃນຫ້າ ສະໂມສອນຕົວແບບທີ່ພວກເຮົາສ້າງຂຶ້ນມາ ນັບແຕ່ຮຸ່ນອາຍຸ6ປີ ຈົນເຖິງອາຍຸ16ປີ ທີ່ຕິດພັນກັບການສຶກສາ.
ນ້ອງ ເທບເທວາ ສຸວັນນະເມທີ ຫລື ນ້ອງ ແດນນີ້ ອາຍຸ 10 ປີ ເປັນນັກເຕະຢູ່ສະໂມສອນ RNS ເລ່ນຢູ່ຕຳແໜ່ງກອງໜ້າ ແລະ ປີກຂວາ.ຕົວຫລັກຂອງທີມ ນັກເຕະສາຍເລືອດປະສົມ ລາວ-ໂຄລົມເບຍ ເຊິ່ງເປັນນັກເຕະເຍົາວະຊົນລາວຜູ້ທຳອິດ ທີ່ໄດ້ຮຽນຮູ້ກິລາບານເຕະ ໃນເຂດອາເມລິກາລາຕິນ ພາຍຫລັງສໍາເລັດການແຂ່ງຂັນຄັ້ງນີ້ແລ້ວ ຈະໄປຮ່ວມຝຶກຊ້ອມກັບສະໂມສອນ ໂບຣຸສເຊຍ ດັອດມຸນ ໃນເຢຍລະມັນ ກ່າວຕໍ່ສື່ມວນຊົນວ່າ ພ້ອມເຮັດເຕັມທີ່ ເພື່ອຍາດຊິງເອົາຂັນລາງວັນໃຫ້ໄດ້.
