ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ (ສພຂ) ໄຊສົມບູນ II ໄດ້ອັດລົງຢ່າງຈົບງາມ ວັນທີ 2 ສິງຫາຜ່ານມານີ້, ທີ່ສະໂມສອນເມືອງອະນຸວົງ ພາຍຫຼັງທີໄດ້ດຳເນີນມາເປັນເວລາ 3 ວັນ ໂດຍການເປັນປະທານຂອງທ່ານ ແດງ ປະທຸມທອງ ປະທານສະພາປະຊາຊົນ ແຂວງໄຊສົມບູນ, ມີການນຳພັກ-ລັດຂອງແຂວງ, ບັນດາສະມາຊິກສະພາແຫ່ງຊາດ ປະຈຳຂດລືອກຕັ້ງທີ່ 18, ສະມາຊິກສະພາປະຊາຊົນແຂວງ, ຫົວໜ້າພະແນກການ, ອົງການ, ກົມກອງ ອ້ອມຂ້າງແຂວງ ແລະ ແຂກຖືກເຊີນເຂົ້າຮ່ວມ.
ໂອກາດນີ້ ທ່ານ ແດງ ປະທຸມທອງ ໄດ້ກ່າວອັດກອງປະຊຸມວ່າ: ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ແຂວງໄຊສົມບູນ ຊຸດທີ II ແມ່ນດຳເນີນໄປດ້ວຍບັນຍາກາດຟົດຟື້ນ, ບົນຈິດໃຈແຫ່ງການເສີມຂະຫຍາຍສິດປະຊາທິປະໄຕ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ ຕະຫຼອດໄລຍະການດຳເນີນກອງປະຊຸມ ບັນດາທ່ານບັນດາສະມາຊິກສະ ພາແຫ່ງຊາດປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ໄດ້ເຊີດຊູຄວາມຮັບຜິດຊອບສູງ ໃນການຄົ້ນຄວ້າ, ປະກອບຄຳຄິດຄຳເຫັນ ຢ່າງມີເຫດຜົນ, ມີຈຸດສຸມ, ເລິກເຊິ່ງ ແລະ ກວ້າງຂວາງ ພ້ອມທັງມີຄວາມເປັນເອກະພາບສູງ.
ກອງປະຊຸມໄດ້ພິຈາລະນາ ແລະ ຮັບຮອງເອົາບັນດາວຽກງານທີ່ສໍາຄັນຂອງແຂວງ ເປັນຕົ້ນ: ພິຈາ ລະນາ ແລະ ຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນພັດ ທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈຳ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2024 ຂອງແຂວງໄຊສົມບູນ, ໄດ້ຮັບຟັງ ກ່ຽວກັບການຈັດຕັ້ງປະຕິບັດວຽກງານແກ້ໄຂຄວາມທຸກຍາກຂອງແຂວງ ໃນໄລຍະຜ່ານມາ ແລະ ທິດທາງແຜນການຕໍ່ໜ້າ ຕິດພັນກັບການຈັດຕັ້ງປະຕິບັດມະຕິກອງປະຊຸມສະພາປະຊາຊົນແຂວງ, ຮັບຟັງ ການຈັດຕັ້ງປະຕິບັດ ດໍາລັດ 414/ລບ ຂອງລັດຖະບານ ໄລຍະຜ່ານມາ ແລະ ທິດທາງແຜນການຕໍ່ໜ້າ, ຮັບຟັງ ການຈັດຕັ້ງປະຕິບັດ ໂຄງການລົງທຶນແຮ່ທາດໃນໄລຍະຜ່ານມາ ແລະ ການກຳນົດທິດທາງໃນແຜນການຕໍ່ໜ້າ, ພິຈາລະນາ ແລະ ຮັບຮອງເອົາບົດລາຍງານຂອງ ຄະນະປະຈໍາສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນ ເທື່ອທີ 6 ຫາ ກອງປະຊຸມສະໄໝສາມັນ ເທື່ອທີ 7 ແລະ ແຜນການຮອດກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງໄຊສົມບູນ ຊຸດທີ II.
ກອງປະຊຸມເຫັນດີເປັນເອກະພາບມອບໃຫ້ອົງການປົກຄອງແຂວງ ສືບຕໍ່ຮັກສາສະຖຽນລະພາບທາງດ້ານການເມືອງ, ຮັບປະກັນໃຫ້ແຂວງມີຄວາມສະຫງົບ, ຄວາມເປັນລະບຽບຮຽບຮ້ອຍໂດຍພື້ນຖານ, ຖືເອົາການພັດທະນາເສດຖະກິດເປັນໃຈກາງ, ເອົາການຜະລິດກະສິກຳເປັນສິນຄ້າ ຕິດພັນກັບການທ່ອງທ່ຽວແບບອະນຸລັກ ໂດຍປະຊາຊົນມີສ່ວນຮ່ວມ ໄປຄ່ຽງຄູ່ກັບການປ້ອງກັນຊາດ-ປ້ອງກັນຄວາມສະຫງົບຢ່າງໜັກແໜ້ນ, ສ້າງແຂວງໃຫ້ກາຍເປັນແນວຫຼັງຍຸດທະສາດ, ເປັນຖານທີ່ໝັ້ນປະຕິວັດໃນໄລຍະໃໝ່, ເປັນເຂດເສດຖະກິດສີຂຽວ ແລະ ພັດທະນາແຂວງໃຫ້ກາຍເປັນໃຈກາງບໍລິການທາງຜ່ານດ້ານເສດຖະກິດ ຕາມທິດພັດທະນາສີຂຽວ ແລະ ຍືນຍົງ ເພື່ອໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ.
(ບ.ກ: ຄຳສາວ ເລືອງຄຳທິບ; ຂ່າວ: ພຸດທະສອນ ເວດສະວົງ)
