ສື່ມວນຊົນມີບົດບາດສຳຄັນ ໃນການປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ນັບແຕ່ອະດີດຈົນເຖິງປັດຈຸບັນ, ສື່ມວນຊົນແມ່ນຜູ້ນໍາເອົາແນວທາງແຜນນະໂຍບາຍຂອງພັກ-ລັດ ໂຄສະນາເຜີຍແຜ່ລົງສູ່ປະຊາຊົນໃຫ້ຮັບຮູ້ເຂົ້າໃຈຢ່າງຈະແຈ້ງ ແລະ ນຳເອົາຂໍ້ມູນຂ່າວສານທີ່ເປັນປະໂຫຍດໄປຮອດໄປເຖິງປະຊາຊົນ ໂດຍຜ່ານຫລາຍຊ່ອງທາງຫລາຍຮູບການ ໃຫ້ມີຄວາມວ່ອງໄວ ແລະ ຮັບປະກັນຄວາມຖືກຕ້ອງເພື່ອເປັນການໂຄສະນາເຜີຍແຜ່ເຮັດໃຫ້ທົ່ວໂລກໄດ້ຮູ້ເຖິງປະເທດລາວຫລາຍຂຶ້ນ.
ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ໃຫ້ສໍາພາດຕໍ່ນັດຂ່າວສຳນັກຂ່າວສານປະເທດລາວ ໃນວັນທີ 1 ສິງຫາ 2024 ເນື່ອງໃນໂອກາດວັນສື່ມວນຊົນ ແລະ ການພິມຈຳໜ່າຍ ຄົບຮອບ 74 ປີ ໃນວັນທີ 13 ສິງຫາ ທີ່ຈະມາເຖິງນີ້ ວ່າ: ສື່ມວນຊົນໄດ້ຮັບການສ້າງຕັ້ງຂຶ້ນ ເປັນກອງກຳລັງປະຈັນບານຂອງພັກ ຕໍ່ສູ້ໃນສະໜາມຮົບການເມືອງແນວຄິດ, ເປັນອາວຸດອັນແຫລມຄົມ ແລະ ເປັນກະບອກສຽງຂອງພັກ-ລັດ ເພື່ອປຸກລະດົມທົ່ວປວງຊົນຕໍ່ສູ້ປະຕິວັດ ກໍຄື ປົກປັກຮັກສາ ແລະ ສ້າງສາພັດທະນາປະເທດຊາດ. ສື່ມວນຊົນລາວ ແມ່ນສື່ທີ່ເຄື່ອນໄຫວພາຍໃຕ້ການນຳພາໂດຍກົງຮອບດ້ານຂອງພັກ, ເປັນກະບອກສຽງຂອງພັກ-ລັດ ເຮັດໃຫ້ສັງຄົມໄດ້ຮັບຮູ້ຢ່າງຖືກຕ້ອງຄົບຖ້ວນ, ຍ້ອນແນວນັ້ນ ສື່ມວນຊົນຈຶ່ງມີບົດບາດສຳຄັນຫລາຍໃນການປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ນັບແຕ່ອະດີດຈົນເຖິງປັດຈຸບັນ ໂດຍສື່ມວນຊົນ ເປັນຜູ້ນໍາເອົາແນວທາງແຜນນະໂຍບາຍຂອງພັກ-ລັດໂຄສະນາເຜີຍແຜ່ ລົງສູ່ປະຊາຊົນ ຜ່ານຊ່ອງທາງສື່ດ້ວຍຫລາຍຮູບການຄື: ໜັງສືພິມ, ວິທະຍຸ, ໂທລະພາບ ແລະ ຜ່ານສື່ສັງຄົມອອນລາຍ ເພື່ອໃຫ້ມີຄວາມວ່ອງໄວ ແລະ ຮັບປະກັນຄວາມຖືກຕ້ອງ. ສະນັ້ນ, ສື່ມວນຊົນຕ້ອງສືບຕໍ່ເປັນເຈົ້າການປັບປຸງຕົນເອງທາງດ້ານເນື້ອໃນ, ຮູບການ ໃຫ້ກະທັດຮັດ, ແທດຕົວຈິງ ແລະ ມີປະສິດທິຜົນສູງຂຶ້ນ, ຮັບປະກັນຄວາມໝັ້ນຄົງດ້ານຂໍ້ມູນຂ່າວສານ, ຕິດພັນກັບການຕິດຕາມກວດກາຜະລິດຕະພັນຂອງສື່ມວນຊົນ ແລະ ພິມຈຳໜ່າຍໃຫ້ດຳເນີນໄປຖືກທິດເພື່ອ ຮັບໃຊ້ພັກ-ລັດ ແລະ ປະຊາຊົນ; ເອົາໃຈໃສ່ເປັນພິເສດຕໍ່ການຕິດຕາມກວດກາເນື້ອໃນ, ຫາງສຽງສັງຄົມເປັນເຈົ້າການຕອບຕ້ານຢ່າງທັນການ ແລະ ຖືກທິດ ເພື່ອນຳເອົາຂໍ້ມູນຂ່າວສານທີ່ເປັນປະໂຫຍດ ແລະ ຖືກຕ້ອງລົງສູ່ປະຊາຊົນ ໂດຍຜ່ານພາຫະນະຂອງສື່ຫລາຍຮູບແບບ, ຫລາຍສີສັນ ທັນສະໄໝ ແລະ ວ່ອງໄວທັນສະພາບການ ເພື່ອສ້າງຄວາມເຂັ້ມແຂງໃຫ້ກັບສື່.
ທ່ານ ສົມສະຫວາດ ພົງສາ ຍັງໃຫ້ຮູ້ອີກວ່າ: ສະເພາະກົມສື່ມວນຊົນ ແມ່ນເຮັດໜ້າທີ່ ເປັນເສນາທິການໃຫ້ແກ່ຄະນະລັດຖະມົນຕີ ແລະ ຄຸ້ມຄອງບຸກຄະລາກອນສື່ມວນຊົນ. ພ້ອມນີ້, ກົມສື່ມວນຊົນ ມີໜ້າທີ່ຄຸ້ມຄອງແຕ່ລະສໍານັກງານສື່ມວນຊົນຄື: ໂທລະພາບ, ວິທະຍຸ, ໜັງສືພິມ ແລະ ເພສຂ່າວອອນລາຍຕ່າງໆ ໃນການໂຄສະນາເຜີຍແຜ່ຂໍ້ມູນຂ່າວທີ່ເປັນຄວາມຈິງ ແລະ ຕອບໂຕ້ການນໍາໃຊ້ສື່ດັ່ງກ່າວໄປໃນທາງທີ່ຜິດ, ສ້າງຂ່າວປອມປັ່ນປ່ວນ, ສ້າງຄວາມແຕກແຍກໃນສັງຄົມ, ຍິ່ງໄປກວ່າ ນັ້ນຍັງໂຄສະນາໃສ່ຮ້າຍປ້າຍສີຕໍ່ແນວທາງນະໂຍບາຍ ອັນຖືກຕ້ອງຂອງພັກ ແລະ ລັດຖະບານເຮົາ. ໃນໄລຍະ 1 ປີຜ່ານມາ, ກົມສື່ມວນຊົນ ໄດ້ປະກອບສ່ວນວຽກງານເຂົ້າໃນວັນສຳຄັນຕ່າງໆຂອງຊາດ, ກອງປະຊຸມລະດັບຊາດ ແລະ ກອງປະຊຸມລະດັບສາກົນຕ່າງໆທີ່ຈັດຂຶ້ນຢູ່ໃນ ສປປ ລາວ ເຊິ່ງເຮັດໜ້າທີ່ເປັນສູນກາງດ້ານການໂຄສະນາເຜີຍແຜ່ຂໍ້ມູນຂ່າວສານທີ່ຖືກຕ້ອງໃຫ້ສັງຄົມໄດ້ຮັບຮູ້. ສໍລັບທິດທາງແຜນໃນຕໍ່ໜ້າ ກົມສື່ມວນຊົນ ຈະໄດ້ປັບປຸງ ແລະ ພັດທະນາລະບົບເຕັກໂນໂລຊີແບບໃໝ່, ເປັນທັນສະໄໝ ແລະ ຍົກລະດັບບຸກຄະລາກອນສື່ໃຫ້ມີຄຸນນະພາບສູງຂຶ້ນ, ທັງສາມາດວິເຄາະ-ວິໄຈ, ວິຈານບັນຫາຕ່າງໆໃຫ້ສັງຄົມໄດ້ຮັບຮູ້ ແລະ ເຮັດໜ້າທີ່ໃນການສຶກສາອົບຮົມສັງຄົມໄປພ້ອມໆກັນ ຕາມ 4 ລັກສະນະຂອງສື່ມວນຊົນລາວ ຄື: ລັກສະນະຕົວຈິງ, ລັກສະນະສຶກສາອົບຮົມ, ລັກສະນະແນະນໍາ ແລະ ລັກສະນະຕໍ່ສູ້. ພ້ອມທັງສຸມໃສ່ການສ້າງນິຕິກຳຕ່າງໆທີ່ກ່ຽວ ຂ້ອງກັບວຽກງານສື່ມວນຊົນ, ຄຸ້ມຄອງ ແລະ ໂຄສະນາເຜີຍແຜ່ໃຫ້ສັງຄົມໄດ້ຮັບຮູ້ວຽກງານສື່ມວນຊົນໃຫ້ຫລາຍຂຶ້ນ.
ຂ່າວ: ວຽງສະຫວັນ
ພາບ: ຂັນໄຊ
