ໃນວັນທີ 11 ກໍລະກົດ ຜ່ານມາ ສະຫາຍ ພົນຕີ ພັນແສງ ບຸນພັນ ຮອງຫົວໜ້າກົມໃຫຍ່ເສນາທິການກອງທັບປະຊາຊົນລາວ ໄດ້ນໍາພາສະຫາຍ ພົນຕີ ເຈີ້ງ ກົວເຢ່ ຮອງຜູ້ບັນຊາການ ກອງປະຈໍາການຮົງກົງ ເຂດສູ້ຮົບພາກໃຕ້ກອງທັບປົດປ່ອຍປະຊາຊົນຈີນ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມພະນັກງານ-ນັກຮົບກອງພັນໃຫຍ່ 11 ທີ່ເຂົ້າຮ່ວມການຊ້ອມຮົບພາກສະໜາມໃນບັ້ນຊ້ອມຮົບຮ່ວມລາວ-ຈີນ” ໂລ້ກໍາບັງມິດຕະພາບ-2024″ ໂດຍການຕ້ອນຮັບຂອງສະຫາຍ ພັນເອກ ສົມແພງ ແກ້ວສີລາ ຫົວໜ້າການທະຫານ ກອງພັນໃຫຍ່ 11, ມີຄະນະພັກ-ຄະນະບັນຊາກ່ຽວຂ້ອງເຂົ້າຮ່ວມຕ້ອນຮັບ.
ໂອກາດນີ້, ສະຫາຍ ພົນຕີ ເຈີ້ງ ກົວເຢ່ ໄດ້ຮັບຟັງການລາຍງານສະພາບທົ່ວໄປໂດຍຫຍໍ້ຈາກ ສະຫາຍ ພັນເອກ ຄໍາສາຍ ມົນດວງສິງ ຫົວໜ້າພະແນກການເມືອງ ກ່ຽວກັບສະພາບຈຸດພິເສດ, ທີ່ຕັ້ງ, ພາລະບົດບາດ ແລະ ໜ້າທີ່ການເມືອງຂອງກອງພັນໃຫຍ່ 11 ລວມທັງຜົນງານດ້ານຕ່າງໆທີ່ກົມກອງຍາດມາໄດ້ໃນໄລຍະຜ່ານມາ ພ້ອມດຽວກັນນັ້ນ ເພື່ອຕອບສະໜອງກັບຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່, ໃນການປັບປຸງກໍ່ສ້າງກຳລັງປະກອບອາວຸດໃຫ້ເຕີບໃຫຍ່ເຂັ້ມແຂງເປັນກ້າວໆ ຕິດພັນສະໜິດແໜ້ນກັບການລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ, ການປະຕິບັດຕາມທິດ 3 ສ້າງ 4 ເນື້ອໃນ 4 ຄາດໝາຍ, ການກຽມພ້ອມສູ້ຮົບ, ເຄື່ອນໄຫວສູ້ຮົບ, ແກ້ໄຂເຂດເກາະຫ້ອຍ ພ້ອມທັງເຮັດໜ້າທີ່ການເມືອງໃຫ້ສະພາບມີຄວາມສະຫງົບ.
ໂອກາດນີ້, ສະຫາຍ ພົນຕີ ເຈີ້ງ ກົວເຢ່ ກໍໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະອັນໃຫຍ່ຫຼວງຂອງກອງພັນໃຫຍ່ 11 ທີ່ຍາດມາໄດ້ຕະຫຼອດໄລຍະຜ່ານມາ ພ້ອມທັງເນັ້ນໜັກໃຫ້ຄະນະພັກ-ຄະນະບັນຊາເອົາໃຈ ໃສ່ຊີ້ນໍາ-ນໍາພາ ພະນັກງານ-ນັກຮົບເສີມຂະຫຍາຍທາດແທ້, ມູນເຊື້ອອັນດີງາມໄວ້ຢ່າງໝັ້ນຄົງຍາວນານ ໂດຍສະເພາະສາຍສໍາພັນ, ຄວາມສາມັກຄີທີ່ຮັກແພງໃກ້ຊິດຕິດແທດລະຫວ່າງສອງກອງທັບລາວ-ຈີນ, ຈີນ-ລາວໃຫ້ນັບມື້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
ຂ່າວ: ກອງທັບ
