ສະຖາບັນວິຈິດສິນແຫ່ງຊາດ ກະຊວງຖະແຫລງຂ່າວ ວັດທະນະທໍາ ແລະທ່ອງທ່ຽວ ຈັດງານວາງສະແດງຜະລິດຕະພັນວິຈິດສິນອາຊຽນ ຈາກສິ່ງເສດເຫລືອ, ພາຍໃຕ້ກິດຈະກໍາ ການເຜີຍແຜ່ມໍລະດົກວັດທະນະທໍາຕາມແລວທາງລົດໄຟ- ເສີມຂະຫຍາຍການເຊື່ອມຈອດໃນທ່າມກາງຄວາມຫລາກຫລາຍທາງດ້ານວັດທະນະທໍາ, ຈັດຂຶ້ນຕອນເຊົ້າ ວັນທີ 14 ກໍລະກົດ 2024 ທີ່ສູນການຄ້າວຽງຈັນ (Vientiane Centre) ໂດຍການເຂົ້າຮ່ວມຂອງທ່ານ ຄໍາພູ ເພຍສັງຄະ ຮອງຫົວໜ້າກົມແຜນການ ແລະການຮ່ວມມືສາກົນ ກະຊວງ ຖວທ ພ້ອມດ້ວຍຜູ້ຕາງໜ້າຈາກສະຖານທູດປະເທດສາມະຊິກອາຊຽນປະຈໍາ ສປປ ລາວ ສະມາຄົມໂຮງແຮມຮ້ານອາຫານ ແລະຕົວແທນນັກສຶກສາ, ຊາວໜຸ່ມ ຈາກປະເທດສາມະຊິກອາຊຽນເຂົ້າຮ່ວມປະເທດລະສາມຄົນ.
ທ່ານຄໍາພູ ເພຍສັງຄະ ຮອງຫົວໜ້າກົມແຜນການ ແລະການຮ່ວມມືສາກົນ ກະຊວງ ຖວທ ກ່າວວ່າ: ກິດຈະກໍາຄັ້ງນີ້ ເລີ່ມຈັດຢູ່ຫລວງພະບາງ ແຕ່ວັນທີ 10- 14 ກໍລະກົດ ໂດຍການເປັນເຈົ້າພາບຮ່ວມຂອງສາມປະເທດ ຄື: ລາວ, ໄທ ແລະມາເລເຊຍ, ເຊິ່ງເປັນໂຄງການສ້າງຄວາມເຂັ້ມແຂງໃຫ້ແກ່ຊາວໜຸ່ມ, ນັກສຶກສາອາຊຽນ ຕົ້ນຕໍແມ່ນດ້ານສິລະປະ, ຜະລິດຕະພັນວິຈິດສິນ, ອາຫານພື້ນເມືອງ, ຫຼັງຈາກນັ້ນໄດ້ຂີ່ລົດໄຟມາຈັດກິດຈະກຳຢູ່ເມືອງວັງວຽງ ແຂວງວຽງຈັນ ສຳລັບມື້ນີ້ເຊິ່ງເປັນມື້ສຸດທ້າຍທີ່ເຄື່ອນໄຫວກິດຈະກຳຢູ່ລາວໂດຍຜູ້ເຂົ້າຮ່ວມໂຄງການໄດ້ນຳເອົາຜົນຜະລິດຈາກການຈັດກິດຈະກຳຢູ່ຫຼວງພະບາງ ແລະ ວັງວຽງ ມາວາງສະແດງຢູ່ສູນການຄ້າວຽງຈັນ ໂດຍໄດ້ມອບລາງວັນຂອງທີ່ລະນຶກໃຫ້ຜູ້ແທນແຕ່ລະປະເທດ ແລ້ວສືບຕໍ່ເດີນທາງໄປຈັດກິດຈະກຳຢູ່ນະຄອນຫຼວງບາງກອກ ປະເທດໄທ ຈາກນັ້ນຈະເດີນທາງໄປປິດກິດຈະກຳຂອງໂຄງການຢູ່ນະຄອນຫຼວງກົວລາລຳເປີ ປະເທດມາເລເຊຍ ໃນວັນ 26 ກໍລະກົດ 2024.
ໂດຍ: ຄໍາກອງ
