ຂ່າວສານຫວຽດນາມລາຍງານວ່າ: ວັນທີ 10 ກໍລະກົດ ຜ່ານມາ, ກະຊວງວິສາຫະກິດຂະໜາດນ້ອຍ ແລະ ກາງ ສ ເກົາຫຼີ ໄດ້ລົງນາມໃນສັນຍາຮ່ວມມືກັບ Lotte Mart (ຫ້າງຊັບພະສິນຄ້າໃຫຍ່ລະດັບແຖວໜ້າ ສ ເກົາຫຼີ) ແລະ Lotte Global Logistics (ບໍລິສັດຂົນສົ່ງ) ຢູ່ ເຊອຸນ ເພື່ອຊຸກຍູ້ບັນດາວິສາຫະກິດຂະໜາດນ້ອຍ ແລະ ກາງ ສ ເກົາຫຼີ ສົ່ງອອກຜະລິດຕະພັນໄປສູ່ຕະຫຼາດ ຫວຽດນາມ.
ຂ່າວລະບຸວ່າ: ຜະລິດຕະພັນທີ່ມີຄຸນນະພາບຂອງວິສາຫະກິດຂະໜາດນ້ອຍ ແລະ ກາງ ຂອງ ສ ເກົາຫຼີ ຈະໄດ້ຮັບການສະໜັບສະໜູນຂາຍຢູ່ Lotte Mart ຫວຽດນາມ ໃນຂະນະທີ່ Lotte Global Logistics ຈະນຳໃຊ້ເຄືອຂ່າຍຂົນສົ່ງສິນຄ້າຂອງຕົນເພື່ອຂົນສົ່ງສິນຄ້າໄປຕ່າງປະເທດດ້ວຍລາຄາທີ່ຕ່ຳສຸດ.
ທ່ານ ໂຮ ຍອງ ຈູ ລັດຖະມົນຕີກະຊວງວິສາຫະກິດຂະໜາດນ້ອຍ ແລະ ກາງ ສ ເກົາຫຼີ ໃຫ້ຮູ້ວ່າ: ເພື່ອຊ່ວຍເຫຼືອບັນດາວິສາຫະກິດຂະຫຍາຍຕົວຢູ່ຕ່າງປະເທດ ລັດຖະບານ ສ ເກົາຫຼີ ຢາກຮ່ວມມືກັບບັນດາວິສາຫະກິດຂະໜາດໃຫຍ່ເພື່ອສະໜັບສະໜູນຂະບວນການສົ່ງເສີມຜະລິດຕະພັນຂອງ ສ ເກົາຫຼີ ອອກສູ່ຕະຫຼາດໂລກ ແລະ ນຳໃຊ້ສິ່ງດັ່ງກ່າວເປັນກຳລັງໜູນຊຸກຍູ້ການພັດທະນາລວມ.
ທ່ານ ຄັງ ເຊຍອງ ຮັນ ຜູ້ອຳນວຍການ ຂອງ Lotte Mart ໃຫ້ຮູ້ວ່າ: ຫວຽດນາມ ແມ່ນຕະຫຼາດທີ່ມີຄວາມສຳຄັນຫຼາຍ ແລະ Lotte Mart ມີຄວາມດີໃຈທີ່ສາມາດຊ່ວຍພັດທະນາຜະລິດຕະພັນຂອງວິສາຫະກິດຂະໜາດນ້ອຍ ແລະ ກາງ ຕາມຈຸດເດັ່ນທາງຍຸດທະສາດ. ຜ່ານສັນຍາທີ່ໄດ້ຮັບການລົງນາມໃໝ່, ບໍລິສັດສາມາດເຮັດໜ້າທີ່ເປັນຂົວຕໍ່ໃຫ້ບັນດາວິສາຫະກິດຂະໜາດນ້ອຍ ແລະ ກາງ ຂອງ ສ ເກົາຫຼີ ເຂົ້າສູ່ຕະຫຼາດຕ່າງປະເທດ.
