ກະຊວງກະສິກຳ ແລະ ປ່າໄມ້ ຮ່ວມກັບ ອົງການປົກຄອງນະຄອນຫລວງວຽງຈັນ ຈັດກິດຈະກຳ ປ່ອຍປາ ຄືນສູ່ທຳມະຊາດ ຢູ່ຄອງນ້ຳ ບ້ານຮ່ອງສຸພາບ ເມືອງໄຊເສດຖາ ນະຄອນຫລວງວຽງຈັນ ໃນວັນທີ 13 ກໍລະ ກົດ 2024 ເພື່ອສະເຫລີມສະຫລອງວັນປ່ອຍປາ ແລະ ສັດນໍ້າ ແຫ່ງຊາດ ຄົບຮອບ 27 ປີ ໂດຍມີ ທ່ານ ບຸນທອງ ຈິດມະນີ ຮອງປະທານປະເທດ, ທ່ານ ລິນຄໍາ ດວງສະຫວັນ ລັດຖະມົນຕີ ກະຊວງ ກະສິກໍາ ແລະ ປ່າໄມ້, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ, ພ້ອມດ້ວຍ ບັນດາການນຳຂັ້ນສູນກາງ, ນະຄອນ ຫລວງວຽງຈັນ, ເອກອັກຄະລັດຖະທູດ ຮົງກາລີ ປະຈຳລາວ, ຜູ້ຕາງໜ້າອົງການຈັດຕັ້ງສາກົນ, ພະນັກງານ-ລັດຖະ ກອນ ຈາກທຸກພາກສ່ວນ, ຕະຫລອດຮອດ ປະຊາຊົນ ແລະ ນ້ອງນ້ອຍເຍົາວະຊົນ ເຂົ້າຮ່ວມ.
ໂອກາດດັ່ງກ່າວ, ທ່ານ ກິແກ້ວ ສິງນາວົງ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ໄດ້ໃຫ້ຮູ້ວ່າ: ປາທີ່ນຳມາປ່ອຍ ໃນຄັ້ງນີ້, ມີທັງໝົດ 400.000 ໂຕ. ໃນນັ້ນ ມີ ປາປາກ, ປາເຄິງ, ປາກົດ, ປາເໝັ້ນ, ປາເພ້ຍ, ປາອີໄທ, ປາວຽນໄຟ ແລະ ປາຊະນິດອື່ນໆ ເຊິ່ງໃນປີນີ້, ກະຊວງກະສິກຳ ແລະ ປ່າໄມ້ ໄດ້ສົມທົບກັບ ອົງການປົກຄອງແຂວງ, ນະຄອນຫລວງ ມີແຜນຈະປ່ອຍປາຄືນສູ່ແຫລ່ງນໍ້າທຳມະຊາດ ໃນຂອບເຂດທົ່ວປະເທດ ໃຫ້ໄດ້ 64 ລ້ານໂຕ. ພ້ອມກັນນີ້, ວັນທີ 13 ກໍລະກົດ ຍັງກົງກັບ ວັນຄ້າຍວັນເກີດ ຂອງປະທານ ສຸພານຸວົງ ຜູ້ນຳທີ່ແສນເຄົາລົບຮັກ ຂອງປວງຊົນລາວທັງຊາດ ຄົບຮອບ 115 ປີ ອີກດ້ວຍ. ສະນັ້ນ, ການສະຫລອງວັນດັ່ງກ່າວ, ໄດ້ຈັດຂຶ້ນທຸກໆປີ ເພື່ອເປັນການຈາລຶກເຖິງບຸນຄຸນ ແລະ ຄຸນງາມຄວາມດີ ທີ່ທ່ານໄດ້ອຸທິດຕົນໃຫ້ແກ່ພາລະກິດແຫ່ງການຕໍ່ສູ້ກູ້ຊາດ ກໍຄື ການປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ, ພ້ອມທັງເປັນການປູກຈິດສຳນຶກ ໃຫ້ແກ່ເຍົາວະຊົນ ແລະ ອະນຸຊົນ ຮຸ່ນຫລັງ ກໍຄື ທົ່ວສັງຄົມ ໃຫ້ເຫັນຄວາມສຳຄັນຂອງການອະນຸລັກ ປາ ແລະ ສັດນໍ້າ ແນໃສ່ເພີ່ມຄວາມອຸດົມສົມບູນ ແລະ ໃຫ້ມີຄວາມຍືນຍົງຕະຫລອດໄປ.
ທ່ານ ກິແກ້ວ ສິງນາວົງ ຍັງໃຫ້ຮູ້ອີກວ່າ: ວັນທີ 13 ກໍລະກົດ ຂອງທຸກໆປີ ແມ່ນ ວັນປ່ອຍປາ ແລະ ສັດນໍ້າ ແຫ່ງຊາດ ທີ່ໄດ້ກຳນົດໃນກົດໝາຍວ່າດ້ວຍສັດນໍ້າ ແລະ ການປະມົງ ເຊິ່ງໃນໄລຍະຜ່ານມາ ກະຊວງກະສິກຳ ແລະ ປ່າໄມ້ ໄດ້ປະສານສົມທົບກັບທຸກພາກສ່ວນ ທັງຂັ້ນສູນກາງ ແລະ ທ້ອງຖິ່ນ ໃຫ້ຄວາມສຳຄັນຕໍ່ວັນດັ່ງກ່າວ ດ້ວຍການໂຄສະນາເຜີຍແຜ່ກົດໝາຍ ແລະ ບັນດານິຕິກຳຕ່າງໆທີ່ກ່ຽວຂ້ອງ ຢ່າງກວ້າງຂວາງໃນຂອບເຂດທົ່ວປະເທດ ເພື່ອເຮັດໃຫ້ທຸກພາກສ່ວນ ໃນສັງຄົມເຂົ້າໃຈ ແລະ ເອົາໃຈໃສ່ຕໍ່ວຽກງານການພັດທະນາ, ການອະນຸລັກ, ການຄຸ້ມຄອງ ແລະ ນຳໃຊ້ ປາ ແລະ ສັດນໍ້າ ໃຫ້ມີຄວາມຍືນຍົງ ເພື່ອປະກອບສ່ວນເຂົ້າໃນການຄໍ້າປະກັນສະບຽງອາຫານ ແລະ ໂພຊະນາການ, ພ້ອມທັງຜະລິດເປັນສິນຄ້າ ເພື່ອສ້າງລາຍຮັບ ໃຫ້ປະຊາຊົນລາວນັບມື້ຫລາຍຂຶ້ນ. ຢ່າງໃດກໍຕາມ ໃນປີ 2021 ຜ່ານມາ, ກະຊວງກະສິກຳ ແລະ ປ່າໄມ້ ໄດ້ສົມທົບກັບພາກສ່ວນຕ່າງໆທີ່ກ່ຽວຂ້ອງ ປ່ອຍປາໄດ້ 58 ລ້ານໂຕ, ປີ 2022 ໄດ້ 61 ລ້ານໂຕ ແລະ ປີ 2023 ປ່ອຍໄດ້ 62 ລ້ານໂຕ ເຊິ່ງຂະແໜງ ກະສິກຳ ແລະ ປ່າໄມ້ ໄດ້ເອົາໃຈໃສ່ພັດທະນາ, ຊຸກຍູ້-ສົ່ງເສີມ ພື້ນຖານການຜະລິດ ແນວພັນປາ-ແນວພັນສັດນ້ຳ ເຊິ່ງທົ່ວປະເທດມີ ສູນ, ສະຖານີທີ່ຜະລິດລູກປາ ຂອງລັດ ຫລາຍກວ່າ 50 ແຫ່ງ, ຟາມຜະລິດລູກປາ ຂອງເອກະຊົນ ຫລາຍກວ່າ 140 ແຫ່ງ ແລະ ການຜະລິດລູກປາແບບຄອບຄົວມີຫລາຍກວ່າ 400 ແຫ່ງ, ສາມາດສະໜອງແນວພັນປາ ໃຫ້ສັງຄົມໄດ້ໂດຍພື້ນຖານ 290 ລ້ານກວ່າໂຕ ຫລື ເທົ່າກັບ 73% ຂອງຄວາມຕ້ອງການພາຍໃນ. ບັນດາສູນດັ່ງກ່າວ, ໄດ້ຄົ້ນຄວ້າທົດລອງ ລ້ຽງ ແລະ ຂະຫຍາຍພັນ ປາ ແລະ ສັດນໍ້າ ພື້ນເມືອງໄດ້ຫລາຍຊະນິດ ເປັນຕົ້ນ ປາເຄິງ, ປາກົດ, ປາເໝັ້ນ ແລະ ປາເຂັງ. ພ້ອມກັນນັ້ນ, ບັນດາທ້ອງຖິ່ນກໍໄດ້ເອົາໃຈໃສ່ການອະນຸລັກສັດນ້ຳ ດ້ວຍການສ້າງວັງສະຫງວນ ຕາມແຫລ່ງນ້ຳທຳມະຊາດຕ່າງໆ. ມາຮອດປັດຈຸບັນ ໃນທົ່ວປະເທດ ມີວັງສະຫງວນປາ ຫລາຍກວ່າ 1.100 ວັງ. ໃນນັ້ນ, ມີຄະນະຄຸ້ມຄອງວັງສະຫງວນແລ້ວ 890 ວັງ. ພ້ອມນີ້, ຍັງໄດ້ເຄື່ອນໄຫວວຽກງານຄຸ້ມຄອງ ແລະ ປົກປັກຮັກສາ ປາ ແລະ ສັດນໍ້າ ຮ່ວມກັບພາກພື້ນ ແລະ ສາກົນ ຢ່າງຕັ້ງໜ້າ ເພື່ອສ້າງ ແລະ ຄຸ້ມຄອງວັງສະຫງວນ, ຄຸ້ມຄອງຊະນິດພັນປາທີ່ໃກ້ຈະສູນພັນ ແລະ ອະນຸລັກສັດນໍ້າອື່ນໆ.
ໂອກາດນີ້, ທ່ານ ກິແກ້ວ ສິງນາວົງ ຍັງໄດ້ຕາງໜ້າໃຫ້ຂະແໜງກະສິກຳ-ປ່າໄມ້ ຮຽກຮ້ອງມາຍັງ ພາກສ່ວນຕ່າງໆ ທັງພາກລັດ ແລະ ເອກະຊົນ ໃນທົ່ວສັງຄົມ ຈົ່ງພ້ອມກັນ ຮ່ວມແຮງຮ່ວມໃຈ ຄຸ້ມຄອງ, ພັດທະນາ, ອະນຸລັກຮັກສາ ປາ ແລະ ສັດນໍ້າ ໂດຍສະເພາະ ສຸມໃສ່ການປ່ອຍປາ ແລະ ສັດນໍ້າ ຄືນສູ່ແຫລ່ງນໍ້າທໍາມະຊາດ ເພີ່ມຄວາມອຸດົມສົມບູນທາງດ້ານຊະນິດພັນ ແລະ ຈໍານວນປະຊາກອນຂອງປາ ແລະ ສັດນໍ້າ ທີ່ເປັນມໍລະດົກທາງທໍາມະຊາດ ຂອງຊາດ ໃຫ້ຊົມໃຊ້ແບບຍືນຍົງ ແລະ ໃຫ້ເປັນມໍລະດົກຕົກທອດຮອດເຊັ່ນລູກ ເຊັ່ນຫລານ ຂອງພວກເຮົາຕະ ຫລອດໄປ. ພ້ອມນັ້ນ, ກໍຮຽກຮ້ອງມາຍັງ ຜູ້ປະກອບການ ແລະ ພໍ່ແມ່ປະຊາຊົນ ຈົ່ງພ້ອມກັນລົງທຶນໃສ່ ການລ້ຽງປາ ແລະ ສັດນໍ້າ ໃຫ້ຫລາຍຂຶ້ນ ແລະ ຖືກຕ້ອງຕາມ ກົດໝາຍ ເພື່ອເປັນການສ້າງເສດຖະກິດ, ສ້າງລາຍຮັບໃຫ້ຄອບ ຄົວ ແລະ ປະເທດຊາດໃຫ້ຫລາຍຂຶ້ນ.
ຂ່າວ-ພາບ: ທະນູທອງ
