Saturday, July 13, 2024
Homeຂ່າວໜ້າໜຶ່ງປຶກສາຫາລື ກ່ຽວກັບວຽກງານການຮ່ວມມື ເພື່ອພັດທະນາຢ່າງມີປະສິດທິຜົນ

ປຶກສາຫາລື ກ່ຽວກັບວຽກງານການຮ່ວມມື ເພື່ອພັດທະນາຢ່າງມີປະສິດທິຜົນ

ກະຊວງແຜນການ ແລະ ການລົງທຶນ ຮ່ວມກັບອົງການສະຫະປະຊາຊາດ (ສປຊ) ໄດ້ຈັດກອງປະຊຸມປະທານ ແລະ ປະທານຮ່ວມຂອງໜ່ວຍງານຂະແໜງການຈາກບັນດາກະຊວງ ແລະ ຄູ່ຮ່ວມພັດທະນາ ຂຶ້ນໃນວັນທີ 3 ກໍລະກົດນີ້ ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍການເປັນປະທານຮ່ວມຂອງທ່ານນາງ ພອນວັນ ອຸທະວົງ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ທ່ານ ບັກໂຄເດຍ ເບີຄານອບ ຜູ້ປະສານງານອົງການ ສປຊ ປະຈຳ ສປປ ລາວ, ມີບັນດາຮອງລັດຖະມົນຕີຈາກກະຊວງສາທາລະນະສຸກ, ກະຊວງກະສິກຳ ແລະ ປ່າໄມ້, ບັນດາທ່ານເອກອັກຄະລັດຖະທູດ, ຜູ້ຕາງໜ້າຈາກສະຖານທູດ ແລະ ຫົວໜ້າອົງການສາກົນເຂົ້າຮ່ວມ.

ກອງປະຊຸມໃນຄັ້ງນີ້, ເປັນກອງປະຊຸມຄັ້ງທຳອິດຂອງບັນດາປະທານ ແລະ ປະທານຮ່ວມຂອງ ໜ່ວຍງານຂະແໜງການ ເພື່ອປຶກສາຫາລື ຊຶ່ງກັນ ແລະ ກັນກ່ຽວກັບວຽກງານການຮ່ວມມືເພື່ອພັດທະນາຢ່າງມີປະສິດທິຜົນ ແລະ ວິທີການເຮັດວຽກຂອງໜ່ວຍງານຂະແໜງການປະກອບສ່ວນເຂົ້າໃນວາລະການພັດທະນາລວມຂອງປະເທດ ແລະ ຍັງເປັນໂອກາດ ໃນການແລກປ່ຽນຄວາມເຂົ້າໃຈຮ່ວມກ່ຽວກັບການກະກຽມກອງປະຊຸມໂຕະມົນ ປະຈຳປີ 2024 ທີ່ຈະຈັດຂຶ້ນໃນເດືອນພະຈິກ 2024 ນີ້. ຈຸດເດັ່ນທີ່ສໍາຄັນຈາກກອງປະຊຸມໃນຄັ້ງນີ້, ແມ່ນຄວາມສໍາຄັນຂອງວຽກງານຂອງໜ່ວຍງານຂະແໜງການ ແລະ ການເຊື່ອມໂຍງທີ່ດີຂອງກອງປະຊຸມໂຕະມົນ ແລະ ການຈັດຕັ້ງປະຕິບັດພາຍໃຕ້ກອບຂອງຂະບວນການໂຕະມົນ.

ທ່ານນາງ ພອນວັນ ອຸທະວົງ ໄດ້ກ່າວວ່າ: ກອງປະຊຸມຄັ້ງນີ້, ບັນດາກະຊວງ ແລະ ຄູ່ຮ່ວມມືພັດທະນາທີ່ເປັນປະທານ ແລະ ເປັນປະທານຮ່ວມໜ່ວຍງານຂະແໜງການ ໄດ້ຮັບຟັງບົດລາຍງານກ່ຽວກັບຄວາມຄືບໜ້າໃນການຈັດຕັ້ງປະຕິບັດຂະບວນການໂຕະມົນ ປະຈຳປີ 2024, ນຳສະເໜີຮ່າງຂະບວນການ ແລະ ກຳນົດເວລາຂອງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ X (2026-2030), ຮ່າງແນວຄວາມຄິດກອງປະຊຸມໂຕະມົນປະຈຳປີ 2024.

ທ່ານ ບັກໂຄເດັຍ ເບີຄານອບ ຍັງໄດ້ເນັ້ນໜັກເຖິງ ຄວາມສຳຄັນຂອງບຸລິມະສິດອັນແຫຼມຄົມໃນການນຳມາໃຊ້ໃຫ້ດີທີ່ສຸດຂອງທຸກແຫຼ່ງທຶນເພື່ອການພັດທະນາລວມ ທັງການຊ່ວຍເຫຼືອທາງການເພື່ອການພັດທະນາ ໂດຍເລີ່ມແຕ່ສິ່ງທ້າທາຍໃໝ່ໃນເມື່ອບັນດາປະເທດອ້ອມຂ້າງ, ໂລກກໍາລັງປະເຊີນກັບຄ່າໃຊ້ຈ່າຍທີ່ເພີ່ມຂຶ້ນຢ່າງໄວວາຂອງສິ່ງຈໍາເປັນປະຈໍາວັນ ແລະ ຄວາມຫຍຸ້ງຍາກທາງດ້ານເສດຖະກິດ, ການເງິນທີ່ປະເທດເຮົາກໍາລັງປະເຊີນແມ່ນເປັນທີ່ຮູ້ຈັກໂດຍພວກເຮົາທຸກຄົນ. ດັ່ງນັ້ນ, ກອງປະຊຸມຄັ້ງນີ້ ພວກເຮົາໃຊ້ເວລາເພື່ອທົບທວນຄືນບົດຮຽນທີ່ໄດ້ຮຽນຮູ້ຈາກປີທີ່ຜ່ານມາ ແລະ ທົບທວນຄືນກ່ຽວກັບສິ່ງທີ່ເຮັດວຽກໄດ້ດີພາຍໃຕ້ ໜ່ວຍງານຂະແໜງການ, ພື້ນທີ່ ທີ່ໄດ້ຮັບການຍົກຂຶ້ນມາເປັນທ່າແຮງທີ່ໄດ້ຮັບຜົນປະໂຫຍດຈາກການສົ່ງເສີມ ແລະ ແນວຄວາມຄິດກ່ຽວກັບວິທີທີ່ເປັນໄປໄດ້ໃນຕໍ່ໜ້າ.

ກອງປະຊຸມໃນຄັ້ງນີ້, ຜູ້ເຂົ້າຮ່ວມຍັງໄດ້ຮັງຟັງການສະເໜີບົດລາຍງານທີ່ສຳຄັນກ່ຽວກັບຂະບວນການ ແລະ ກຳນົດເວລາ ໃນການສ້າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 10 (2026-2030), ຮັບຟັງການນຳສະເໜີກ່ຽວກັບຄວາມຄືບໜ້າໃນການຈັດຕັ້ງປະຕິບັດຂະບວນການໂຕະມົນ ປະຈຳປີ 2024 ແລະ ຮ່າງແນວຄວາມຄິດກອງປະຊຸມໂຕະມົນປະຈຳປີ 2024 ຊຶ່ງສະເໜີໂດຍ ກົມການຮ່ວມມືສາກົນ ກະຊວງແຜນການ ແລະ ການລົງທຶນ. ພ້ອມທັງເປີດໂອກາດໃຫ້ຜູ້ເຂົ້າຮ່ວມໄດ້ແລກປ່ຽນ, ປືກສາຫາລືຮ່ວມກັນຕື່ມອີກ.

(ຂ່າວ-ພາບ: ວັນເພັງ)

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments