ວັນທີ 2 ກໍລະກົດ 2024 ຫ້ອງການສາທາລະນະສຸກ ເມືອງເລົ່າງາມ ແຂວງ ສາລະວັນ ໄດ້ເປີດຂະບວນການທຳລາຍໜອນນໍ້າຍູງລາຍ ຢູ່ທີ່ບ້ານ ພໍ່ນວນ ເມືອງ ເລົ່າງາມ ໂດຍການສົມທົບລະຫວ່າງພະແນກສາທາລະນະສຸກແຂວງ,ມີ ທ່ານທ່ານ ອາຄົມ ລໍ່າວິຈິດ, ກໍາມະການພັກແຂວງ, ຫົວໜ້າພະແນກສາທາລະນສຸກ ແຂວງ, ທ່ານ ນາງ ຈັນທະລີ ກິດຕິລາດລັງສີ, ກໍາມະການພັກເມືອງ, ຫົວໜ້າຫ້ອງການສາທາລະນະສຸກ ເມືອງ, ພ້ອມດ້ວຍຂະແໜງງານຄວບຄຸມພະຍາດຕິດຕໍ່ ການປົກຄອງບ້ານແລະ ປະຊາຊົນເຂົ້າຮ່ວມ.
ທ່ານ ຄໍາຫວັນ ສີສະໝຸດ ຮອງເຈົ້າເມືອງໆເລົ່າງາມ ຜູ້ຊີ້ນໍາວຽກງານວັດທະນະທໍາ – ສັງຄົມ ໄດ້ກ່າວເປີດຂະບວນການທຳລາຍໜອນນໍ້າຍູງລາຍໃນຄັ້ງນີ້ ໂດຍຍົກໃຫ້ເຫັນຄວາມອັນຕະລາຍຮ້າຍແຮງຂອງພະຍາດໄຂ້ເລືອດອອກ ທີ່ເຮັດໃຫ້ຄົນເຮົາເຈັບປ່ວຍ ແລະ ເສຍຊີວິດ ໃນໄລຍະຜ່ານມາ ດັ່ງນັ້ນຂະບວນການໃນຄັ້ງນີ້ ຈຸດປະສົງເພື່ອໃຫ້ປະຊາຊົນຮ່ວມກັນເປັນເຈົ້າການທຳລາຍໜອນນໍ້າຍູງລາຍ ແລະ ຮັກສາອະນາໄມຢູ່ແຕ່ລະຄົວເຮືອນຂອງຕົນໃຫ້ສະອາດຈົບງາມສະເໝີ,ກຳຈັດບ່ອນລີ້ຊ່ອນ,ບ່ອນຂະຫຍາຍພັນຂອງຍູງໃຫ້ໝົດໄປ ເຊັ່ນ: ກະໂປະ,ກະປັອງ,ຕີນລົດເກົ່າ,ນໍ້າຮອງຕີນຕູ້,ຮອງຈອກ,ໂຖດອກໄມ້,ອຸແອ່ງນໍ້າ ແລະ ພັດຊະນະອື່ນ ໆ ທີ່ມີນໍ້າ,ປຽກຊຸ່ມ ກໍ່ຕ້ອງຝັດຖູໃຫ້ສະອາດທຸກອາທິດ ເພື່ອບໍ່ໃຫ້ຍູງມາໄຂ່ໃສ່ ຫຼື ອາໄສຢູ່ ເມື່ອບໍ່ມີຍູງລາຍມາຢູ່ ແລະ ມາກັດ ຄົນເຮົາກໍຈະບໍ່ເປັນໄຂ້ເລືອດອອກ.
ພາຍຫຼັງເປີດພິທີ ,ທ່ານ ຮອງເຈົ້າເມືອງໆເລົ່າງາມ,ພ້ອມດ້ວຍພະແນກສາທາລະນະສຸກແຂວງ,ຫ້ອງການສາທາລະນະສຸກ ເມືອງ,ຂະແໜງຄວບຄຸມພະຍາດຕິດຕໍ່ ,ອໍານາດການປົກຄອງບ້ານ ,ກໍໄດ້ເຄື່ອນໄຫວລົງສົມທົບກັບປະຊາຊົນຢູ່ແຕ່ລະຄອບຄົວກວດກາອະນາໄມທຳລາຍແຫຼ່ງເພາະພັນໜອນນໍ້າຍູງລາຍຢ່າງເປັນຂະບວນ .ການສ້າງຂະບວນການທຳລາຍໜອນນໍ້າຍູງລາຍ ແລະ ກິດຈະກຳສຸຂະສຶກສາໃນຄັ້ງນີ້ ຍັງເປັນການສ້າງຜົນງານ ແລະ ຂະບວນການສະເຫຼີມສະຫຼອງວັນແພດລາວ 18 ມິຖຸນາ ຄົບຮອບ 59 ປີໃຫ້ເປັນຂະບວນຟົດຟື້ນ ແລະ ມີຄວາມໝາຍສຳຄັນຢ່າງເລິກເຊີ່ງ.(ຂ່າວ:ແຂວງ ສາລະວັນ)
