ຄະນະສາທາລະນະສຸກສາດ ມະຫາວິທະຍາໄລວິທະຍາສາດສຸຂະພາບ (ມວສ) ສປປ ລາວ ຮ່ວມກັບສະ ຖາບັນສາທາລະນະສຸກສາດ ແລະ ການແພດເຂດຮ້ອນ (LaoTPHI) ໄດ້ຈັດກອງປະຊຸມສາທາລະນະສຸກສາດສາກົນຄັ້ງທີ 14 ຂອງບັນດາປະເທດລຸ່ມແມ່ນ້ຳຂອງ ຫຼື ICPH-GMS14 ຂຶ້ນເມື່ອບໍ່ດົນມານີ້ ທີ່ໂຮງແຮມພູແມນ ນະຄອນຫຼວງພະບາງ ແຂວງຫຼວງພະບາງ ໂດຍມີທ່ານນາງ ວັນພະນອມ ສີຈະເລີນ ຄະນະບໍດີ ຄະນະສາທາລະນະ ສຸກສາດ ມວສ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ຈັດຂຶ້ນເພື່ອເສີມຂະຫຍາຍການສຶກສາ, ການຄົ້ນຄວ້າທາງດ້ານສາທາລະນະສຸກ ພ້ອມທັງ ສົ່ງເສີມການແລກປ່ຽນດ້ານຕ່າງໆລະຫວ່າງບັນດານັກຄົ້ນຄວ້າ ແລະ ນັກສຶກສາຈາກມະຫາວິທະຍາໄລຫຼາຍແຫ່ງ ຂອງບັນດາປະເທດລຸ່ມນໍ້າຂອງເຊັ່ນ: ປະເທດໄທ, ຫວຽດນາມ, ສປປ ລາວ, ຈີນ, ກຳປູເຈຍ ແລະ ມຽນມາ ບັນດາມະຫາວິທະຍາໄລທີ່ເປັນເຄືອຄ່າຍໄດ້ເຮັດວຽກຮ່ວມກັນ ເພື່ອເສີມຂະຫຍາຍຄວາມສາມາດຂອງພາກພື້ນໃນການແກ້ໄຂສິ່ງທ້າທາຍດ້ານສາທາລະນະສຸກ ໂດຍຜ່ານການສຶກສາ, ການຄົ້ນຄ້ວາ ແລະ ເຜີຍແຜ່ດ້ານນະໂຍບາຍເພື່ອສຸຂະ ພາບໃນພາກພື້ນ. ປີນີ້ກອງປະຊຸມໄດ້ແນໃສ່ວຽກງານແກ້ໄຂບັນຫາສາທາລະນະສຸກ ອີງຕາມສະພາບການຂອງໂລກ ພາຍໃຕ້ຫົວຂໍ້ “ການປະຕິບັດເປົ້າໝາຍການພັດທະນາແບບຍືນຍົງ (SDG) ຜ່ານການປັບຕົວຕໍ່ການປ່ຽນແປງຂອງດິນຟ້າອາກາດ, ການສົ່ງເສີມໂພຊະນາການ, ຄວາມສະເໝີພາບດ້ານສຸຂະພາບ”. ກອງປະຊຸມຄັ້ງນີ້ໄດ້ເນັ້ນໜັກ ເຖິງການຮ່ວມມືທີ່ເຂັ້ມແຂງ ກ່ຽວກັບການແບ່ງປັນຄວາມຮູ້ດ້ານສຸຂະພາບ ສາທາລະນະສຸກລະຫວ່າງນັກຄົ້ນຄວ້າ, ຜູ້ບໍລິການນະໂຍບາຍ ແລະ ບັນດາຄູ່ຮ່ວມພັດທະນາ ແລະ ກອງປະຊຸມດັ່ງກ່າວໄດ້ປະສົບຜົນສຳເລັດຢ່າງຈົບງາມ ຜ່ານການເຊື່ອມສານກັບເຄືອຂ່າຍ ແລະ ການຮ່ວມມືເພື່ອການພັດທະນາສຸຂະພາບໃນພາກພື້ນ ດ້ວຍການສະໜັບ ສະໜູນຈາກຫຼາຍພາກສ່ວນເຊັ່ນ: ຄະນະກຳມະການໆແພດຂອງຈີນ (CMB), USAID, ອົງການ CRS ປະຈຳ ລາວ, ມະຫາວິທະຍາໄລ Purdue, ມະຫາວິທະຍາໄລ Indiana ແລະ Laser Pulse ຈາກອາເມຣິກາ.
ຂ່າວ: ອວສ
