ສາຍການບິນ Vietjet ໄດ້ຢືນຢັນຄືນໃໝ່ເຖິງຄວາມມຸ່ງໝັ້ນອັນໜັກແໜ້ນຂອງຕົນຕໍ່ການພັດທະນາແບບຍືນຍົງ ແລະ ຄວາມສະເໝີພາບລະຫວ່າງຍິງ-ຊາຍ ໃນງານລ້ຽງຕອນຄ່ຳຂອງອົງການ Women in Aviation International-Singapore Chapter (WAI-SG) ປະຈຳປີ 2025. ງານອັນຊົງກຽດດັ່ງກ່າວມີການເຂົ້າຮ່ວມຂອງ ທ່ານ Sun Xueling, ລັດຖະມົນຕີອາວຸໂສແຫ່ງລັດສິງກະໂປ ກະຊວງຄົມມະນາຄົມ ແລະ ກະຊວງພັດທະນາແຫ່ງຊາດ, ພ້ອມດ້ວຍບັນດາຜູ້ນຳ ແລະ ຜູ້ຊ່ຽວຊານດ້ານການບິນທົ່ວໂລກຫຼາຍກວ່າ 300 ທ່ານ.
ທ່ານ ນາງ Ho Ngoc Yen Phuong, ກຳມະການສະພາບໍລິຫານ, ຮອງປະທານ, ແລະ ຫົວໜ້າຝ່າຍການເງິນຂອງ ສາຍການບິນ Vietjet , ໄດ້ກ່າວເນັ້ນເຖິງຄວາມພະຍາຍາມຢ່າງຕໍ່ເນື່ອງຂອງສາຍການບິນໃນການສ້າງໂອກາດທີ່ເທົ່າທຽມກັນໃຫ້ແກ່ແມ່ຍິງໃນທຸກຂົງເຂດຂອງຂະແໜງການບິນ — ບໍ່ສະເພາະແຕ່ໃນຫ້ອງນັກບິນ, ແຕ່ລວມທັງບົດບາດທາງດ້ານເຕັກນິກ, ການປະຕິບັດງານ, ແລະ ການເງິນ.
ທ່ານ ນາງ ໄດ້ກ່າວເນັ້ນວ່າ: “ພວກເຮົາບໍ່ໄດ້ພຽງແຕ່ເວົ້າເຖິງຄວາມສະເໝີພາບທາງເພດ, ແຕ່ພວກເຮົາໄດ້ດໍາລົງຊີວິດຢູ່ກັບມັນ. ທີ່ຫວຽດເຈັດ, ພວກເຮົາເຊື່ອວ່າການ ສ້າງຄວາມເຂັ້ມແຂງໃຫ້ແມ່ຍິງ ແມ່ນສິ່ງສຳຄັນເພື່ອບັນລຸການເຕີບໂຕທີ່ຍືນຍົງໃນໄລຍະຍາວ.”
ສາຍການບິນຫວຽດເຈັດ ກໍ່ຕັ້ງໂດຍ ດຣ. Dr. Nguyen Thi Phuong Thao, ເສດຖີຍິງຜູ້ສ້າງຕົນເອງ ຄົນທຳອິດຂອງອາຊີຕາເວັນອອກສຽງໃຕ້, ເຊິ່ງຢືນຢູ່ເປັນສັນຍາລັກຂອງຄວາມເປັນ ຜູ້ນຳແມ່ຍິງ ແລະ ການສ້າງຄວາມເຂັ້ມແຂງໃນວຽກງານການບິນ. ອີງຕາມ ບົດລາຍງານ ESG ປະຈຳປີ 2024 ຂອງສາຍການບິນ, ພະນັກງານຍິງມີເກືອບ 40% ຂອງພະນັກງານທັງໝົດຂອງ ສາຍການບິນ Vietjet , ໂດຍມີ 30% ຂອງຕຳແໜ່ງບໍລິຫານເປັນຂອງແມ່ຍິງ — ເຊິ່ງເປັນອັດຕາສ່ວນທີ່ສູງທີ່ສຸດໃນພາກພື້ນ.
ດ້ວຍເຄືອຂ່າຍທີ່ເຕີບໂຕຢ່າງວ່ອງໄວ, ສາຍການບິນVietjetໄດ້ເຊື່ອມຕໍ່ນັກເດີນທາງຊາວລາວໄປສູ່ຫວຽດນາມ ແລະ ປາຍທາງອື່ນໆ, ດ້ວຍຂໍ້ສະເໜີທີ່ດຶງດູດຕະຫຼອດປີໃນທົ່ວພາກພື້ນອາຊີ-ປາຊີຟິກ. ປັດຈຸບັນ, ສາຍການບິນດັ່ງກ່າວໄດ້ດຳເນີນການບິນ ທຸກໆວັນ ເຊື່ອມຕໍ່ນະຄອນຫຼວງວຽງຈັນໄປສູ່ ຮ່າໂນ້ຍ ແລະ ນະຄອນໂຮ່ຈິມິນ ເຊິ່ງເປັນເມືອງທີ່ໃຫຍ່ທີ່ສຸດຂອງຫວຽດນາມ.
