ເພື່ອເປັນການສະເຫຼືມສະຫຼວງວັນສາກົນຕ້ານຢາເສບຕິດ ວັນທີ 26 ມິຖຸນາ 2024 ຄົບຮອບ 37 ປີ ພະແນກໂຄສະນາ ຫ້ອງການກວດກາ ແລະ ຄວບຄຸມຢາເສບຕິດ ກົມໃຫຍ່ຕຳຫຼວດ ກະຊວງ ປກສ ໄດ້ເຜີຍແຜ່ວຽກງານສະກັດກັ້ນ ແລະ ຕ້ານຢາ ເສບຕິດ ໃຫ້ພະນັກງານຢູ່ເຂດເສດຖະກິດສາມລ່ຽມຄໍາ ໃນຕອນບ່າຍ ວັນທີ 24 ມິຖຸນາ 2024 ເປັນກຽດເຂົ້າຮ່ວມ ມີຕາງ ໜ້າຈາກກະຊວງ ປກສ, ຕາງໜ້າຈາກ ປກສ ເຂດ, ທະຫານເຂດ, ຄຸ້ມຄອງເຂດ ແລະ ບັນດາເຈົ້າຂອງຫ້າງຮ້ານທຸລະກິດພາຍໃນເຂດເສດຖະກິດເຂົ້າຮ່ວມ.
ພັທ ນາງ ຄໍາກອງ ເພັດສົມພູ ຫົວໜ້າພະແນກໂຄສະນາ ຫ້ອງການກວດກາ ແລະ ຄວບຄຸມຢາເສບຕິດ ກົມໃຫຍ່ຕຳຫຼວດ ກະຊວງ ປກສ ໄດ້ກ່າວວ່າ: ເພື່ອເປັນການຍົກໃຫ້ເຫັນຜົນຮ້າຍ, ໄພອັນຕະລາຍ, ການຄວບຄຸມ,ການສະກັດກັ້ນ ແລະ ຕ້ານຢາ ເສບຕິດ ຢູ່ໃນສັງຄົມ ກໍຄື ເຂດເສດຖະກິດພິເສດສາມລ່ຽມຄໍາ ທັງເປັນການປູກຈິດສໍານຶກໃຫ້ບັນດາພະນັກງານ ເຈົ້າຂອງຫ້າງຮ້ານທຸລະກິດ ໄດ້ຮັບຮູ້, ເຂົ້າໃຈກວ້າງຂວາງ, ເລິກເຊິ່ງ, ກ່ຽວກັບຜົນຮ້າຍ ແລະ ໄພອັນຕະລາຍຂອງຢາເສບຕິດ ເຊິ່ງບັນຫາຢາ ເສບຕິດແມ່ນບັນຫາໃຫຍ່ທີ່ກຳລັງແຜ່ລະບາດ ແລະ ເພື່ອເປັນ ການສະກັດກັ້ນ ແລະ ຕ້ານຢາເສບຕິດ ພັກ-ລັດຖະບານ ກໍ່ຄື່ຄະນະຄຸ້ມຄອງເຂດເສດຖະກິດພິເສດສາມລ່ຽມຄໍາ ຈື່ງໄດ້ເອົາໃຈໃສ່ແກ້ໄຂຢ່າງຮິບດ່ວນໃນການຈັດຕັ້ງປະຕິບັດວາລະແຫ່ງຊາດ, ພັກ-ລັດຖະບານ ຍາມໃດກໍໄດ້ຖືເອົາການໂຄສະນາສຶກສາອົບຮົມ ເປັນວຽກປາຍແຫຼມສໍາຄັນຕົ້ນຕໍ ໃນການເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ທີ່ວາງອອກໃນແຕ່ລະໄລຍະເວົ້າລວມ, ເວົ້າລວມ ເວົ້າສະເພາະກໍຄື: ທິດຊີ້ນໍາຂອງກະຊວງປ້ອງກັນຄວາມສະຫງົບ ວ່າດ້ວຍການເພີ່ມທະວີການສະກັດກັ້ນ ແລະ ແກ້ໄຂບັນຫາຢາເສບຕິດ, ໄປພ້ອມໆ ກັບການຈັດຕັ້ງປະຕິບັດການບັງຄັບໃຊ້ມາດຕະການທາງດ້ານກົດໝາຍ ແລະ ຄໍາສັ່ງຕ່າງໆ ຂອງຂັ້ນເທິງວາງອອກແຕ່ລະໄລຍະແນ່ໃສ່ເຮັດໃຫ້ການຄຸ້ມຄອງລັດ, ຄຸ້ມຄອງສັງຄົມໂດຍສະເພາະເຂດເສດຖະກິດພິເສດສາມລ່ຽມຄໍາ ມີຄວາມສະຫງົບ ແລະ ເຮັດໃຫ້ເຂດເສດຖະກິດພິເສດສາມລ່ຽມຄໍາ ກາຍເປັນເຂດທີ່ປອດສິ່ງເສບຕິດ.
ຂ່າວ: ສີສະຫວ່າງ ຈັນມະນີ
