ຄະນະຜູ້ແທນ ກຕສ ເຂົ້າຮ່ວມກອງປະຊຸມ ການຄຸ້ມຄອງວຽກງານລັດດິຈິຕອນ ທີ່ ສປ ຈີນ

ໃນລະຫວ່າງວັນທີ 18-20 ມິຖຸນາ 2024, ຄະນະຜູ້ແທນລາວ ນໍາໂດຍ ທ່ານ ແກ້ວວິສຸກ ໂສລະພົມ, ຮອງລັດຖະມົນຕີ ກະຊວງເຕັກໂນໂລຊີ ແລະ ການສື່ສານ (ກຕສ) ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມ ຈີນ-ອາຊຽນ ໃນຫົວຂໍ້: ການຄຸ້ມຄອງວຽກງານລັດດິຈິຕອນ “China-ASEAN Digital Governance Dialogue” ພາຍໃຕ້ການສະໜັບສະໜູນຈາກ ອົງການ CAC (Cyberspace Administration of China) ຮ່ວມກັບ ແຂວງກວາງຊີ ແລະ ບໍລິສັດ CAIH (China-ASEAN Information Harbor) ຊຶ່ງຈັດຂຶ້ນທີ່ເມືອງ ກົວລິງ, ແຂວງກວາງຊີ ສປ ຈີນ ໂດຍມີ ຜູ້ເຂົ້າຮ່ວມຈາກບັນດາປະເທດອາຊຽນ 10 ປະເທດ.

ຈຸດປະສົງ ຂອງກອງປະຊຸມສໍາມະນາໃນຄັ້ງນີ້ ແມ່ນເພື່ອລາຍ ງານສະພາບການພັດທະນາ ແລະ ການຄຸ້ມຄອງ ວຽກງານດິຈິຕອນ ຂອງບັນດາປະເທດອາຊຽນ ແລະ ຂອງ ສປ ຈີນ, ພ້ອມ ທັງປຶກສາຫາລື ແລກປ່ຽນບົດຮຽນ ແລະ ໂອກາດ ໃນການຮ່ວມມື ລະຫວ່າງ ສປ ຈີນ ແລະ ບັນດາປະເທດທີ່ເຂົ້າຮ່ວມ ໃນວຽກ ງານການຄຸ້ມຄອງ ແລະ ການຫັນເປັນດິຈິຕອນ.

ໃນກອງປະຊຸມດັ່ງກ່າວ, ທ່ານ ແກ້ວວິສຸກ ໂສລະພົມ ໄດ້ຂຶ້ນນຳສະເໜີ ກ່ຽວກັບ ສະພາບການພັດທະນາ ແລະ ນຳໃຊ້ເຕັກໂນໂລຊີ ເພື່ອຫັນເປັນດິຈິຕອນ ໂດຍສະເພາະແມ່ນວຽກງານການຄຸ້ມຄອງຂໍ້ມູນລັດດິຈິຕອນ ຢູ່ ສປປ ລາວ, ຊຶ່ງຜູ້ເຂົ້າຮ່ວມກອງປະຊຸມແມ່ນມີຄວາມສົນໃຈຫຼາຍ ໂດຍສະເພາະແມ່ນສົນໃຈຮ່ວມມືກັບ ສປປ ລາວ ໃນການພັດທະນາໃຫ້ເປັນ Digital Hub ລະຫວ່າງ ຈີນ ຫາບັນດາປະເທດອາຊຽນໃນອະນາຄົດ.

ໃນໂອກາດດັ່ງກ່າວ, ຄະນະຜູ້ແທນ ສປປ ລາວ ຍັງໄດ້ພົບປະກັບ ອົງການຂໍ້ມູນຂ່າວສານ ຂອງແຂວງກວາງຊີ (Big Data Development Bureau of GuangXi province) ຊຶ່ງສອງຝ່າຍ ເຫັນດີໂດຍພື້ນຖານ ໃນການຄົ້ນຄວ້າ ຮ່ວມມືໃນວຽກງານການຄຸ້ມຄອງຂໍໍ້ມູນລັດດິຈິຕອນໃນຕໍ່ໜ້າ ເພື່ອຫັນເປັນດິຈິຕອນ ແລະ ເຊື່ອມໂຍງກັບບັນດາປະເທດອາຊຽນ.

ນອກຈາກນັ້ນ, ຄະນະ ຍັງໄດ້ໄປຢ້ຽມຢາມ ບໍລິສັດ CAIH ຊຶ່ງເປັນບໍລິສັດທີ່ໄດ້ຮັບມອບໝາຍຈາກລັດຖະບານຈີນ ໃນການ ຮ່ວມມືກັບບັນດາປະເທດອາຊຽນເພື່ອພັດທະນາຫັນເປັນດິຈິຕອນ ໂດຍສະເພາະວຽກງານເຊື່ອມໂຍງຂໍ້ມູນດິຈິຕອນ, CAIH ຍັງເປັນຜູ້ພັດທະນາລະບົບບໍລິຫານລັດດິຈິຕອນໃຫ້ແຂວງກວາງ ຊີທັງໝົດ. ສອງຝ່າຍ ໄດ້ແລກປ່ຽນບົດຮຽນ ແລະ ເຫັນດີ ເພີ່ມທະວີການຮ່ວມມືເພື່ອຍົກລະດັບວຽກງານບໍລິຫານລັດດິຈິຕອນ ຂອງ ສປປ ລາວ ໃຫ້ເປັນທັນສະໄໝ ເປັນຕົ້ນແມ່ນ ຄົ້ນຄວ້າ, ປັບປຸງ ລະບົບຫ້ອງການທັນສະໄໝ, ລະບົບສື່ສານທັນສະໄໝ ແລະ ອື່ນໆ.