ພິທີເປີດປ້າຍຫ້ອງການຜູ້ຕາງໜ້າບໍລິສັດສໍານັກພິມການ ສຶກສາກວາງຊີຈີນ ຈໍາກັດ ປະຈໍາລາວໄດ້ຈັດຂື້ນໃນ ວັນທີ 22 ພຶດສະພາ 2024 ທີ່ນະຄອນຫຼວງວຽງຈັນ ມີທ່ານ ວັນໄຊ ຕະວິນຍານ ຮອງຫົວໜ້າຄະ ນະໂຄສະນາອົບຮົມສູນກາງພັກ ຫົວໜ້າບັນນາທິການໜັງສືພິມປະຊາຊົນ ທ່ານ ຈ່າງຢີ້ປິ່ງ ຮອງປະທານຜູ້ອຳນວຍການໃຫຍ່ກຸ່ມບໍລິສັດສື່ສຳນັກພິມກວາງຊີ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.
ໂອກາດນີ້ ທ່ານ ວັນໄຊ ຕະວິນຍານ ໄດ້ກ່າວວ່າ: ການເປີດຫ້ອງການຜູ້ຕາງໜ້າບໍລິສັດສໍານັກພິມການສຶກສາກວາງຊີຈີນ ຈໍາກັດ ປະຈໍາລາວຄັ້ງນີ້ ເປັນອີກກິດຈະກໍາໜຶ່ງທີ່ມີຄວາມສໍາຄັນທີ່ຈະເປັນການປະກອບສ່ວນໃນການພັດທະນາການຮ່ວມມືໃນຂົງເຂດວັດທະນະທໍາ ລະຫວ່າງສອງປະເທດ ລາວ-ຈີນ ຈີນ-ລາວໃຫ້ມີການຂະຫຍາຍຕົວ ອຸດົມສົມບູນຍິ່ງຂື້ນ,ທັງເປັນການແລກປ່ຽນບົດຮຽນປະສົບການທາງດ້ານວັດທະນະທໍາ ທັງສ້າງຜະລິດຕະພັນໃໝ່ທີ່ໜ້າສົນໃຈໃຫ້ກັບສັງຄົມໄດ້ຢ່າງກວ້າງຂວາງຂຶ້ນກວ່າເກົ່າ.
ທ່ານ ຈ່າງຢີ້ປິ່ງ ກ່າວວ່າ: ການເປີດຫ້ອງການຜູ້ຕາງໜ້າບໍລິສັດສໍານັກພິມການສຶກສາກວາງຊີຈີນ ຈໍາກັດ ປະຈໍາລາວແມ່ນສັນຍາລັກໜຶ່ງທີ່ສຳຄັນເພື່ອຊຸກຍູ້ການແລກປ່ຽນ ການຮ່ວມມື ແລະ ການພັດທະນາຂົງເຂດວັດທະນະທໍາລະຫວ່າງສອງປະເທດຈີນ-ລາວ ເຊິ່ງສ່ອງແສງໃຫ້ເຫັນຢ່າງເຕັມສ່ວນເຖິງຄວາມຮັບ ຜິດຊອບດ້ານວັດທະນະທຳແລະໜ້າທີ່ຮັບຜິດຊອບຕໍ່ສັງຄົມ ບໍລິສັດສຳນັກພິມການສຶກສາກວາງຊີຈຳກັດ ໃນຖານະເປັນລັດ ວິສາຫະກິດວັດທະນະທຳ ກຸ່ມບໍລິສັດສື່ສຳນັກພິມກວາງຊີຈະອອກແຮງສະໜັບສະໜູນການສ້າງສາພັດທະນາເວທີແຫ່ງນີ້ ເສີມຂະຫຍາຍທ່າແຮງ ເຊື່ອມໂຍງຊັບພະຍາກອນຕ່າງໆເຂົ້າກັນ ຕໍ່ຍອດແລະເສີມຂະຫຍາຍຕ່ອງໂສ້ອຸດສາຫະກຳການພິມຈຳໜ່າຍ ປະກອບສ່ວນເຂົ້າໃນການຊຸກຍູ້ ສອງປະເທດຈີນ-ລາວ ລົງເລິກແລກປ່ຽນດ້ານວັດທະນະທຳ ແລະ ການຖອດຖອນບົດຮຽນເຊິ່ງກັນແລະກັນດ້ານອະລິຍະທຳ ຍົກສູງອິດທິພົນ ແລະ ຄວາມສາມາດເຜີຍແຜ່ໂຄສະນາການຮ່ວມມືລະຫວ່າງ ຈີນ-ລາວ ກໍຄືຈີນກັບຕ່າງປະເທດ.
ຈາກນັ້ນຜູ້ເຂົ້າຮ່ວມຍັງໄດ້ຈັດການສົນທະນາ ແລກປ່ຽນບົດຮຽນໃນຫົວຂໍ້ຕ່າງໆທາງດ້ານດ້ານວັດທະ ນະທຳ ການຮ່ວມມືດ້ານຊັບພະຍາກອນການສຶກສາລະຫວ່າງ ຈີນ-ລາວ ການຮ່ວມມືດ້ານໂຄງການສຳນັກງານບໍລິສັດສຳນັກພິມການສຶກສາກວາງຊີຈີນຈຳກັດປະຈໍາລາວ ແລະ ອື່ນໆ ພ້ອມນັ້ນກໍ່ເຂົ້າຢ້ຽມຊົມຫ້ອງການສຳນັກງານປະຈຳລາວ ແລະ ເຂດວາງສະແດງຜະລິດຕະພັນວັດທະນະທຳ.
ຂໍ້ມູນຈາກ: Cr: CMG FM93
