Saturday, July 13, 2024
Homeຂ່າວຕ່າງປະເທດສປ ຈີນ-ອາຊຽນ ຮ່ວມມືກັນເພື່ອປົກປ້ອງສັນຕິພາບ-ສະຖຽນລະພາບໃນພາກພື້ນ

ສປ ຈີນ-ອາຊຽນ ຮ່ວມມືກັນເພື່ອປົກປ້ອງສັນຕິພາບ-ສະຖຽນລະພາບໃນພາກພື້ນ

ວິທະຍຸ ສາກົນແຫ່ງ ສປ ຈີນ, ເມື່ອບໍ່ດົນມານີ້, ທ່ານ ປຣາໂບໂວ ຊຸບຽນໂຕ, ປະທານາທິບໍດີ ອິນໂດເນເຊຍ ທີ່ໄດ້ຮັບການເລືອກຕັ້ງ, ທ່ານ ສະເຫລີມໄຊ ກົມມະສິດ, ຮອງນາຍົກລັດຖະມົນຕີ ທັງເປັນ ລັດຖະມົນຕີ ກະຊວງການຕ່າງປະເທດລາວ, ທ່ານ ບຸຍແທັງເຊິນ ລັດຖະມົນຕີ ກະຊວງ ການຕ່າງປະເທດ ຫວຽດນາມ, ທ່ານ ເບັນດີໂຕ ເຟຣຕັສ ລັດຖະມົນຕີ ກະຊວງການຕ່າງປະເທດ ຕີມໍແລັດສະເຕ ແລະ ສົມເດັດ ພະກະນິດຖາທິຣາດເຈົ້າ ກົມສົມເດັດ ພະເທບພະຣັດຣາຊະສຸດາ ສະຫຍາມບໍຣົມຣາຊະກຸມາຣີ ແຫ່ງ ຣາຊະອານາຈັກໄທ ໄດ້ເດີນທາງມາຢ້ຽມຢາມ ສປ ຈີນ ຕາມລຳດັບ ຊຶ່ງໄດ້ສ່ອງແສງໃຫ້ເຫັນເຖິງ ຄວາມປາຖະໜາ ອັນຕັ້ງໜ້າ ຂອງປະເທດ ທີ່ກ່ຽວຂ້ອງ ໃນການພັດທະນາ ການພົວພັນກັບ ສປ ຈີນ.ສຳລັບ ການຮ່ວມມື ລະຫວ່າງ ສປ ຈີນ ແລະ ອາຊຽນ ໃນຂົງເຂດ ຄວາມໝັ້ນຄົງ ດ້ານການເມືອງ, ເສດຖະກິດການຄ້າ, ການແລກປ່ຽນ ດ້ານວັດທະນະທຳ ແລະ ຂົງເຂດອື່ນໆ ໄດ້ຂະຫຍາຍຕົວ ເຂົ້າສູ່ລວງເລິກຢ່າງຕໍ່ເນື່ອງມາ ໂດຍຕະຫລອດ, ຫລາຍໂຄງການທີ່ ຮ່ວມກັນສ້າງ “ໜຶ່ງແລວ ໜຶ່ງເສັ້ນທາງ” ທີ່ກ່ຽວພັນກັບຊີວິດການເປັນຢູ່ຂອງປະຊາຊົນ ໄດ້ຮັບຄວາມຄືບໜ້າເລື່ອຍໆ.

ສປ ຈີນ ໄດ້ຍຶດໝັ້ນ ໃນການຄຸ້ມຄອງ, ຄວບຄຸມ ແລະ ແກ້ໄຂຂໍ້ຂັດແຍ້ງໂດຍຜ່ານການເຈລະຈາ ສັນຕິພາບ ຢ່າງສະເໝີຕົ້ນ ສະເໝີປາຍ. ພຶດຕິກຳຕົວຈິງ ໄດ້ພິສູດແລ້ວວ່າ: ການທີ່ຢູ່ ທະເລຈີນໃຕ້ ສາມາດ ຮັກສາສັນຕິພາບ ແລະ ສະຖຽນ ລະພາບ ແມ່ນປາສະຈາກ ຄວາມພະຍາຍາມ ຮ່ວມກັນສປ ຂອງ ຈີນ ແລະ ບັນດາ ປະເທດ ສະມາຊິກ ອາຊຽນ ບໍ່ໄດ້ ຊຶ່ງເປັນເລື່ອງ ທີ່ບໍ່ແມ່ນງ່າຍ ແລະ ມີຄວາມລ້ຳຄ່າ ເປັນພິເສດ.ຂະນະທີ່ ຜູ້ຊ່ຽວຊານ ໄດ້ວິເຄາະແລ້ວ ຊີ້ອອກວ່າ: ປະເທດ ສະມາຊິກ ອາຊຽນ ຮັກສາ ຄວາມສາມັກຄີ ເປັນເລື່ອງ ທີ່ສຳຄັນ ທີ່ສຸດ ເພາະວ່າມີແຕ່ສາມັກຄີກັນ ຈຶ່ງສາມາດປົກປ້ອງສິດ ແລະ ຜົນປະໂຫຍດ ຂອງຕົນໄດ້.ໃນປີ 2023 ທີ່ຜ່ານມາ, ສປ ຈີນ ແລະ ອາຊຽນ ໄດ້ເປັນຄູ່ການຄ້າໃຫຍ່ທີ່ສຸດ ເຊິ່ງກັນ ແລະ ກັນ ເປັນເວລາ 4 ປີລຽນຕິດ. ປັດຈຸບັນ, ການເຈລະຈາ ຍົກລະດັບ ເຂດການຄ້າເສລີ ຈີນ-ອາຊຽນ ໃຫ້ເປັນເຂດການຄ້າເສລີ 3,0 ພວມໄດ້ດຳເນີນໄປ ຢ່າງເປັນແບບແຜນ. ພ້ອມກັນນັ້ນ, ປີນີ້ ຍັງເປັນ “ປີແລກປ່ຽນ ວັດທະນະທຳ ຈີນ-ອາຊຽນ”, ສອງຝ່າຍ ຈະຮ່ວມກັນ ຈັດກິດຈະກຳ 200 ກວ່າຄັ້ງ. ການຮ່ວມມື ລະຫວ່າງ ສປ ຈີນ ແລະ ອາຊຽນ ໄດ້ກ້າວເຂົ້າສູ່ລວງເລິກ ຢ່າງບໍ່ຢຸດຢັ້ງ ແລະ ກາຍເປັນເສົາຄ້ຳ ທີ່ສຳຄັນ ໃນການປົກປ້ອງ ສັນຕິພາບ ແລະ ສະຖຽນ ລະພາບ ກໍຄື ການຊຸກຍູ້ ການພັດທະນາ ແລະ ຄວາມຈະເລີນ ຮຸ່ງເຮືອງ ຂອງພາກພື້ນ./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments