ໃນໂອກາດດຳເນີນກອງປະຊຸມ ກອງປະຊຸມລັດຖະມົນຕີການເງິນ ແລະ ຜູ້ວ່າການທະນາຄານກາງອາຊຽນ ຄັ້ງທີ 11 ໃນວັນທີ 3 ເມສາ 2024 ຜ່ານມາ ຢູ່ແຂວງຫລວງພະບາງ, ໄດ້ມີພິທີເປີດ ການຊໍາລະຂ້າມແດນດ້ວຍ QR Code ລະຫວ່າງ ສປປ ລາວ ແລະ ປະເທດໄທ ເພື່ອຍົກສູງການເຊື່ອມໂຍງທາງດ້ານການເງິນຂອງອາຊຽນ ໃນການອຳນວຍຄວາມສະດວກການເຮັດທຸລະກຳຂ້າມແດນໃຫ້ມີຄວາມວ່ອງໄວ, ມີປະສິດທິຜົນ ແລະ ປອດໄພ; ເພື່ອສົ່ງເສີມທາງດ້ານການຄ້າ, ການລົງທຶນ ແລະ ການທ່ອງທ່ຽວ ລະຫວ່າງສອງປະເທດ ໃຫ້ນັບມື້ນັບຂະຫຍາຍຕົວ ໂດຍມີ ທ່ານ ບຸນເຫລືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ທ່ານ ເສດຖະພຸດ ສຸທິວາດນະຣືພຸດ ຜູ້ວ່າການທະນາຄານແຫ່ງ ປະເທດໄທ ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມ.
![](https://medialaos.net/wp-content/uploads/2024/04/434072732_865679122253062_6002444367631662989_n.jpg)
ການຊໍາລະດັ່ງກ່າວ, ຍັງຈະຊ່ວຍເຮັດໃຫ້ຂະບວນການຊໍາລະມີຄວາມສະດວກງ່າຍດາຍ, ຫລຸດຜ່ອນຕົ້ນທຶນໃນການ ເຮັດທຸລະກຳ ແລະ ສົ່ງເສີມການເຂົ້າເຖິງການຊໍາລະ ທີ່ຈະຊ່ວຍໃຫ້ບັນດາທຸລະກິດ, ຜູ້ປະກອບການ ແລະ ລູກຄ້າ ຈາກທັງປະເທດປົດລັອກໂອກາດໃໝ່ສໍາລັບການຄ້າ, ການລົງທຶນ ແລະ ການພັດທະນາເສດຖະກິດ.
ພ້ອມກັນນີ້, ທະນາຄານການຄ້າຕ່າງປະເທດລາວມະຫາຊົນ ແລະ ທະນາຄານນໍາເຂົ້າ-ສົ່ງອອກຂອງ ປະ ເທດໄທ ກໍໄດ້ຮ່ວມກັນລົງນາມບົດບັນທຶກຄວາມເຂົ້າໃຈ ເພື່ອສ້າງຄວາມເຂັ້ມແຂງໃຫ້ແກ່ການຮ່ວມມືສອງຝ່າຍທາງດ້ານການເງິນ ເຊິ່ງຈະຊ່ວຍອໍານວຍຄວາມສະດວກໃຫ້ແກ່ການດຳເນີນທຸລະກິດຂອງລາວ ແລະ ໄທ, ພ້ອມທັງເຮັດໃຫ້ບັນດານັກລົງທຶນທັງສອງສະຖາບັນ ສາມາດເຂົ້າເຖິງທຶນ ແລະ ຜະລິດຕະພັນທາງດ້ານການເງິນລະຫວ່າງກັນ.
![](https://medialaos.net/wp-content/uploads/2024/04/434412029_865679082253066_3740801432037415275_n.jpg)
ພາຍໃຕ້ການເຊື່ອມໂຍງທາງດ້ານການເງິນອາຊຽນ, ທະນາຄານແຫ່ງ ສປປ ລາວ ໄດ້ສໍາເລັດການລົງນາມໃນບົດບັນທຶກຄວາມເຂົ້າໃຈວ່າດ້ວຍການເຊື່ອມໂຍງ ການຊໍາລະຂອງພາກພື້ນ ສະບັບທີ 3 ເຊິ່ງຜ່ານມາມີ 7 ທະ ນາຄານກາງອາຊຽນ ໄດ້ລົງນາມເປັນທີ່ຮຽບຮ້ອຍແລ້ວ ເຊິ່ງຄວາມສໍາຄັນຂອງ ການລົງນາມໃນບົດບັນທຶກຄວາມເຂົ້າໃຈດັ່ງກ່າວ ມີຄວາມມຸ່ງຫວັງທີ່ຈະສ້າງຄວາມເຂັ້ມແຂງໃນການເຊື່ອມໂຍງການເງິນຂອງພາກພື້ນອາຊຽນ ແລະ ການຊຸກຍູ້ສົ່ງເສີມການຮ່ວມມືທາງດ້ານເສດຖະກິດ ໂດຍການສົ່ງເສີມການເຮັດທຸລະກຳ ເປັນສະກຸນເງິນທ້ອງຖິ່ນ ແລະ ການອຳນວຍຄວາມສະດວກທາງດ້ານການຊໍາລະຂ້າມແດນ; ການເຊື່ອມຕໍ່ດ້ານການຊໍາລະທີ່ໄຮ້ຮອຍຕໍ່ ຈະສ້າງເງື່ອນໄຂໃຫ້ແກ່ທຸລະກິດ, ບຸກຄົນ ແລະ ລັດຖະບານ ໃນການເຮັດທຸລະກຳຂ້າມແດນຢ່າງມີປະສິດທີຜົນ ກໍຄືການຊໍາລະຂ້າມແດນທີ່ ວ່ອງໄວ, ມີຕົ້ນທຶນຕໍ່າ, ມີຄວາມໂປ່ງໃສຫລາຍຂຶ້ນ, ແລະ ສ້າງຄວາມເຂັ້ມແຂງທາງດ້ານເສດຖະກິດ.