ໃນໄລຍະບຸນປີໃໝ່ລາວ ຫລື ບຸນສົງການປີນີ້, ພະແນກຕໍາຫລວດຈະລາຈອນ ນະຄອນ ຫລວງວຽງຈັນ(ນວ) ກຽມຈັດກອງກໍາລັງຮັບຜິດຊອບແບບປະຈໍາທີ່ ແລະ ເຄື່ອນທີ່ປະມານ 700 ກວ່າຄົນ ປະຈໍາການຢູ່ 100 ກວ່າຈຸດ, ພ້ອມຈະມີການກວດຈັບຄວາມໄວ ແລະ ທາດເຫລົ້າຕາມສາຍທາງ. ທັງນີ້, ກໍເພື່ອອຳນວຍຄວາມສະດວກໃນການສັນຈອນຕາມທ້ອງຖະໜົນ.
ທ່ານ ພັນໂທ ສັງຄົມ ພົມມະລາດ ຫົວໜ້າຕໍາຫລວດຈະລາຈອນ ນວ ໃຫ້ສໍາພາດເມື່ອບໍ່ດົນນີ້ ວ່າ: ເພື່ອຮັບປະກັນເຮັດໃຫ້ການສັນຈອນໄປ-ມາຕາມເສັ້ນທາງ ມີຄວາມເປັນລະບຽບຮຽບຮ້ອຍ, ສະ ດວກ ແລະ ປອດໄພດີ ໂດຍສະເພາະ ໃນໂອກາດປີໃໝ່ລາວ ພສ 2567 ນີ້, ພະແນກຕໍາຫລດຈະລາ ຈອນ ຫ້ອງຕໍາຫລວດ ປກສ ນະຄອນຫລວງວຽງຈັນ ສົມທົບກອງຕໍາຫລວດຈະລາຈອນ 9 ຕົວເມືອງ ໄດ້ວາງແຜນຈັດກໍາລັງຕໍາຫລດ ຈໍານວນ 724 ຄົນ ປະຈໍາຢູ່ຕາມຈຸດປ້ອມຍາມ, ຕາມສາຍທາງ ແລະ ຢູ່ຕາມສະຖານທີ່ຈັດກິດຈະກໍາຕ່າງໆ ທົ່ວນະຄອນຫລວງວຽງຈັນ 129 ຈຸດ. ໃນນີ້, ຈະເນັ້ນ 5 ໜ້າວຽກຕົ້ນຕໍຄື ວຽກງານໂຄສະນາ ໂດຍນໍາໃຊ້ລົດກະບະ, ລົດຈັກຕິດເຄື່ອງສຽງ ເພື່ອກ່າວໂຄສະນາເຜີຍແຜ່ຄໍາສັ່ງ, ຄໍາແນະນໍາ, ກົດລະບຽບ ແລະ ຫລັກການຂັບຂີ່ປອດໄພຕ່າງໆ ໃຫ້ມວນຊົນໄດ້ຮັບຮູ້ຢ່າງກວ້າງ ຂວາງ ທີ່ສໍາຄັນຜູ້ຂີ່ຄວນໃຫ້ກຽດຄົນຍ່າງ; ເນັ້ນໃສ່ວຽກງານຄວບຄຸມລະບາຍການສັນຈອນ ອໍານວຍຄວາມສະດວກຕໍ່ຜູ້ໃຊ້ລົດໃຊ້ຖະໜົນ; ເນັ້ນໃສ່ວຽກງານເລາະຈັດລະບຽບສາຍທາງ ເພື່ອບໍ່ໃຫ້ມີລົດຈອດຜິດຈຸດ ຈອດກີດຂວາງການສັນຈອນ; ວຽກຕັ້ງຈຸດກວດກາການສັນຈອນ ແລະ ການເຮັດວຽກງານບັງຄັບໃຊ້ກົດໝາຍ ໂດຍສະ ເພາະຈັບຄວາມໄວ ແລະ ກວດກາທາດເຫລົ້າ; ວຽກງານປະຈໍາການ 24 ຊົ່ວໂມງ ຖ້າມີກໍລະນີເກີດອຸບັດເຫດຢູ່ບ່ອນໃດ ກໍຈະໄດ້ໄປແກ້ໄຂແບບວ່ອງໄວ.
ທ່ານ ພັນໂທ ສັງຄົມ ພົມມະລາດ ຍັງໃຫ້ຮູ້ອີກວ່າ: ໃນປີຜ່ານມາ, ໄລຍະ 3 ມື້ຂອງການສະ ຫລອງປີໃໝ່ລາວ ຢູ່ນະຄອນຫລວງວຽງຈັນ ມີອຸບັດເຫດເກີດຂຶ້ນລາຍໃຫຍ່ 20 ກໍລະນີ, ເສຍຊີວິດ 3 ລາຍ. ນອກນີ້ ຍັງມີກໍລະນີເກີດອຸບັດເຫດທີ່ໄກ່ເກ່ຍກັນເອງ ຫລື ຂະໜາດນ້ອຍອີກຫລາຍລາຍ. ດັ່ງນັ້ນ, ໃນປີນີ້ ເພື່ອປ້ອງກັນ ແລະ ເຮັດໃຫ້ອຸບັດເຫດຫລຸດລົງ ຈຶ່ງຂໍຮຽກຮ້ອງມາຍັງບັນດານັກຂັບຂີ່ ກໍຄື ຜູ້ໃຊ້ລົດໃຊ້ຖະໜົນ ໃຫ້ພ້ອມກັນປະຕິບັດຄໍາສັ່ງ, ຄໍາແນະນໍາ ແລະ ຫລັກການຂັບຂີ່ປອດໄພ, ເຮັດແນວໃດພວກທ່ານຈຶ່ງຈະຫລິ້ນບຸນປີໃໝ່ ດ້ວຍຄວາມເບີກບານມ່ວນຊື່ນ ເຊິ່ງກໍເປັນໜ້າທີ່ຂອງໝົດທຸກຄົນໃນສັງຄົມ.
ພ້ອມກັນນີ້, ທ່ານ ພັນໂທ ສັງຄົມ ພົມມະລາດ ຍັງໄດ້ຮຽກຮ້ອງໃຫ້ທຸກຄົນຄວນເອົາໃຈໃສ່ ເມື່ອດື່ມສິ່ງມຶນເມົາແລ້ວ ຫ້າມຂັບຂີ່ຢ່າງເດັດຂາດ; ຫ້າມໃຊ້ຄວາມໄວເກີນກໍານົດ ແລະ ຕ້ອງຮັກສາໄລຍະຫ່າງໃຫ້ເໝາະສົມກັບຄວາມໄວທີ່ກໍາລັງໃຊ້ຢູ່; ກ່ອນຈະປ່ຽນທິດທາງການສັນຈອນທຸກຄັ້ງ ຕ້ອງເປີດໄຟ ລ້ຽວກ່ອນ ແລະ ຮັບປະກັນຄວາມປອດໄພ; ກ່ອນຈະຊີງລົດຄັນອື່ນໄປຂ້າງໜ້າ ຕ້ອງຮັບປະກັນຄວາມປອດໄພ ແລະ ຜູ້ຂັບຂີ່ລົດທຸກຄົນໃຫ້ພະຍາຍາມແນບເຂົ້າແຄມທາງກໍ້າຂວາມືຂອງຕົນໃຫ້ຫລາຍ ເທົ່າທີ່ຈະຫລາຍໄດ້.
ຂໍ້ມູນ: ຄໍາກອງ
ຂ່າວ: ສົມຫວັງ
