ກອງປະຊຸມເຜີຍແຜ່ນິຕິກໍາກ່ຽວກັບການຄຸ້ມຄອງເງິນຕາຕ່າງປະເທດ ໃຫ້ແກ່ຜູ້ປະ ກອບການທຸລະກິດການທ່ອງທ່ຽວ ຈັດຂຶ້ນວັນທີ 13 ມີນາ 2024 ທີ່ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ໂດຍເປັນປະທານຂອງ ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ ມີ ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ ທະນາຄານແຫ່ງ ສປປ ລາວ ພ້ອມ ບັນດາຜູ້ຕາງໜ້າຈາກໂຮງແຮມ ຣີສອດ ຮ້ານອາຫານ ພັດຕະຄານ ຮ້ານບັນເທີງ ບໍລິສັດນຳທ່ຽວ ຮ້ານ ນວດ ແລະ ສະປາ ເຂົ້າຮ່ວມ.
ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ ກ່າວວ່າ: ກອງປະຊຸມຄັ້ງນີ້ ກໍແມ່ນໜຶ່ງໃນຫຼາຍໆກິດຈະກໍາບູລິມະສິດຂອງລັດຖະບານ ເພື່ອແກ້ໄຂບັນຫາ ນໍາພາປະເທດຊາດຂອງພວກເຮົາຫຼຸດພົ້ນຈາກວິກິດການທາງດ້ານເສດຖະກິດ-ການເງິນ ເຊິ່ງຮຽກຮ້ອງໃຫ້ທຸກພາກສ່ວນໃນສັງຄົມຕ້ອງໄດ້ໃຫ້ຄວາມຮ່ວມມືກັນ ຈຸດປະສົງຫຼັກ ເພື່ອໃຫ້ບັນດາຜູ້ປະກອບການທຸລະກິດການທ່ອງທ່ຽວ ໄດ້ຮັບຮູ້ ເຊື່ອມຊຶມ ແລະ ນໍາໄປສູ່ການຮ່ວມມືໃນການຈັດຕັ້ງປະຕິບັດຕົວຈິງ ທັງນີ້ ກໍເພື່ອເປັນການຊຸກຍູ້ ສົ່ງ ເສີມ ການຈໍລະຈອນເງິນຕາ ການຄ້າ ການບໍລິການ ການລົງທຶນ ໃຫ້ມີປະສິດທິພາບ ປະສິດທິຜົນ ສ້າງຄວາມເຂັ້ມ ແຂງ ໃຫ້ແກ່ຄັງສໍາຮອງເງິນຕາຕ່າງປະເທດ ສ້າງຈິດສໍານຶກໃຫ້ແກ່ບັນດາຜູ້ປະກອບການປະຕິບັດຕາມລະ ບຽບຫຼັກການໃນການຄອບ ຄອງ ການນໍາໃຊ້ ການຊໍາລະສະສາງກັບຕ່າງ ປະເທດ ເປັນໄປຕາມຫຼັກການ ລະບຽບການ ແລະ ມາດຕະການ ກ່ຽວກັບເງິນຕາຕ່າງປະເທດຂອງ ສປປ ລາວ.
ການທ່ອງທ່ຽວແມ່ນຂະແໜງການບໍລິການທີ່ປະກອບສ່ວນສ້າງລາຍຮັບໃຫ້ແກ່ປະ ເທດຊາດ ເປັນຂະແໜງ ການທີ່ສົ່ງອອກກັບທີ່ ສ້າງວຽກເຮັດງານທໍາກະຈາຍລາຍໄດ້ໃຫ້ແກ່ປະຊາຊົນທັງທາງກົງ ແລະ ທາງອ້ອມເປັນຈໍານວນຫຼາຍ ລັດຖະບານໄດ້ຖືສໍາຄັນວຽກງານພັດທະນາການທ່ອງທ່ຽວ ໂດຍຖືເປັນຂະແໜງການເສດຖະກິດປາຍ ແຫຼມ ຖືເອົາວຽກງານການທ່ອງທ່ຽວ ເປັນສິ່ງກະຕຸ້ນໃຫ້ມີການຂະຫຍາຍການຜະລິດທີ່ເປັນຕ່ອງໂສ້ເປັນຕົ້ນ ການຂົນສົ່ງ ການຜະລິດເພື່ອອຸປະໂພກ ແລະ ບໍລິໂພກ ການຜະລິດກະສິກໍາ ການສົ່ງເສີມສີໄມ້ລາຍມືຫັດຖະກໍາ ການສົ່ງເສີມວັດທະນະທໍາບັນດາເຜົ່າ ລວມທັງການສ້າງຈິດສໍານຶກໃຫ້ແກ່ປະຊາຊົນລາວບັນດາເຜົ່າ ໃຫ້ຮັກ ຫອມປະ ເທດຊາດ ຮັກວັດທະນະທໍາທີ່ເປັນເອກະລັກ ແລະ ປົກປັັກຮັກສາສິ່ງແວດລ້ອມທໍາມະຊາດ ພູຜາປ່າໄມ້ ຫ້ວຍນໍ້າລໍາເຊ ໃຫ້ມີຄວາມຍືນຍົງ.
ປັດຈຸບັນ ສປປ ລາວ ມີສະຖານທີ່ພັກແຮມຈໍານວນ 3.000 ກວ່າແຫ່ງ ມີຈໍານວນ 67.000 ກວ່າຫ້ອງ ມີພັດຕະຄານ 27 ແຫ່ງ ຮ້ານອາຫານ 2.900 ກວ່າແຫ່ງ ສະຖານບັນເທີງ 139 ແຫ່ງ ບໍລິສັດນໍາທ່ຽວລະຫວ່າງປະເທດ 600 ກວ່າບໍລິສັດ ມີພະນັກງານນໍາທ່ຽວ 2.000 ກວ່າຄົນ ແລະ ມີສະຖານທີ່ທ່ອງທ່ຽວທີ່ຂື້ນທະບຽນແລ້ວ 800 ກວ່າແຫ່ງ.
