ນະຄອນຫຼວງພະນົມເປັນ ວັນທີ 9 ມັງກອນ 2024 ລັດຖະມົນຕີກະຊວງທ່ອງທ່ຽວ, ທ່ານ ສົກ ໂຊເກນ ໄດ້ໃຫ້ການຕ້ອນຮັບການເຂົ້າຢ້ຽມອັດທະຍາໄສ ຂອງ ທ່ານ ບົວແກ້ວ ພູວົງໄຊ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ລາຊະອານາຈັກ ກຳປູເຈຍ ເພື່ອປຶກສາຫາລືວຽກງານທ່ອງທ່ຽວ ກ່ຽວກັບກາລະໂອກາດການຮ່ວມມືດ້ານການທ່ອງທ່ຽວແບບຍືນຍົງ ແລະ ຈຸດຢືນລະຫວ່າງ 2 ປະເທດ, ເພື່ອແນໃສ່ຊຸກຍູ້ການທ່ອງທ່ຽວເຊິ່ງກັນ ແລະ ກັນ ແລະ ສົ່ງເສີມການຮ່ວມມືດ້ານການທ່ອງທ່ຽວ ກຳປູເຈຍ-ລາວ-ຫວຽດນາມ CLV ຕາມທີ່ສາມປະເທດມີແຜນພັດທະນາດ້ານການທ່ອງທ່ຽວ ພ້ອມທັງຮັດແໜ້ນຄວາມສາມາດຂອງອະນຸພາກພື້ນດ້ວຍການພະຍາຍາມຮ່ວມກັນດ້ານການທ່ອງທ່ຽວໃນອານາຄົດຂ້າງໜ້າ.
ໃນການພົບປະທ່ານລັດຖະມົນຕີ ແລະ ທ່ານເອກອັກຄະລັດຖະທູດ ຍັງໄດ້ປຶກສາຫາລືກ່ຽວກັບແຜນການໃຫ້ບັນດາເຈົ້າໜ້າທີ່ວິຊາການຂອງສາມປະເທດ CLV ໃນການຜັນຂະຫຍາຍແຜນການເຄື່ອນໄຫວຮ່ວມຈຸດໝາຍປາຍທາງດຽວ ພ້ອມທັງກວດກາຄວາມເປັນໄປໄດ້ຂອງການຈັດຕັ້ງ ການຮ່ວມມື ກຳປູເຈຍ-ລາວ-ຫວຽດນາມ, ກອງປະຊຸມລັດຖະມົນຕີສາມຝ່າຍຈະໄດ້ປຶກສາຫາລືກັນໃນເວທີປາໄສການທ່ອງທ່ຽວອາຊຽນ 2024, ຊື່ງຄາດວ່າຈະຈັດຂຶ້ນຢູ່ນະຄອນຫຼວງວຽງຈັນ ສປປ ລາວ ໃນຕົ້ນປີ 2024.
ພາບ-ຂ່າວ: ສະຖານທູດລາວ ປະຈຳລາຊະອານາຈັກກຳປູເຈຍ
